Fundasaun Mahein (FM), 15 Maiu 2020
Komunikadu Imprensa
Tuir artigu 25 Konstitusaun Repúblika Demokrátika Timor-Leste, estadu de-sítiu ka estadu de-emerjensia bele deklara “bainhira iha forsa estranjeira nia agresaun efetivu ka iminente, perturbasaun maka’as ka ameasa atu iha perturbasaun maka’as ba orden konstitusional demokrátika ka kalamidade públika”. Kazu atual, estadu de-emerjensia, deklara bainhira iha situasaun ne’ebé ladun grave (menus gravidade), liu-liu bainhira iha ka fó ameasa sei akontese kazu sira alterasaun grave ba orden públika ka kazu sira kalamidade públika. Coronavirus (Covid-19), nu’udar krize saúde públika no hamosu ameasa kalamidade públika. Iha situasaun ne’e, Timor-Leste deklara ona estadu de-emerjensia dahuluk hahu iha loron 28 Marsu no termina iha loron 26 Abril 2020 no halo ona renovasaun iha loron 28 Abril no sei ramata iha loron 26 Maiu 2020. Hanesan Governu hatete “deklarasaun estadu de-emerjensia hanesan meiu legal ne’ebé nesesariu atu asegura Governu interven lalais hodi prevene surtu Coronavirus foun mosu tan iha Timor-Leste, no karik surtu ne’e akontese duni, foti medida hirak ne’ebé presiza no adekuadu hodi kombate virus ne’e atu labele daet habelar”.
Iha âmbitu ezekusaun estadu de-emerjensia luta hasoru Covid-19, papel importante ida mos husi forsa seguransa sira nia servisu ka bain-bain bolu naran setor seguransa nian involvimentu iha krize saúde públika. Fundasaun Mahein (FM) nota mos lisaun sira husi krize ida ne’e no durante estadu de-emerjensia iha kontestu seguransa nasional.
Militar no forsa seguransa sira
FM louva ofisiais, sarjentu no ajente sira PNTL nia servisu maka’as. Liu-liu PNTL nian aproximasaun polisiamentu komunitariu ne’ebé vizibel tebes hanesan sosializa regra sira estadu de-emerjensia no enkoraja sidadaun sira hala’o tuir medida sira prevensaun ba Covid-19, patrullamentu iha fronteira terestre, munisipiu sira, dalan protokollu, iha bairu sira, iha fatin kuarentena, fatin izolamentu, ospital nasional no munisipiu sira, akompañia komunidade afetadu sira ne’ebé transporta husi fatin ida ba fatin seluk. Nune’e mos resposta sira iha âmbitu atuasaun polisial nian. Tatika polisiamentu komunitariu ne’ebé PNTL aplika susesu tebes no dada ema tomak nia apoiu maske iha mos kritika balun hasoru pesoal PNTL. Nune’e mos ba F-FDTL nia apoiu iha âmbitu seguransa interna nian no reforsa kontrolu sira iha fronteira terestre, hamutuk ho PNTL, forsa seguransa sira seluk, profesionais saúde sira no ajente sira seluk luta hasoru surtu Covid-19. Inklui kooperasaun servisu iha fronteira ho forsa seguransa Indonézia nian. Ida ne’e hatudu katak luta hasoru ameasa no risku sira luta ida integradu tuir Sistema Integradu Seguransa Nasional (SISN) ne’ebé hatuur iha Lei Seguransa Nasional 2010.
Maske nune’e, mosu mos deklarasaun balu husi ulun boot sira seguransa nian katak “sei tiru ema ne’ebé tama ilegal iha teriotoriu nasional bainhira la kumpri medida sira ezekusaun estadu de-emerjensia nian”. Keta haluha medida sira husi Dekretu Governu N.o 8/2020 loron 30 Abril Ezekusaun ba Estadu de-Emerjensia violasaun ba regra sira hanesan responsabilidade kriminal no bainhira ajente seguransa sira identifika ida ne’e halo deit partisipasaun ba Ministériu Públiku. Nune’e mos estadu de-emerjensia, direitu, liberdade no garantia sira suspende parsial deit no la afeta ba direitu ba moris, integridade fizika, tortura, tratamentu kruel no desumanu. Uza forsa no kilat tuir tenke hala’o tuir Dekretu Lei N.o 43/2011 loron 21 Setembru kona-bá Rejime Jurídiku Uzu Forsa nian.
