Source: httpwww.tatoli.tlwp-contentuploads201908IMG_7260a.jpg
Foin daudauk ne’e Deputadu sira iha Parlamentu Nasional kestiona membru balu husi PNTL halo juramentu ba partidu politiku. Nomos intervensaun husi Xefe Estadu Maior Jeneral F-FDTL Major Jeneral Lere Anan Timur nian iha media kona-bá “membru F-FDTL bele halo juramentu ba partidu polítiku importante leal nafatin ba institusaun” (GMN, 14 Jullu 2020). Kestaun sira nune’e tenke kestiona no hetan kontrolu husi públiku – no ida ne’e kna’ar importante husi Parlamentu Nasional hodi superviziona lala’ok sira setor seguransa nian. Hodi nune’e PNTL no F-FDTL atua tuir deit misaun no kompetensia sira ne’ebé Konstitusaun no Lei sira atribui ba institusaun rua ne’e.
Saida maka Konstitusaun no Lei sira hatete kona-bá F-FDTL no PNTL ho atividade sira polítika ka partidu polítika?
Konstitusaun RDTL artigu 146 n.o 3 hatete F-FDTL labele iha partidu polítiku no rona de’it ba orgaun soberanu kompetente sira, tuir Konstitusaun no Lei sira, no sira labele halo intervensaun polítiku naran ida. Dispozisaun temi liu daudauk ne’e fó momos iha n.o 2 no 3 artigu 1 Lei Organika F-FDTL 2006 nian, ne’ebé hatete F-FDTL apartidaria no elementu F-FDTL nian, iha kualker grau ka kategoria, labele partisipa direta ka indereta, iha atividade polítika sira. Regula mos iha n.o 1 artigu 20 husi Estatutu Militar F-FDTL 2014 no halo alterasaun dahuluk iha 2016 hatete militar sira goja direitu hotu-hotu, liberdade no garantia fundamental tomak, hanesan sidadaun sira seluk maibe exersisu ba direitu no liberdade sira balun limita iha Konstitusaun nia laran.
Ba PNTL, Konstitusaun RDTL artigu 147 hatete polísia defende legalidade demokrátika no garante sidadaun sira nia seguransa interna, no labele iha partidu polítiku. Nune’e mos Lei Orgânika PNTL 2009 nian katak PNTL apartidária ka independente no hala’o nia kna’ar esklusiva ba Estadu. Buat sira nune’e nu’udar dever ida (dever imparsialidade) no atuasaun hotu-hotu tenke hala’o tuir Konstitusaun no Lei sira ne’ebé regula iha Regulamentu Disiplinar PNTL nian.
Tamba ne’e, membru sira husi PNTL no F-FDTL labele goja direitu, liberdade no garantia fundamental tomak hanesan sidadaun bain-bain. Ida ne’e atu evita no labele repeta-tan hahalok sira iha pasadu, hanesan rekomenda tiha ona iha Rekomendasaun Chega! Forsa seguransa no defeza husi nivel hotu-hotu labele halo parte iha funsaun moris polítika nian ka negosiu no tenke simu deit orden husi institusaun Estadu nian ne’ebé legalmente autorizadu. Katak forsa seguransa no defeza Timor-Leste nian labele repete fila-fali prâtika sira militar Indonézia (ABRI) nian iha tempu pasadu ne’ebé goja privelejiu iha asuntu sira polítika no hanesan klase sosial ketak ida a’as liu Lei no norma sosial sira nia leten.
Ikus liu Fundasaun Mahein (FM) rekomenda ba ulun boot sira PNTL no F-FDTL nian atua nafatin tuir Konstitusaun no Lei sira no impoin ba membru sira husi institusaun rua ne’e nian tenke kumpri, nu’udar dever ida iha kna’ar sira forsa seguransa no defeza nian.
