Saida Mak Mahein nia Kna’ar

Fundasaun Mahein nia misaun mak atu asiste hodi hasa’e lejitimidade no kapasidade husi Sektór seguransa Timor-Leste nian liuhosi partisipasaun sidadaun nian iha dezenvolvimentu ba lejizlasaun, polítika no orsamentu sira ne’ebé relevante.

Fundasaun Mahein fiar metin tebes katak solusaun ba problema sira ne’ebé hale’u Timor-Leste nia sektór seguransa ne’e haktuur iha partisipasaun ativa sidadaun nian husi populasaun Timor-Leste nian. by the Timoroan sira population. Ne’e-duni, ami buka atu tau asuntu krusiál sira kona-bá dezenvolvimentu sektorál nian ba iha diálogu polítiku. Ami nia objetivu mak atu fasilita partisipasaun polítika sosiedade Timor-Leste nian ba iha asuntu hirak-ne’e hodi fornese informasaun ne’ebé loloos no estuda didi’ak ona amutuk ho análize no rekomendasaun polítika nian sira, sira hirak-ne’e hotu ho intensaun atu provoka ideia, diskusaun no, ikus liu, partisipasaun polítika nian. Ami mós sei buka atu harii kapasidade husi Timor-Leste nia parlamentu, sosiedade sivíl no mós mídia kona-bá asuntu hirak-ne’e, hodi hametin prosesu polítika no mós asegura katak bele rona grupu hotu-hotu nia lian.

Ami fiar katak hodi kria espasu ida ba diálogu polítika kona-bá sektór seguransa nian sei rezulta iha dezenvolvimentu sektór seguransa nian ne’ebé signifikativu, konkretu no lejítimu iha nível nasionál nian, konkorda largamente tantu husi orgaun polítiku no mós sosiedade iha jerál. Lá’os deit katak dezenvolvimentu ne’e sei sai lejítimu esensialmente, maibé ne’e mós sei sai nu’udár resposta ida ne’ebé mak kulturalmente apropriadu ba sosiedade Timor-Leste nia nesesidade reál ba seguransa nian. Nia sei harii lejitimidade no kredibilidade husi forsa seguransa nian nune’e mós hasa’e sira nia kapasidade atu trata adekuadamante ho ameasa sira ba seguransa nian no mós problema sira ne’ebé mak ohin loron Timor-Leste enfrenta.

Ami fiar katak diálogu ida-ne’e bele no sei hetan ajuda no apoiu husi komunidade internasionál nian. Maibé, maski ami simu ajudu ne’e, ami fiar metin tebes katak komunidade internasionál nian sei la kontrola ka diriji konversa ida-ne’e.

Objectivu Mahein

Objetivu 1 – Kria Espasu Polítiku. Atu kria no habelar espasu ba debate, diskusaun, no mós partisipasaun iha asuntu sira ne’ebé relasionadu ho supervizaun no jestaun sivíl nian ba iha sektór seguransa.

Aktividade . Fundasaun Mahein sei prodús relatóriu no komentáriu sira kona-bá polítika, lejizlasaun no orsamentu sira ne’ebé asosiadu ho sektór seguransa nian. Relatóriu hirak-ne’e sei varia husi publikasaun blog sira ne’ebé badak no naruk no mós artigu opiniaun nian sira ne’ebé kle’an liután, nu entantu regra fundamentál husi publikasaun hirak-ne’e nian mak katak sira hirak-ne’e sei peskizadu no hakerek rasik husi ema Timoroan sira. Ami sei publika ativamente ami nia relatóriu sira no mós tópiku sira ne’ebé asosiadu iha imprensa Timór nian no liuhosi komunikasaun sosiál, hodi hasa’e konxiénsia públiku nian kona-bá relatóriu ne’e no mós problema sira ne’ebé asosiadu.

Rezultadu . Hodi hasa’e konxiénsia kona-bá asuntu fundamentál sira relasionadu ho sektór seguransa nian, alende fornese informasaun no análize, ami sei permite sosiedade Timor-Leste nian atu involve iha debate polítika kona-bá tópiku hirak-ne’e. Ida-ne’e sei rezulta iha polítika seguransa nian ne’ebé mak simu largamente no mós relevante ba nesesidade populasaun sira nian no hodi nune’e intrínsekamente lejítimu. Sektór seguransa nian ida ne’ebé lejítimu sei hametin Timor-Leste nia estabilidade polítika no sosiál nian no mós reforsa prosesu dezenvolvimentu nian sira iha rai-laran.

Objetivu 2 – Kria Arkivu Informasaun nian ida. Atu fornese repozitóriu púbiku ida ba informasaun no análize kona-bá sektór seguransa nian.

