Fundasaun Mahein hakerek beibeik dehan katak esensiál tebes ba estadu soberanu sira atu estabelese seguransa no kontrola fronteira, atu nune’e estadu bele responde ho efetívu ba ameasa oi-oin ba ben-estar públiku no seguransa nasionál. Dezde restaurasaun independénsia, Timor-Leste enfrenta dezafiu barak ne’ebé difikulta kontrola ita nia fronteira iha tasi no rai maran. Dezafiu sira ne’e liga ho limitasaun finanseiru ho rekursu umanu, fator polítiku, no kondisaun sosiál, kultural no ekonómiku ne’ebé komplexu tebes iha area fronteira nian. Problema ida fali maka responsabilidade ba kontrola fronteira seidauk hetan klarifikasaun, no linha fronteira rasik seidauk finaliza. Debate la’o hela kona-bá kolokasaun F-FDTL ba fronteira hodi troka PNTL. Artigu blog ida ne’e sumariza Fundasaun Mahein nia relatóriu foun kona-bá kolokasaun F-FDTL ba fronteira no nia implikasaun ba Timor-Leste nia seguransa fronteira.
Tuir Konstituisaun no Lei RDTL nian, PNTL ho F-FDTL nia papél diferente – PNTL maka responsável ba seguransa internal, no F-FDTL maka responsável ba defeza esterna. Maibé, nafatin iha kontradiksaun no inserteza kona-bá papél kada instituisaun seguransa nian liga ho polisiamentu no kontrola fronteira. Pur ezemplu, F-FDTL kontrola hela territória marítima, no Unidade Patrolamentu Fronteia (UPF) iha PNTL koloka iha fronteira rai maran. Maibé, UPF nia papél iha fronteira seidauk define liu husi desizaun ka Lei ruma ne’ebé mai husi Governu, maibé bazeia fali ba desizaun ne’ebé foti iha tempu ONU nian.
Foin dadauk, desizaun na’in sira diskute kestaun hasai UPF husi fronteira no troka ho F-FDTL hodi responde ba problema movimentu ilegál ema no sasán. Desizaun ne’e foti hafoin akontesimentu ba sidadaun Timor-oan deportadu husi Indonézia bainhira sira tuir eventu arte marsiais iha Atambua Indonezia. Hanesan FM hakerek iha momentu ne’ebá, konseitu kolokasaun F-FDTL ba fronteira ne’e liga diretamente ba F-FDTL nia misaun prinsipál maka garante integridade teritoriál no defende populasaun Timor-Leste husi ameasa esterna sira. Maske misaun ne’e hato’o klaramente iha Konstituisaun no Lei RDTL, seidauk iha kolokasaun permanente F-FDTL ba iha fronteira. Konstituisaun RDTL limita PNTL nia misaun ba defende legalidade demokrátiku no garante seguransa internal, ne’ebé repete fali iha Lei Organika PNTL nian. Maibé, Lei Organika mos mensiona PNTL nia responsabilidade ba seguransa fronteira, espesífiku fó apoiu ba F-FDTL no Servisu Migrasaun hodi halo fiskalizasaun iha fronteira tasi no rai maran, no kontrola movimentu ema no sasán.
Aleinde kestaun legál sira ne’e, asuntu balun sempre mosu iha debate kona-bá Timor-Leste nia seguransa fronteira. Asuntu boot ida ne’ebé hamosu tauk iha populasaun maka movimentu kilat ilegál tama mai iha teritóriu nasional husi Timor-Oesidental (Indonézia). Kilat ne’e inklui kilat automatiku ne’ebé deskonfia eis-milisi maka fa’an iha Timor-Oesidental, no mos dala barak liu kilat anin (kilat manu). Maske kilat anin sira ne’e baibain uza ba kasa animal, ema balun mos hetan tiru ho kilat sira ne’e. Foin lalais iha Novembru 2021, PNTL kaptura kilat anin balun iha dalan ba Ermera husi fronteira. Movimentu kilat sira ne’e hanesan risku atuál ba seguransa nasionál no seguransa públiku.
