Foto: facebook PNTL (Agusto 2026)
Krime transnasionál hamosu ameasa sériu ida ba seguransa no estabilidade globál, ne’ebé ezije nasaun hotu-hotu atu hamutuk iha esforsu koordenada ida hodi kombate fenomena ne’e. Hare ba realidade ida-ne’e, Fundasaun Mahein (FM) husu ba estadu Timor-Leste tenke reforsa ninia sistema legál, institusionál, no operasionál sira hodi bele detekta, investiga, no prosesa ho nia efetivu boot atu buka tuir autór prinsipál sira husi atividade transnasionál iha territóriu nasional.
FM tenta analiza ba Primeiru-Ministru Xanana Gusmão nia deklarasaun “zero toleránsia,” ne’ebé orienta liu ba resposta preventiva duké resposta reativa. Perguntas maka deklarasaun zero toleransia ne’e sai duni estadu emerjensia ida hanesan responta sedu nian ba invasaun scam call center ka resposta reativa? Resposta reativa normalmente foin intervém depois krime akontese ona, hanesan iha kazu scamming centers, ne’ebé fokus liu ba rezolve problema ne’ebé mosu tiha ona. Enkuantu importante, aprosimasaun preventiva mak bele evita krime atu la akontese husi inísiu. FM husu ba estadu atu dezena mapamentu resposta preventiva sedu hasoru krime ida transnasional.
Zero Toleránsia no Scamming Online iha Timor-Leste
Iha artigu ida-ne’e, FM hakarak diskute implementasaun polítika zero toleránsia ne’ebé presiza kontribuisaun integrada husi instituisaun hotu-hotu ne’ebé iha responsabilidade ba seguransa no aplikasaun lei, hanesan Polísia Nasionál Timor-Leste (PNTL), Polísia Investigasaun Sientífika no Criminál (PCIC) Alfándega: Autoridade Nasionál ba Alfándega, Autoridade Nasionál ba Comunikasaun ( ANC), Negósiu Rejistrasaun no Serbisu Verifikasaun: Servisu Verifikasaun no Negósiu Institutu Públiku (SERVE), Setór Judisiál: Sistema tribunál, juis, prokuradór, no defensór públiku ne’ebé hala’o justisa. Kolaborasaun interinstitusionál importante tebes atu prevene, deteta, no fó resposta efetiva ba krime organizadu transnasionál.
FM nia analiza katak deklarasaun kona-ba zero toleránsia ba krime transnasionál laos hanesan asaun ordinária ida, maibé presiza trata hanesan medida emerjénsia no extraordinária. Ho ida ne’e, instituisaun sira tenke transforma sira-nia atuasaun kontra krime transnasionál, liuliu scam call center sira, iha aprosimasaun ne’ebé rigorozu no emerjénsia.
Scam call center konsidera hanesan extraordinary crime tanba nia natureza kompleksu, organizada, estruturada, no iha impaktu boot ba seguransa nasional no estabilidade estadu nian. Tanba ne’e, tratamentu jurídiku no operasionál ba krime sira ne’e tenke mos iha karakter extraordináriu, la bele uza deit mekanismu ordináriu.
FM konsidera katak iha prátika atual, autoridade seguransa halo ona operasaun intensivu, maibé apoiu husi orgaun judisiáriu seidauk hatudu konsisténsia no sinerjia ne’ebé sufisiente atu suporta esforsu autoridade seguransa nian. Tuir prinsípiu zero toleránsia, implementasaun lei labele limita deit ba interpretasaun normativu, maibé presiza orienta ba lei progresivu, liuhusi aplikasaun konseitu kategoria imperativu, inklui emergency law no emergency rules bainhira situasaun justifika atu proteje interese públiku no seguransa nasional.
Iha kontestu ida-ne’e, tribunal labele konsentra deit ba Due Process Model, maibé tenke konsidera mos Crime Control Model, ne’ebé fó prioridade ba efisiénsia iha kontrolu no halo erradikasaun ba krime, ho baze ba konviksaun jurídika forte, evidénsia sufisiente, no respeitu ba prinsipiu estadu de direitu. Ho ida-ne’e, FM emfaze katak ba autór sira ne’ebé envolve iha krime organizadu transnasionál, resposta estadu nian la bele limita deit ba medida kausaun hanesan TIR, proibisaun ausénsia, ka multa, bainhira lei permite no prosedimentu legal aplikável.
