Foto : Internet
Dadaun ne’e, Timor-Leste enfrenta hela krize bo’ot: kazu tráfiku umanu ne’ebé aumenta ba beibeik hodi aproveita ema vulnerável sira ne’ebé buka hela seguransa ekonómika. Foin dadauk kazu barak akontese no hatudu oinsá Timor-oan sira kontinua sai vítima tanba hahalok rede kriminozu sira nian. Iha tinan 2022, kazu tráfiku ne’ebé envolve feto Timor-oan sira iha Abu Dhabi dada públiku nia atensaun. Maibé iha kazu barak tan ne’ebé la hetan atensaun husi jornál ka média sosiál. Timor-oan barak – liu-liu joven sira – buka hela oportunidade servisu iha fatin sira hanesan Sudeste-Ázia, Europa no Médiu Oriente. Beibeik ba beibeik sira kontinua monu ba iha grupu kriminozu nia liman. La’os de’it tráfiku internasionál – infelizmente iha mos kazu tráfiku umanu barak iha Timor laran, maibé estadu no públiku seidauk rekoñese katak ida ne’e eziste duni.
Artigu badak ida ne’e diskute kona-ba fatór balun ne’ebé Fundasaun Mahein (FM) haree kontribui ba problema tráfiku umanu iha Timor-Leste, hanesan falta kapasidade polísia, rekursu ba detesaun no prevensaun ne’ebé la adekuadu no apoiu husi governu ne’ebé limitadu tebes. Públiku mos falta koñesimentu kona-ba oinsá tráfiku umanu funsiona ho nia tipu sira. Nune’e mos, artigu analiza definisaun tráfiku umanu rasik. Ne’e tanba prátika balun ne’ebé sosiedade Timor-Leste konsidera hanesan buat ne’ebé “normal”, maibé lolos prátika hirak ne’e bele konsidera nu’udár tipu tráfiku umanu no mos violasaun direitus umanus. Nune’e, FM hakarak atu estimula debate públiku kona-ba asuntu importante ne’e, no mos fornese sujestaun balun hodi aumenta apoiu ba vítima atuál no potensiál sira, ne’ebé sofre tanba tráfiku umanu no violasaun direitu umanu relasiona ho ida ne’e.
Bareira bo’ot ida ne’ebé hafraku luta kontra tráfiku umanu maka falta kapasidade polísia nian relasiona ho área ne’e. PNTL menus rekursu umanu, tékniku no finanseiru hodi detekta no prevene atividade tráfiku ho efetívu. Aleinde ne’e, Governu seidauk prioritiza tráfiku umanu, tanba ne’e seidauk aloka rekursu ne’ebé sufisiente hodi apoia vítima sira no hala’o programa edukatívu hodi hanorin povu kona-ba oinsá bele rekoñese no evita prátika no rede tráfiku umanu sira.
Kondisaun sosiál no ekonómika atuál iha Timor-Leste mos fasilita no insentivíza tráfiku umanu. Ezemplu ida maka falta kresimentu ekonómiku produtívu, entaun oportunidade servisu mos menus, tanba ne’e ema barak buka oportunidade iha li’ur. Ema barak falta edukasaun no koñesimentu báziku kona-ba direitu no lei, ne’ebé halo sira vulnerável liu ba tráfiku no esplorasaun. Integrasaun ekonómiku ne’ebé aselera ba beibeik, liu-liu Timor-Leste nia adezaun ba ASEAN, signifika ema barak sei kontinua buka oportunidade servisu iha nasaun viziñu sira. Tanba ne’e realidade maka ema balun sei sai vítima ba grupu kriminozu sira.
Tráfiku umanu internasionál sai preokupasaun bo’ot tebes. Au mezmu tempu, FM hanoin katak presiza rekoñese realidade katak tráfiku umanu barak akontese iha rai laran. Iha maioria kazu sira ne’e, vítima maka feto ne’ebé halo traballu doméstiku (servisu iha uma laran hanesan hamo’os, te’in), liu-liu feto klosan sira. Infelizmente prátika ne’e sosiedade la konsidera nu’udár “tráfiku umanu”. Maibé realidade maka feto barak ne’ebé mai husi familia ne’ebé ki’ak enfrenta situasaun ne’ebé ita bele konsidera nu’udár tráfiku. Família haruka sira ba servisu iha uma seluk, dala barak ho kondisaun ne’ebé bele konsidera esplorasaun no abuzu. Família promete atu selu saláriu, ajuda selu eskola ka suporta oan, to’o ikus apoiu la tuir promesa ka la iha totál. Maibé vítima nafatin obriga atu servisu maka’as, oras servisu naruk, no simu osan mínimu ka la simu osan. Dala barak sira enfrenta abuzu psikolójiku, fíziku no seksual, ou hahán ka toba fatin la adekuadu. Karik vítima hakarak halai sai husi uma, dala barak família ameasa sira. Nune’e ita bele konsidera feto sira ne’e kuaze hanesan prizoneiru, kondisaun ida ne’ebé vítima tráfiku umanu sempre hasoru.
Fatór sira deskreve iha leten kompleksu tebes, tanba ne’e atu rezolve kestaun tráfiku umanu internál no esternál ne’e presiza programa ne’ebé integradu no kompreensívu. Ida maka presiza haforsa kapasidade unidade PNTL relevante sira, liu-liu Unidade Ema Vulnerável (VPU). VPU nia servisu liga ho prevensaun no apoia vítima sira esensiál tebes, maibé sira nia rekursu menus. Presiza mos eduka públiku kona-ba tráfiku umanu, inklui tipu tráfiku, saida mak esplorasaun ema, direitus umanus, no padraun laboral (labour standards). Prátika traballu doméstiku ne’ebé envolve abuzu no violasaun direitus umanus no regulamentu laborál sira tuir lolos tenke konsidera hanesan tráfiku umanu. Tanba ne’e presiza halo diskusaun públiku kona-ba klasifikasaun no implikasaun legál liga ho prátika ne’e. Ida ne’e inklui diskusaun kona-ba oinsá bele harmoniza norma no prátika sósio-kulturál ho norma direitus umanus internasionál. Presiza mos eduka povu kona-ba tráfiku umanu no direitus umanus atu empodera vítima sira hodi hatene sira nia direitu no reziste kontra kualkér esplorasaun ne’ebé mai husi rede kriminál ka husi membru família rasik.
Agora dadaun, Timor-Leste enfrenta situasaun krítiku tebes iha luta kontra tráfiku umanu. Prátika ne’e eziste iha nível internasionál no mos iha rai laran, no seidauk iha asaun konkrétu hodi proteje ita nia povu vulnerável sira. FM husu Governu atu kapasita polísia, fo apoiu ba vítima sira, no hala’o diskusaun públika kona-ba asuntu tráfiku umanu. Nune’e ita bele komesa halakon krime grave ne’e no garante ema vulnerável sira nia futuru ne’ebé seguru. Fundasaun Mahein espera katak entidade estadu relevante sira sei servisu hamutuk ho sosiedade sivíl no doadór interasionál sira hodi kontra tráfiku umanu, no ami mos planu atu kontinua halo peskiza no advokasia liga ho asuntu ne’e.
