Foto : Tatoli
Iha loron 6 Dezembru 2023, Konsellu Minístru fo sai alterasaun dahuluk husi Dekretu-Lei Nú. 33/2008 kona-ba Ijiene no Orden Públika, ho razaun katak “hanoin ba evolusaun nivel modelo organizasaun no modelu funsionamentu administrasaun lokál no mós kreximentu populasaun ne’ebé boot, tanba ne’e presiza iha atualizasaun ba norma sira ne’e.” Konsellu mos deklara katak autoridade lokál hamutuk ho PNTL mak sei responsável atu fiskaliza kumprimentu regra sira no aplika sansaun ne’ebé prevee ona.
Hahalok ne’ebé Dekretu-Lei bandu mak asaun ne’ebé konsidera nudár ameasa ba orden públika no ijiene hanesan halo barullu iha kalan sein autorizasaun, soe lixu no fakar bee foer iha fatin públiku, husik sasán iha estrada públika, halo instalasaun ekipamentu konstrusaun no komérsiu sein autorizasaun, no husik animál livre iha fatin rezidensiál sira.
Fundasaun Mahein (FM) hakerek ona kona-ba falta sistema atu kontrola lori kareta arbiru, poluisaun sonora no jestaun lixu ne’ebé sai ameasa ba seguransa públika no dezenvolvimentu ekonómiku. Tanba ne’e, FM apresia Governu nia desizaun atu halo alterasaun ba Lei ne’e hodi hadia kondisaun iha área urbana sira liu husi kontrola prátika sira ne’ebé la ijiéniku, anti-sosiál no perigozu. Ami suporta makaas implementasaun lei no regra sira atu bele redús prátika aat sira ne’ebé provoka violénsia, lori kareta arbiru no fakar lixu no foer.
Maske nune’e, ami preokupa se Governu foka deit ba polisiamentu no sansaun, sei la atinji rezultadu ne’ebé sustentável. Maioria prátika sira ne’ebé Dekretu-Lei 33/2008 bandu mai husi fatór estruturál sira ne’ebé ligadu ho pobreza no falta dezenvolvimentu. Fatór sira hanesan falta infraestrutura bázika hanesan saneamentu, edukasaun ne’ebé menus, rendimentu ne’ebé la adekuadu, no kapasidade estadu ne’ebé fraku. Tanba ne’e, artigu ida ne’e fahe FM nia hanoin no sujestaun balun ne’ebé ami espera bele ajuda Governu atinji nia objetivu atu hametin ijiene no orden públika ho dalan ne’ebé efetívu no sustentável liu.
FM fiar katak jestaun urbana – hanesan kontrolu lixu, konstrusaun no prátika seluk ne’ebé afeita ba espasu públiku – esensiál atu hadia povu Timor nia moris no asegura sustentabilidade estadu nian. Bainhira ambiente urbana sai seguru no moos, povu nia vida sei mais komfortável, seguru no haksolok. Nune’e povu nia saúde fízika no psikolójika sei forte liu, no sosiedade mos sei metin liu. Karik populasaun mais saudável no kontente, konflítu sosiál sei menus no ema sei produtívu liu. Au mezmu tempu, setór privadu depende ba ambiente ida ne’ebé moos, organizadu no seguru, liu-liu setór sira hanesan ospitalidade no turizmu. Ema hotu konkorda katak Timor-Leste presiza setór privadu ne’ebé forte atu sees husi dependénsia ba Fundu Petrolíferu no ajuda povu sai prósperu.
