Foto: Fundasaun Mahein – Feto sira serbisu iha natar iha Munisipiu Maliana (07 Fevreiru 2026)
Relatóriu tuirmai ezamina feto sira-nia knaar iha rezolusaun konflitu nivel komunidade no harii dame iha Timor-Leste, foti husi entrevista kualitativu ho feto sira ne’ebé envolve ativamente iha jestaun disputa no mantein koezaun sosiál iha munisípiu Dili no Bobonaro. Ida-ne’e foka ba prátika informál no dala barak ladún rekoñese liuhusi ne’ebé feto sira kontribui ba pás no estabilidade iha nivel uma-kain no komunidade.
Deskobrimentu sira hatudu katak feto sira iha papél signifikativu no multifasetu iha harii dame no rezolusaun konflitu família no komunidade nian. Sira hetan bolu beibeik atu halo mediasaun ba disputa sira, partikularmente iha família sira nia laran, enkuantu mós serbisu atu prevene konflitu liuhusi rezolve ninia kauza subjasente sira. Sira-nia kontribuisaun iha ligasaun metin ho responsabilidade loroloron nian, inklui jere finansa uma-kain nian, apoia meius subsisténsia no mantein relasaun sosiál ne’ebé armonia.
Deskobrimentu sentrál ida maka katak feto sira-nia influénsia iha dame no estabilidade komunidade nian maka barak liu informál, relasionál no dala barak deliberadamente diskretu. Rezolusaun konflitu normalmente hala’o liuhosi diálogu privadu, negosiasaun no prezervasaun relasaun sira, envezde liuhosi mekanizmu formál ka públiku. Feto sira dala barak fó prioridade ba de-eskalasaun no armonia ba tempu naruk, partikularmente iha kazu sensivel sira iha ne’ebé espozisaun públiku bele hamosu moe ka konflitu liután.
Peskiza ida ne’e identifika empoderamentu ekonómiku hanesan dalan xave ida ne’ebé feto sira kontribui ba harii dame no prevensaun konflitu. Asesu ba bens ekonómiku hanesan kréditu, koñesimentu finanseiru no atividade negósiu ho eskala ki’ik esensiál ba hametin reziliénsia família nian, hamenus dependénsia no permite feto sira atu partisipa ho ativu liután iha foti desizaun.
Iha tempu hanesan, norma patriarkál sira kontinua limita feto sira-nia partisipasaun iha espasu sira foti desizaun formál nian, hodi rezulta iha padraun ida iha ne’ebé feto sira ezerse influénsia liuliu liuhosi kanál informál sira. Aleinde ne’e, maski iha ezisténsia hosi enkuadramentu legál sira no programa sira kona-ba igualdade jéneru, sira-ne’e dala barak ema haree hanesan orientadu hosi li’ur ka la iha ligasaun husi realidade lokál sira, ne’ebé lori iha kazu balu ba implementasaun tokenístiku.
Relatóriu ne’e argumenta katak padraun ida-ne’e reflete interasaun hosi dinámika luan rua ne’ebé iha abut iha Timor-Leste nia istória no kontestu sósiu-kulturál. Primeiru, prátika kontemporáneu sira jestaun konflitu nian hetan influénsia husi legadu rezisténsia klandestina nian, ne’ebé fó énfaze ba prátika informál, desentralizadu no bazeia ba konfiansa. Segundu, norma patriarkál sira forma oinsá prátika sira-ne’e espresa, iha ne’ebé autoridade formál konsentra iha mane sira-nia leet, enkuantu feto sira-nia kontribuisaun sira metin iha estrutura família no komunidade nian. Rezultadu maka forma ida hosi “poder subar”, iha ne’ebé feto sira hala’o papél sentrál ida hodi sustenta estabilidade sosiál lahó rekoñesimentu korrespondente iha sistema formál sira.
Relatóriu ne’e konklui katak harii dame no rezolusaun konflitu iha Timor-Leste labele kompriende tomak ka realiza liuhusi foku eskluzivu ba instituisaun formál sira, enkuadramentu legál sira ka intervensaun programátiku sira. Fundasaun Mahein mantein katak feto sira-nia papél informál reprezenta rekursu ida ne’ebé krítiku maibé ladún utiliza ba prevensaun konflitu no koezaun sosiál.
Atu asesu ba Sumariu Ezekutivu verzaun Tetun bele klik iha link iha kraik ne’e.
Komunikadu Imprensa (PDF)
Relatoriu Kompletu MNH 23 (PDF)
Fundasaun Mahein
Email: mahein2009@gmail.com
Telemovel: (+670) 75771766
Website: www.fundasaunmahein.org