Modus Operandi Foun
Depois de autoridade polísia halo ona investigasaun no aplika medida koasaun hanesan Apresentasaun Periódika, TIR, Ausência Provisional, no multa, suspeitu balun sidauk hetan detensaun no kontínua livre iha komunidade nia let durante prosesu legal.
Bazeia ba observasaun FM nian, grupu sira ne’e adapta ona sira nia modus operandi foun atu evita deteksaun. Sira la hanesan modelu anterior ne’ebé hala’o atividade iha fatin ida ho grupu boot, maibé agora fahe membru ba grupu ki’ik, normalidade entre ema nain rua to’o nain tolu.
Sira mos uza hotel, apartamentu, kos-kosan, no alojamentu temporáriu hanesan baze operasional atu hala’o scamming call center. Mudansa ida ne’e hatudu tentativa atu kontinua atividade kriminal ho forma disimulada / terselubung, no presiza haforsa intelijénsia, monitorizasaun, koordenasaun interinstitusionál, no avaliasaun periódika ba medidas seguransa.
Papél Institusionál ba Prevensaun
Deskobrementu kona-ba operasaun scam online organizadu iha Timor-Leste tenke hare hanesan asuntu ne’ebé iha implikasaun boot ba seguransa nasional, no merese halo avaliasaun kle’an kona-ba kapasidade prevensaun no koordenasaun entre instituisaun estadu nian.
Rede krime scam call center, bainhira estabelese, la mosu iha loron ida ka rua nia laran. Atu opera, normalmente presiza internet, ekipamentu komunikasaun, SIM card, kanal finanseiru, edifísiu ka uma, traballadór estranjeiru, rejistu empreza, no liberdade movimentu. Atu to’o fatin ka edifisiu sira, presiza ema lokal ne’ebé fasilita traballadór estranjeiru husi aeroportu ka fatin entrada nasaun nian, transporte ba área ikus nian, buka uma / apartementu / hotel hodi aluga, no prepara ekipamentu sira seluk. Ida-ne’e hatudu katak importante atu avalia se iha fragilidade ruma iha sistema regulasaun, fiskalizasaun, no koordenasaun institusionál.
Tuir mai, FM nia intensaun atu ezamina papél instituisaun hotu-hotu ne’ebé envolve iha fiskalizasaun sistema, regulasaun, no koordenasaun setór seguransa Timor-Leste nian. Objetivu mak atu determina karik instituisaun sira foka ona ba medida preventiva sira, atu atende risku sira molok atividade krime sira aumenta, ka responde ona ho reativu hafoin kestaun seguransa mosu. Bazeia ba avaliasaun ida-ne’e, FM sei avalia dezempeñu no rekomendasaun sira ba kada instituisaun ida-idak tuir deskobrimentu diagnostika tuir mai:
- ANC no MTC
Autoridade Nasional Komunikasaun (ANC) no Ministériu Transporte no Komunikasaun tenke hametin fiskalizasaun ba servisu telekomunikasaun. Lisensiamentu ba teknolojia foun sira hanesan Starlink mak inísiu deit; sistema sira ne’ebé metin ba rejistu terminal, verifikasaun utilizadór, kontrolu instalasaun, supervizaun revendedór, no monitorizasaun ba utilizasaun ne’ebé la baibain tenke iha.
Sira nia regra sira ezije monitorizasaun kontínua hafoin lisensiamentu no kumprimentu rigorozu, ho podér sira atu suspende ka kansela autorizasaun no impoin sansaun. Aproximação zero-toleránsia ida ne’e hakarak prevene krime organizadu atu esplora infraestrutura telekomunikasaun hodi habelar konetividade.
Iha paralelu, FM rekomenda ba Ministériu Transporte no Komunikasaun halo ezersisu kontrolu ba movimentu jet privadu tama no sai liuhusi Aeroportu Internasionál Presidente Nicolau Lobato, ne’ebé nia na’in no fiskaliza liuhusi autoridade aviasaun sivíl. Pasajeiru hotu-hotu tenke rejista liuhusi e-deklarasaun obrigatória no prosedimentu imigrasaun nian, atu fó ba Ministériu no ajénsia relevante sira rejistu verifikadu kona-ba sé mak tama iha Timor-Leste liuhusi aviaun.
- Servisu Imigrasaun
Autoridade Imigrasaun tenke asegura katak entrada no permanénsia estranjeiru sira tuir lei no objetivu vistu nian. Monitorizasaun efetivu ba kondisaun vistu importante atu prevene utilizasaun sala husi sistema imigrasaun.
