Sosializasaun Droga, Trafiku Humanu, Asidente Trafiku No Papel Polísia Iha Sub-Distritu Fatululik No Fohorem

(Foto: Introdusaun husi Diretur Eskola Publiku Fatululik molok FM hala’o nia atividade)

Krime droga no trafiku humanu sai hanesan prekupasaun públiku, maibe to’o agora estudante no komunidade ne’ebé hela iha area rural barak mak seidauk hatene kona-bá krime droga no trafiku humanu. Situasaun henesan ne’e bele fo oportunidade ba trafikante sira atu bosok ka manipula komunidade no estudante sira iha area rural liu-liu komunidade ne’ebé besik fronteira atu monu lalais ba sira nia bosok.

Iha loron 16 no 19 fulan Outobru, Fundasaun Mahein (FM) halo sosializasaun iha Eskola Pre-sekundaria Públiku sentral Taroman, Sub-distritu Fatululik no eskola Sekundaria Jeral Públiku Nutetu Fohorem Distritu Cova Lima. Iha sosializasaun ne’e koalia kona-bá droga, trafiku humanu, asidente trafiku no papel polísia, objetivu husi sosializasaun ne’e mak atu fahe informasaun ba estudante sira iha area rural nune’e bele iha koñesimentu ba droga, trafiku humanu, asidente trafiku no serbisu Polísia Nasional Timor-Leste.

(Foto: FM halo introdusaun ba sosializasaun)

Tuir observasaun katak iha eskola Pre-sekundaria Públiku sentral Taroman maioria estudante seidauk hatene kona-bá droga, trafiku humanu no papel polisia. Kompara ho estudante Jeral Públiku Nutetu Fohorem sira hetan informasaun ituan kona-bá droga no tafiku humanu. Tanba ne’e professor no estudante sira kontenti ho atividade husi Fundasaun Mahein tanba fahe ona informasaun kona-bá saida mak droga, trafiku humanu, asidente trafiku no papel polísia.

(Foto: FM halo esplikasaun kona-ba droga, trafiku humanu, asidente trafiku no papel polisia)

Iha sosializasaun ne’e hetan partisipasaun husi Diretor eskola, mestri, mestra no estudante, maske ho kondisaun eskola ne’ebé menus fasilidade hanesan kadeira, meja no seluk tan, estudante sira entusias atu akompaña no rona. Administrador Sub-distritu Fatululik mos sujere ba FM atu fahe informasaun droga, trafiku humanu, asidente trafiku no papel polísia ba komunidade hotu iha Sub-distritu Fatululik tanba besik fronteira.

Atu hatene kle’an li’u kona-bá asuntu ne’e bele kontaktu:

Nélson Belo
Direktur Ezekutivu FM
E-mail: direktor.mahein@gmail.com
Web: www.fundasaunmahein.org
Telefone: (+670) 7831 6075 ka bele kontaktu (+670) 7756 1184