Lisaun sira husi krize saúde públiku Covid-19 no estadu de-emerjensia
- Fortalesementu institusional
Sentru Integradu Jestaun ba Krize (SIJK) seidauk definidu iha Lei espesifiku ida hodi regula kona-bá ninia lalaok. Exemplu ida, bainhira deklara estadu de-emerjensia, mosu dezentedementu balu entre responsavel Ministériu Saúde nian ho SIJK. Dalaruma ita hanoin SIJK buat foun ida, los duni katak SIJK ita foin kuiñese bainhira ita deklara tiha estadu de-emerjensia luta hasoru Covid-19. Maibe SIJK definidu ona iha Lei Seguransa Nasional 2010 iha tinan sanulu liu ba no husi Lei ne’e ejiji SIJK tenke regula ho Lei espesifiku ida.
FM apresiza esforsu Governu nian ne’ebé lalais tebes finaliza dekretu lei ida kona-bá regulamentu ba SIJK durante estadu de-emerjensia, maske la ho konsulta ida kle’an. Portantu SIJK la funsiona deit iha tempu estadu de-emerjensia maibe funsiona mos iha situasaun sira normal.
2. Seguransa umanu
Menus ba ekipamentu no fasilidade saúde, rekursu umanu, menus ba produsaun agrikola, hamlaha no nesesidade esensial sira durante estadu de-emerjensia. Nune’e mos impase polítika ne’ebé la’o besik ona tinan tolu fó konsekunsia boot ba vida sosial no ekonomiku. Iha tempu hanesan Timor-Leste la iha mos Orsamentu Jeral Estadu no ita nia ekonomia ne’ebé depende deit ba osan husi mina rai nian no iha krize ida ne’e Timor-Leste sofre liu tanba mina rai nia folin tun maka’as los iha merkadu mundial.
Nune’e lisaun importante ba Timor-Leste maka tenke investe ba setor produtivu sira hanesan setor saúde, edukasaun, agrikultura nomos setor sira seluk ne’ebé fó osan ba ita ho sustentavel. Maibe presiza mos estabilidade polítika hodi garante investimentu sira ne’e.
3. Polítika seguransa nasional
Mundu ohin loron, ameasa no risku sira kompleksu tebes, la’os deit ameasa konvensional sira maibe ameasa la’os konvensional mos. Iha ne’e ita presiza haree ho luan no kle’an, no tau atuasaun mos husi komponente oin-oin ne’ebé hola parte iha sistema seguransa nasional nian. To’o ohin loron ita seidauk iha Polítika Seguransa Nasional hodi trata asuntu sira ne’ebé temi liu daudauk ne’e. Iha âmbitu ameasa no risku sira ba estabilidade nasional, ita la hatene ameasa no risku ba Timor-Leste ne’e saida no oinsa ninia atuasaun husi komponente sira militar no la’os militar.
Tamba ne’e, presiza Polítika Seguransa Nasional hanesan médiku ida hodi fó diagnosa lolos ameasa no risku sira ba Timor-Leste. Nune’e ninia atuasaun sira forma tuir atuasaun sira ne’ebé hatuur ona iha Lei Seguransa Nasional 2010 iha kuadru SISN katak atuasaun integradu no respeitu ba idak-idak nia autonomia, komplementaridade no uza rekursu ho efisiente.
Rekomendasaun
- Iha âmbitu atuasaun sira husi militar no forsa seguransa sira durante estadu de-emerjensia, FM enkoraja nafatin membru F-FDTL, PNTL no forsa seguransa sira seluk atua tuir regra no prosedementu sira no ho profesional no respeitu ba direitus umanus.
- Lisaun sira husi krize saúde públika Covid-19 no husi estadu de-emerjensia fó hatene mai ita katak ita tenke investe ba setor produtivu sira, no tenke iha estabilidade polítika mos. Nune’e atu hatan ba dezafiu global ne’ebé nasaun hotu-hotu hasoru, liu-liu Timor-Leste hasoru ameasa no risku sira tenke ho Polítika Seguransa Nasional ida.
Atu hetan informasaun kle’an liu kona-bá asuntu ne’e bele kontaktu:
João Almeida
Acting Director
Email: almeidamahein@gmail.com
Telemovel: (+670) 7756 1184 / 77103346
Website: www.fundasaunmahein.org