Autoridade Imigrasaun sira tenke impoin restrisaun sira ba fatin tama nasaun Timor-Leste nian ba sidadaun sira husi nasaun ne’ebé nia sidadaun nasional sira envolve liuliu iha atividade scammer nian, tuir avaliasaun risku. Molok hetan lisensa atu tama, ema sira tenke iha sponsor ne’ebé verifikadu. Autoridade sira tenke monitoriza sponsor sira ne’e atu asegura katak vizitante sira ne’ebé tama la envolve iha atividade kriminozu, inklui scam ka forma seluk husi krime transnasionál.
Servisu Imigrasaun tenke halo avaliasaun ba ajénsia privada hotu-hotu no broker sira ne’ebé envolve iha prosesamentu vistu, tuir aplikável, hodi garante katak sidadaun estranjeiru sira la hetan admisaun iha Timor-Leste ho objetivu atu hala’o atividade ilegál. Ba sidadaun husi nasaun hirak ne’ebé temi ona no iha ona iha Timor-Leste, autoridade migrasaun tenke kompila rejistu ida no halo verifikasaun regulár ba sira nia atividade hodi konfirma katak sira la envolve iha konduta ilísitu. Imigrasaun tenke aplika medida sira ne’e ho protokolu rigorozu no provizaun emerjénsia nian.
- Servisu Alfândega
Servisu Alfândega tenke hametin kontrolu ba importasaun no sirkulasaun ekipamentu komunikasaun, inklui terminal Starlink, router, komputadór, kartaun SIM, no dispozitivu dijitál sira seluk. Ida-ne’e implika inspesaun rigorozu, verifikasaun ba utilizadór finál, no dokumentasaun iha pontu entrada hotu-hotu hodi asegura katak ekipamentu sira la desvia ba objetivu ilísitu.
Avaliasaun risku ba importasaun barak importante atu identifika padraun ne’ebé bele indika kontrabandu, revenda la autorizadu, ka utilizasaun hosi atór ne’ebé la’ós estadu nian. Iha situasaun emerjénsia ka tuir polítika zero-toleránsia, kontrolu sira ne’e tenke aplika ho rigorozu liu. Ofisiál alfândega sira tenke hetan kbiit atu detein karregamentu suspeitu, koordena besik ho ajénsia intelijénsia no aplikasaun lei, no fó sansaun imediata ba violadór.
- SERVE, I.P.
Iha kondisaun emerjénsia ne’ebé regula husi regra zero-toleránsia, autoridade SERVE I.P. rejistu komersiál no lisensiamentu tenke aplika padraun verifikasaun no aplikasaun ne’ebé rigorozu liu atu prevene abuzu husi rejistu negósiu. Ne’e signifika katak la iha empreza ida ne’ebé bele rejista, renova, ka hetan lisensa atu opera exetu nia identidade legál klaru, propriedade benefisiária verifikadu, atividade ekonómika lejítima, fatin operasionál ne’ebé konfirmadu, lista kompletu traballadór sira, no pontu responsabilidade legál ida ne’ebé komprometidu.
Inkonsisténsia, dokumentu ne’ebé falta, propriedade anónimu, ka fatin falsu tenke hamosu suspensaun imediata ba aplikasaun ka lisensa ezistente, ho investigasaun lalais no referénsia kriminál potensiál bainhira deskonfia fraude ka finansiamentu ilísitu. Rejistu komersiál la bele sai mekanizmu ida liuhusi ne’ebé atividade ilegál bele subar, liuliu iha emerjénsia sira bainhira risku ba brankeamentu kapitál, hases-an husi selu impostu, kontrabandu, ka komérsiu ilísitu aumenta.
Atu aplika ida-ne’e, SERVE tenke ezije atualizasaun periódika kona-ba dadus propriedade no direasaun, halo verifikasaun kruzada ba rejistu sira hasoru baze dados impostu, seguransa sosiál, traballu, no aplikasaun lei. Kompañia sira ne’ebé la konsege mantein rejistu loloos no atualizadu tenke hasoru revogasaun lisensa imediata no asaun koordenada ho servisu intelijénsia finanseira no akuzasaun nian.
- PNTL no Servisu Intelijénsia
Servisu Intelijénsia Nasionál Estratéjika (SNIE), Servisu Informasaun Polísia (SIP), no Servisu Informasaun Militar (SIM) tenke muda husi postura reativa ba ida ne’ebé fó prioridade ba intelijénsia preventiva no alerta antesipada. FM husu para SNIE kria sentru funsaun nasionál sira, rede aplikasaun lei rejionál no internasionál sira, no mekanizmu fahe dadus espesializadu sira ne’ebé integra intelijénsia sinál sira (SIGINT), intelijénsia umana (HUMINT), no intelijénsia open-source (OSINT).