Kleur ona FM observa situasaun seguransa and sósio-ekonómiku iha Timor-Leste, no ami suporta tebes implementasaun regra kona-ba hahalok anti-sosiál ne’ebé grave hanesan violénsia, soe lixu arbiru no halo barullu iha área rezidensiál sira. Violénsia entre grupu joven, inklui grupu arte marsiais no rituais, halo komunidade barak sente tauk no la seguru. Violénsia ne’e mos sai bareira ba dezenvolvimentu ekonómiku tanba prevene investimentu privadu no ekonomia kalan (night-time economy). Soe lixu arbiru ameasa saúde no seguransa públika tanba hada’et moras, aumenta susuk no provoka inundasaun. Poluisaun sonora husi veíkulu ho modifikasaun illegal no Bluetooth speaker ameasa ben-estar públiku. Presiza mos prevene prátika seluk ne’ebé ameasa seguransa públika hanesan husik sasán iha estrada, no FM konkorda katak PNTL nia papél importante hodi implemeta regra sira ne’e.
Maske nune’e, prátika barak ne’ebé Dekretu-Lei bandu refleita Timor-Leste nia kondisasaun dezenvolvimentu sósio-ekonómiku ne’ebé menus tebes. Kondisaun ne’e rezulta husi fatór oi-oin, hanesan istória kolonizasaun no konflítu. Atu bele elimina pobreza no hasa’e povu nia kondisaun moris, ekonomia produtívu presiza aumenta, liu-liu setór sira hanesan agrikultura, peksas no turizmu. Ida ne’e presiza investimentu boot ba iha infraestrutura bázika, edukasaun, teknolojía, uma no kombate moras no malnutrisaun. Maibé, to’o agora Governu Timor-Leste seidauk fo prioridade ba área xave sira ne’e.
Tanba ne’e FM kestiona, nusa mak Governu tenke kriminaliza povu kiik wainhira Governu rasik falla atu kria kondisaun diak ba sira? Governu mos iha responsabilidade ba prátika iha komunidade ne’ebé “la ijiéniku”, tanba falla atu investe ba área xave sira temi iha leten. Tanba ne’e, FM haree polisiamentu ba prátika aat sira la’os solusaun atu promove justisa no dignidade ba povu. Aleinde ne’e, solusaun ne’e sei la sustentável, tanba PNTL falta rekursu no kapasidade.
Atu bele rezolve problema ijiene no orden públika Governu presiza foti meius ne’ebé promove justisa, dignidade no direitus umanus. Tanba ne’e la sufisiente atu haruka PNTL kaer membru komunidade no aplika sansaun. Presiza planu ida ne’ebé kompreensívu hodi identifika no responde ba problema nia abut sira. Ida ne’e signifika tenke rezolve fatór ne’ebé kontribui ba kondisaun pobreza, falta no marjinalizasaun ne’ebé provoka dezorden no konflítu. Parte xave maka dezenvolvimentu setór produtívu sira, no ida ne’e presiza investimentu ne’ebé boot atu dezenvolve rekursus umanus, infraestrutura fízika, no ambiente negósiu ida ne’ebé promove setór privadu. Au mezmu tempu, estadu tenke hametin nia kapasidade atu implementa lei no fornese servisus esensiál sira, hanesan kódigu konstrusaun no estrada, koleksaun lixu no saneamentu públiku.
FM mos rekomenda ba IX Governu atu kontinua prosesu halo Planu Mestre Urbanu ba sidade Dili nudár pasu esensiál hodi promove seguransa públika no dezenvolvimentu ekonómiku ne’ebé inkluzívu. Planu ne’e presiza kompenente balun hanesan tuir mai:
- Hadia infraestrutura iha sidade: Planu urbanu kompreensívu tenke prioritiza hadia estrada, dalan lao ain, no drenajen iha sidade tomak atu bele enkoraja ema atu lao ho ain, redús macet, no hametin saúde no seguransa públiku. Presiza hadia kuak iha estrada sira, hadia no taka bee dalan, halo mahon para ema la bele sente manas wainhira lao iha estrada, no halo ponte para ema bele hakat dalan ho seguru.
- Transporte públiku no seguransa estrada: Atu prevene macet no hadia prátika lori kareta no motór, Governu presiza moderniza no regula transporte públiku sira, no mos revee no hadia prosesu atu hetan lisensa kondutór (SIM).