Aktividade. Fundasaun Mahein sei kria website ida ne’ebé, iha adisaun ba atua nu’udár plataforma ida ba materiál ne’ebé mak Fundasaun Mahein prodús ona, mós sei rai relatóriu sira, surat-tahan no artigu jornál nian sira ne’ebé dijitalizada ona ne’ebé mak relevante ho sektór seguransa nian (hodi tau iha konsiderasaun kestaun sira kona-bá direitus autorál nian).

Rezultadu. Hodi fornese arkivu ida hanesan ne’e, Fundasaun Mahein sei hamoris peskiza kona-bá Timor-Leste nia sektór seguransa, iha partikulár peskiza husi sidadaun Timoroan sira ne’ebé mak karik laiha asesu ba peskizadór internasionál sira nia rekursu. Hodi hamoris peskiza ne’e, ami hamoris lian sira iha Timor-Leste nia prosesu demokrátiku no ikusliu, hametin lejitimidade no efetividade husi sektór seguransa nian.

Objetivu 3 – Haberan Sosiedade Sivíl. Atu asiste hodi hametin kapasidade sosiedade sivíl nian atu habelar partisipasaun sidadaun nian kona-bá asuntu sira ne’ebé relasionadu ho sektór seguransa nian – nune’e hasa’e sektór ne’e nia lejitimidade no mós ninia kapasidade atu haree ba rekezitu sira husi seguransa no protesaun ba sidadaun Timoroan sira.

Aktividade. Bainhira oportuindade finansiamentu nian permite, Fundasaun Mahein sei fó treinamentu kona-bá dezenvolvimentu sektór seguransa nian ba aktór sosiedade sivíl sira seluk. Tuir fali, ami nia organizasaun sei prontu atu fó informasaun no konsellu kona-bá sektór seguransa nian ba kolega sira husi organizasaun sira seluk. Iha prazu naruk nia laran, Fundasaun Mahein hein atu estabelese rede sosiedade sivíl nian ida ba sektór seguransa nian iha Timor-Leste nia laran.

Rezultadu. Hodi fó kapasitasaun ba sosiedade sivíl ho maneira ida-ne’e, Fundasaun Mahein sei hamoris lian alternativa sira iha debate kona-bá sektór seguransa nian, lian sira ne’ebé mak sei sai reprezentantivu liután ba grupu sira ne’ebé espesífiku hanesan feto, labarik ka komunidade rural sira. Hodi hamoris lian hirak-ne’e atu hola parte iha debate polítika kona-bá sektór seguransa nian, ami dezenvolve debate ne’e no asegura katak sosiedade Timoroan sira iha ninia totalidade sai servidu husi sektór seguransa nian. Hanesan ho ami nia atividade sira seluk, ida-ne’e sei hasa’e efetividade no lejitimidade husi sektór seguransa nian iha komunidade nia matan, hametin estabilidade no dezenvolvimentu.

Ami hamriik iha ne’ebé?

Fundasaun Mahein ne’e apolítiku no buka atu haree ba iha prosesu polítiku ne’ebé demokrátiku hodi fó solusaun sira ne’ebé duradouru ba problema sira husi sektór seguransa nian. Nu entantu, ami iha pozisaun lima ne’ebé forte:

1. Supremasia Sivíl nian. Forsa seguransa sira eziste atu serbí povu Timor-Leste nia hakarak, ne’ebé mak espresa liuhosi governu Timor-Leste nian ne’ebé mak eleitu demokrátikamente. Ne’e nu’udár sektór seguransa nia devér atu halo tuir orden legál no polítika sira hotu husi ezekutivu sivíl nian.

2. Estadu de Direitu. Fundasaun Mahein fiar katak laiha ema ida iha Timor-Leste mak iha impunidade ba sira nia asaun sira. Sidadaun hotu-hotu, liuliu sira hirak ne’ebé mak iha sektór seguransa nia laran, sei hakruuk ba estadu de direitu.

3. Polítika Seguransa Nasionál nian. Ami husu ba governu atu publika Polítika Seguransa Nasionál ba Timor-Leste nian, ne’ebé sei inklui lista ida husi tarefa sira ne’ebé rekeridu husi sektór seguransa nian hodi responde ba ameasa espesífiku sira ka rekezitu sira seluk. Dokumentu ida-ne’e sei permite diskusaun polítika ida ne’ebé nakloke kona-bá seguransa no problema sira sektór seguransa nian iha Timor-Leste.

4. Alokasaun Rekursu nian. Fundasaun Mahein fiar katak aprovizionamentu, tripulasaun, polítika no orsamentu ba defeza no seguransa nian ne’e tenke apropriadu ba tarefa sira ne’ebé rekeridu husi sektór seguransa nian.

5. Profisionalizmu no Disiplina. Instituisaun seguransa nian sira iha devér sagradu ida atu haree ba protesaun no segurasan povu Timor-Leste nian. Ita hein atu hetan estandarte profisionalizmu no disiplina nian ne’ebé aas tebes husi sira.