Enkuantu operasaun kapturasaun sai nafatin instrumentu nesesáriu atu desmantela rede kriminoza ativu sira, estratéjia ne’ebé efetivu liu iha kontestu Timor-Leste mak atu deteta no perturba rede sira ne’e molok sira bele dezenvolve-an iha komunidade.
FM rekomenda ba SNIE atu lidera iha análiza estratéjiku ba ameasas no deteksaun ho alerta sedu nudar mekanismu preventiva intelijénsia. Enkuantu PNTL no F-FDTL foka ba intelijénsia bazeia ba komunidade no intervensaun lalais tuir enkuadramentu legál ne’ebé klaru ne’ebé distinge seguransa interna husi papél defeza nasional.
Koordenasaun iha Emerjénsia
Iha emerjénsia hanesan funu kontra krime organizadu ka krize orden públika nian, koordenasaun tenke funsiona tuir funsaun ida ne’ebé klaru iha Ministériu Interiór nia okos, ne’ebé bele sai Koordenadór Nasionál Operasaun nian (KNO), no bele ativa Gabinete entre Ministerial Jestaun Krize nian ne’ebé prezide husi Primeiru-Ministru ka delegasaun ruma. KNO sei fó resposta multi-setoriál, SNIE sei jere informasaun, PNTL no PCIC sei ezekuta operasaun konjunta no komunikasaun públika, enkuantu F-FDTL fornese apoiu tuir mekanizmu komandu-no-kontrolu bainhira situasaun ultrapasa polísia ho PCIC nia kapasidade. Parlemento Nasional Komisaun B halo nia fiskalizasaun ba kordenasaun sira ne’ebe implementa iha situasaun emerjensia.
FM suporta tebes katak aprosimasaun toleránsia zero ba scammers, krime organizadu, no abuzu autoridade nian ezije instituisaun sira hotu atu funsiona tuir padraun unifikadu responsabilizasaun no interoperabilidade. Operasaun hotu-hotu tenke dokumenta, sujeita ba fiskalizasaun independente, no alinha ho Timor-Leste nia garantia konstitusionál no kompromisu ba estadu direitu.
- Banku no Unidade Intelijénsia Finanseira
Iha prátika, responsabilidade prinsipál fahe entre instituisaun sira: Unidade Intelijénsia Finanseira (UIF) no banku sira monitoriza movimentu suspeitu, transferénsia boot, tranzaksaun kripto, no atividade komersiál ne’ebé ladún normal tuir Lei Anti-Brankeamentu Kapitál no padraun internasionál sira hanesan Financial Action Task Force (FATF), INTERPOL, no United Nations Office on Drugs and Crime (UNTOC).
Iha situasaun emerjénsia, Governu bele ativa medida espesiál hanesan konjelamentu konta, suspensaun tranzasaun, no kooperasaun lalais ho polísia internasionál, maibé sempre ezije baze legál no respeitu ba direitu ba defeza, privasidade, no procesu lolos. PNTL/PCIC, Ministériu Públiku, no tribunál sira asegura investigasaun, akuzasaun, no sentensa, enkuantu Ministériu Interiór no Justisa koordena operasaun nasionál no kooperasaun rejionál.
- Setór Justisa no Parlementu Nasionál
Timor-Leste nia enkuadramentu legál atual seidauk reflete tomak realidade krime sibernétiku, liuliu ofensa dijitál sira ne’ebé atravessa fronteira sira. Preokupasaun prinsipál mak falta lei ida ne’ebé dedikadu no klaru kona-ba krime sibernétiku no evidénsia eletroniku, ne’ebé halo susar atu maneja investigasaun dijitál, prezerva evidénsia, no koopera ho instituisaun estranjeiru sira.
FM husu Parlementu Nasional atu aseleira no promulga esbosu lei krime sibernétiku hodi haforsa sistema seguransa nasional. Lei sira ne’ebé eziste sei la sufisiente, tanba presiza protesaun legál no prosedimentu operasionál sira ne’ebé forte liu, hamutuk ho kapasitasaun ba polísia, prokuradór, juis, no instituisaun sira seluk atu komprende no responde diak liu ba krime sibernétiku no evidénsia dijitál.