- Halakon kiak no uma informal sira: Prátika no matéria konstrusaun ne’ebé la adekuadu rezulta husi limitasaun finanseiru no falta edukasaun. Ida ne’e kontribui ba prátika la ijiéniku hanesan dada bee dalan ba fatin públiku no saneameantu ne’ebé la adekuadu. La bele elimina prátika sira ne’e liu husi multa; presiza asaun ne’ebé kompreensívu. Área sira iha Dili ne’ebé maioria uma informal ka illegal (Inglés bolu slum), ne’e tanba ema barak dezlokadu iha tinan 1999 no kontinua okupa rai no halo uma ilegal. Estadu iha opsaun rua: bele halo planu atu halakon slum no muda populasaun ba fatin foun; ou bele investe makaas ba infraestrutura bázika no suporta komunidade hadia uma sira.
- Uma públiku: Governu presiza kria planu ida ba programa uma públiku: Governu bele harii uma ou bele fornese matéria ba familia sira atu halo uma rasik bazeia ba kritéria ne’ebé aprovadu. Matéria no dezenhu uma presiza adapta ba klima Timor-Leste, no bele uza matéria lokál sira.
- Kódigu Konstrusaun no Inspeksaun: Atu garante seguransa edifísiu sira, presiza adopta no implementaa Kódigu Konstrusaun. Iha tinan 2022, VIII Governu adopta Regime jurídico da edificação e urbanização, Dekretu-Lei Nú. 9/2022. FM espera katak IX Governu sei implementa lei ida ne’e, no kria ajénsia ba lisensamentu no inspeksaun konstrusaun nian.
- Espasu rekreasaun no komersial sira: Atu halo povu sente orgullu no promove komérsiu no investimentu, Governu bele kria planu ba zonas rekreasaun (halimar) no komersial iha Dili laran, liu-liu dezenvolve zona tasi ibun no parke ka espasu verde sira.
- Sentru Sidade Dili: To’o agora, “sentru” Dili nian seidauk iha. Tanba ne’e seidauk iha fatin públiku iha ne’ebé sidadaun ho vizitante barak bele halibur no partisipa iha atividade sira hanesan la’o pasiar, ezersísiu no komérsiu. Tanba ne’e FM sujere Governu bele prioritiza área Colmera no Portu Dili tuan atu sai sentru komériu no rekreasaun Dili. Sentru sidade presiza loja, bar, restorante, no fasilidade barak atu rezidente no vizitante husi liur sira bele aproveita no goza.
FM konkorda ho Governu katak importante atu prevene prátika sira hanesan soe lixu arbiru, prátika konstrusaun aat, violénsia, no poluisaun sonora. Maibé, polisiamentu no sansaun sei la halakon problema sira ne’e, tanba la rezolve problema nia abut ka kauza prinsipál, no sei la sustentável ba tempu naruk. Ami haree la justu atu fo sala deit ba komunidade kiik sira, maibé Estadu tenke responsável tanba falla atu investe atu hadia infraestrutura bázika no dezenvolve ekonomia produtívu. Fallansu ne’e hanesan fatór boot ida ne’ebé kontribui ba kondisaun no prátika aat sira ne’ebé ita haree lor-loron iha sidade.
Tanba ne’e, atu solusiona problema sosiál sira ne’e ho dalan ne’ebé promove justisa, dignidade no direitus umanus, FM haree Governu presiza haree ba nia abut sira, liu-liu pobreza, falta servisus no infraestrutura, menus edukasaun, no ekonomia ne’ebé stagnadu. Karik Governu investe makaas ba iha área hirak ne’e, bele hadia povu baibain nia moris no hamenus mal-prátika sira ne’ebé Dekretu-Lei Nú. 33/2008 bandu. Ami mos haree planu kompreensívu ba dezenvolvimentu Dili nu’udár pasu esensiál ida atu atinji objevitu sira ne’e.
