FM Kongratula PNTL: Hakat ba Idade XIII hahu La’o no Maduru iha Knáar

FM Kongratula PNTL: Hakat ba Idade XIII hahu La’o no Maduru  iha Knáar post thumbnail image

Formatura PNTL. Foto FM

Fundasaun Mahein, 26 Marsu 2013

Komunikadu Imprenza

FM fo parabens ba PNTL nia aniversariu ba dala XIII iha tinan ida ne’e. Institusaun joven ne’ebe lidera hosi joven sira hahu hakarak la’o ba nia susesu maske iha sasidik barak. Susesu hirak hanesan operasaun simpatiku hasoru Grupu CPD iha Welaluhu-Manufahi no mos Presidente ba Polisia CPLP sai simbolu fiar husi povu nasional ho internasional. Inklui susesu sira seluk ne’ebé marka ona progresu iha tinan 13 nia laran hanesan sasukat ida ba kapasidade Instituisaun PNTL maske sei infantil hela maibé hahu la’o maske ho limitasaun oin-oin.

FM mos observa PNTL kontinua iha lakuna barak iha institusaun laran hanesan sasidik sai beran hakat ba oin. PNTL seidauk hatur iha planu dezenvolvementu ketak ida ne’ebé orienta dezenvolvimentu instituisaun PNTL ne’ebé presiza hatur iha “Kadernu Estudus” ida tuir realidade no nesesidade povu no instituisaun nian. Kadernu Estudus ne’ebé FM kestiona sei hatur interese seguransa nasional no interna nian tuir ameasa domestika, rejional no internasional iha mundu ohin loron nian ne’ebé asuntu seguransa sai kompleksu liu tan.

Asuntu seluk instituisaun PNTL hakat ba tinan XIII, FM husu ba polítikus iha governu atu suporta polítika, hadia salariu, sistema promosaun no kondisaun servisu sira ne’ebé bele dudu profesionalismu instituisaun no pesoal PNTL nian. Profesionalismu PNTL nian durante ne’e sai preokupasaun entidade tomak hakarak PNTL tenke servisu ho profesional maibe ita obriga PNTL profesional iha limitasaun oin-oin nia laran .

Sasidik seluk fali iha sistema jestaun no kontrolu kilat nian ne’ebé seidauk regulariza tuir lei no prosedementu uzu nian. Sai hanesan lisaun ba polítiku no governante sira, presiza avalia no estuda husi sasidika hirak ne’e. Faktu sira ne’ebé sei manas hela iha sosiedade nia kakutak maka insidenti sira ne’ebé durante tinan XIII nia laran akontese iha insidenti balu pesoal PNTL sira uza-kilat hakat lei no prosedementu. Konsekuensia ikus hamate no hakanek sidadaun balu no pesoal balu halakon kilat.

Hadia sistema aprovizionamentu PNTL nian hodi prevene pratika mal administrasaun no mal aprovizionamentu inklui pratika iregularidade sira ne’ebé sei habelit iha prosesu aprovizionamentu PNTL nian. Kazu hanesan aprovizionamentu sosa kilat ba PNTL ne’ebé PNTL ho PT. PINDAD hatama kilat mai nasaun maske seidauk iha despaisu formal husi Konsellu Ministru ka Ministériu Seguransa.

Pratika sistema rotasaun membru PNTL seidauk aplika lolos iha rotasaun elementu PNTL nian. FM konsidera ida ne’e iha tendensia sei hamosu polisia regional no halakon karakter polisia nasional. Pratika hirak ne’e, pesoal polisia ida-idak servisu iha sira nia distritu no públiku kestiona dala balu atuasaun pesoal PNTL la hatur nu’udar polisia nasional ho neutru no iha tendensia familia iha pratika hirak ne’e. Pontu importante ida mos governu presiza kria kondisaun servisu iha distritu 13, pratikamente kazerna ba PNTL sira hodi fasilita sistema rotasaun ba pesoal PNTL sira.

Pratika prevensaun konflitu lahatur iha pratika atuasaun PNTL nian no responde hafoin konflitu. FM konsidera ida ne’e hamihis dadauk filozofia no karakter polisiamentu komunitaria no preveleiju liu asaun kombate nian ne’ebé hakait ho formasaun iha unidade sira iha PNTL nia laran. Formasaun durante ne’e intensifika liu ba Unidade Espesial Polisia (UEP) no la iha suporta polítika no orsamentu ne’ebé sustentavel ba pratika polisiamentu komunitaria. Kazu hanesan FM nia monitorizasaun hare katak inisiativa Komando Distrital sira hanesan distritu Bobonaro, Aileu no Liquisa ho inisiativa harii “Konsellu Polisiamentu Komunitaria – KPK” no “Seguransa Voluntariu” iha distritu Liquisa maibé la iha suporta husi governu no depende ba doador sira.

FM nia Rekomendasaun:

1. Institusionaliza polisia komunitaria hodi hatur hanesan polisia nasional nian karakter no filozofia ne’ebé preve tiha ona iha lei organika PNTL nian.

2. Governu presiza halo estudus planu dezenvolvimentu PNTL ketak ida ka “Kadernu Estudus” ba planu dezenvolvimentu PNTL la’os Planu Estratejiku Dezenvolvimentu Nasional – PEDN ne’ebé dadaun ne’e governu konsidera hanesan mos planu ba PNTL.

3. Governu presiza hatur iha kuadru legal no prosidementu sira kona-bá sistema rotasaun PNTL nian iha distritu 13.

Atu hatene kle’an liu kona-bá asuntu ne’e bele kontaktu:
Nélson Belo
Diretur Fundasaun Mahein
Website: www.fundasaunmahein.org
E-mail: nelson@fundasaunmahein.org
Telemovel: (+670) 7737 4222

2 thoughts on “FM Kongratula PNTL: Hakat ba Idade XIII hahu La’o no Maduru iha Knáar”

  1. ho selebrasaun ba dala XIII ne’e, Governo bele tau matan diak liutan, nune’e bele forma Instituisaun ne’e sai Profesionalismu liu tuir ema hotu nia hakarak…..

Leave a Reply to Helio de Deus Cancel reply

Your email address will not be published.

Related Post