- Autoridade Munisipál, Proprietáriu Imóvel no Lideransa Komunitária
Autoridade lokal no membru komunidade sira iha papél vital ida atu relata atividade ne’ebé ladún normal, enkuantu respeita direitu no prosedimentu legál sira. Líder komunitáriu no Ofisial Polisia Suku (OPS) sira tenke pro-ativamente edukar rezidente sira kona-ba scam no aluga uma iha Dili, atu komunidade iha bairu-bairu laran hetan avizu no preokupasaun.
Bainhira sidadaun estranjeiru sira aluga uma ho grupu, prosesu ne’e tenke envolve xefe suku no xefe aldeia sira, no OPS tenke simu notifkasaun atu prevene rezidénsia estranjeiru ne’ebé la autorizadu iha área lokál. Liuhusi medida sira ne’e, komunidade bele atua proativamente atu blokea espasu ba krime organizadu, hanesan scam call center.
Dezafiu Boot
Dezafiu boot ida ne’ebé estraga funsionamentu institusaun estadu nian mak falta koordenasaun entre instituisaun sira. Bainhira ajénsia sira hala’o operasaun la integradu iha komando ida nia kompetensia no la konsege fahe informasaun ba malu, sira kria lakuna ne’ebé rede kriminozu sira bele esplora atu hala’o atividade ilegál.
Atu kontra ida-ne’e, prinsípiu zero toleránsia tenke traduz ba implementasaun polítika ne’ebé agresivu no unifikadu. Instituisaun seguransa hotu-hotu tenke alinha sira-nia asaun no serbisu hamutuk hodi proativamente desmantela sindikatu krime organizadu sira.
Perguntas Investigasaun no Pontos Kritiku
Durante períodu ne’e, mosu problema sériu lubuk ida, hahú husi desmantelamentu estrutura sira iha Oecusse to’o sira iha Dili. Hanesan resposta, FM sublina ona importánsia atu hala’o investigasaun ida ne’ebé independente no transparente. Investigasaun hanesan ne’e esensiál atu hametin instituisaun, reforsa sistema jerál, no prevene fallansu hanesan iha futuru.
FM husu investigasaun ne’e atu foka ba área sira tuir mai:
- Sé mak autoriza no rejista empreza sira ne’ebé envolve?
- Sé mak importa no rejista ekipamentu telekomunikasaun sira?
- Sé mak responsbel ba utilizasaun terminal Starlink sira?
- Vistu saida mak fó no ba finalidade saida?
- Imóvel saida mak utiliza?
- Kanal finanseiru no banku saida mak utiliza?
- Instituisaun saida mak simu sinais alerta, se iha?
- Tanbasá asaun la-atende sedu, karik iha sinais sufisiente?
- Iha falha institusionál ka individual ruma ne’ebé presiza responsabilizasaun tuir rezultadu investigasaun?
FM observa katak asuntu ne’e presiza tratamentu ho transparénsia, responsabilidade institusionál, no respeitu ba estadu. Prosesu nakloke no mekanizmu responsabilizasaun ne’ebé klaru importante liu atu asegura katak dezisaun sira halo tuir interese públiku no katak autór hotu-hotu komprende sira nia papél no obrigasaun.
Iha tempu hanesan, salvaguarda integridade instituisaun estadu nian ezije katak asaun sira hetan orientasaun husi lei, étika profisionál, no kompromisu ba konfiansa públiku. Hodi kaer metin prinsípiu sira-ne’e, parte interligadu sira bele kontribui ba rezultadu sira ne’ebé kredível liu no hametin konfiansa iha Timor-Leste nia reforma governasaun no setór seguransa nian.
Konklusaun
Krime organizadu transnasionál iha Timor-Leste presiza resposta preventiva, integrada, no extraordinária, laos deit resposta depois krime akontese ona. FM defende katak susesu kontra scam call centers depende ba koordenasaun forte entre instituisaun seguransa nian hanesan Parlementu Nacional, PNTL, Imigrasaun, SNIE, PCIC, Alfândega, telecomunikasaun, justisa, setor finansieru, no autoridade lokal, ho baze legal klaru no responsabilizasaun institusionál.
Iha kontekstu funu kontra transnational no haforsa institusaun estadu nian, FM husu ba PM katak, deklarasaun politika zero-toleransia aplika para sai zero problema. Ho ida ne’e FM haforsa atu inpoin iha mekanizmu estadu nian hodi sai nudar poder polítika legal no lejitimu ne’ebé bele mobiliza instituisaun estadu nian ho estadu nia naran, se lae, deklarasaun polítika sira hanesan ne’e, sai de’it deklarasaun sira husi mídia ne’ebé laiha todan polítika lolos.