Problema seluk maka demarkasaun linha fronteira entre Timor-Leste ho Indonézia ne’ebé seidauk final. Inserteza kona-bá linha fronteira hamosu preokupasaun kriminál no polítíku, tanba difisil ba autoridade atu kontrola atividade ilegál no kria mos espasu ba nasaun boot atu viola teritóriu soberanu vizinhu ki’ik nian ho impunidade. Kazu foin lalais akontese iha fulan Agostu 2021, iha ne’ebé militár Indonézia balun ho polisia ida akompanha grupu sidadaun Indonézia na’in rua nulu resin hakat ilegálmente mai iha Timor-Leste relasiona ho karau lakon. Sidadaun Timor-oan ida hetan tiru husi forsa seguransa Indonézia nian. Iha ezemplu barak tan iha ne’ebé sidadaun Indonézia depende ba forsa seguransa hodi rezolve ilegalmente disputa ne’ebé akontese iha Timor-Leste.
Aleinde ne’e, entre 2010 to’o 2013, iha insidente balun membru TNI (Tentara Nasional Indonesia)estraga no sobu edifísiu públiku iha Timor-Leste. Lider militár balun iha Timor-Leste konsidera katak insidente sira ne’e parsialmente kauza husi falta koordensaun no respeitu entre TNI ho PNTL. Ida ne’e mos liga fali ba ierárkia kultura no militarísiktu militár nian ne’ebé difikulta kolaborasaun ho entidade sivíl hanesan polísia.
Dezafiu ida tan maka dependénsia sósio-ekonómiku no kulturál ne’ebé eziste iha area fronteira. Familia membru barak ne’ebé hela iha Timor-Leste no mos iha Timor Oesidental, tanba seremónia no eventu kulturál barak obriga familia sira atu hakat ba mai liu husi fronteira. Nune’e mos, dezlokasaun iha tempu konflitu fahe familia barak entre Timor-Leste ho Timor Oesidental. Falta programa dezenvolvimentu husi governu sentrál mos abandona populasaun iha area ne’eba, tanba ne’e sira depende liu ba komérsiu iha area fronteira atu sustenta sira nia moris.
Iha realidade, komunidade sira ne’ebé hela iha area fronteira moris hanesan ne’e durante tempu naruk, maibé foin dadauk sira nia moris sai tarjetu ba intervensaun husi instituisaun seguransa sira. Iha tempu koloniál Portugéz, polisiamentu iha area fronteira la iha, i hafoin Indonézia hetan independénsia area fronteira ne’e administrasaun ka forsa seguransa sira kuaze la book. Tanba ne’e, polisiamentu iha area fronteira foin komesa, bainhira Timor-Leste hetan ona nia independénsia. Maibé, polisiamentu iha area ne’e nafatin fraku no la regular, no linha fronteira seidauk finaliza to’o agora. Tanba ne’e, fronteira kontinua ho kuak barak, maske forsa seguransa sira koko kontrola movimentu. Au mezmu tempu, membru forsa seguransa husi Timor-Leste ho Indonézia dala barak fasilita movimentu ilegál ema no sasán. Nune’e, situasaun kontradiktóriu ne’e hamosu konflitu entre estadu modernu ho moris tradisionál komunidade lokál sira nian.
Situasaun ekonómiku ne’ebé difisil, no mos ligasaun sosiál ne’ebé forte, hamosu tan atividade ekonómiku no sósio-kultural ne’ebé envolve movimentu ilegál, liu-liu komérsiu ilegál no membru arte marsiais hakat fronteira ilegál. Difisil tebes atu haketak atividade hirak ne’e ho atividade komunidade legál nian ne’ebé kontinua jerasaun ba jerasaun. Maibé, atividade sira ne’e lori dezafiu espesífiku ba polisiamentu tanba hamosu risku ba seguransa individu, komunidade no nasionál. Liu-liu, tráfiku droga no trafiku umanu estraga ema nia moris no mos korupta forsa seguransa no sosiedade jerál.
Hanesan FM no ema seluk temi beibeik, atividade arte marsiais iha Timor-Leste reprezenta preokupasaun seguransa durante tempu naruk. Falta kontrola iha area fronteira kontribui diretamente ba kreximentu atividade arte marsiais iha Timor-Leste. Maibé, ita tenke rekonhese katak insidente ho arte marsiais iha area fronteira ladun barak liu, no tanba ne’e susar atu justifika resposta militarizadu no agresivu husi estadu. FM haree Timor-Leste nia instituisaun seguransa tenke la’o ho kuidadu hodi evita vitimiza komunidade lokál no la provoka konflitu ho Indonézia.
Dezafiu ikus liu maka limitasaun kapasidade iha instituisaun seguransa fronteira nian, hanesan rekursu umanu, komunikasaun, transporte no teknolojia vijilánsia nian hanesan tore radio no ekipamentu sira seluk. Difikuldade sira ne’e sistemátiku no tempu naruk, tanba ne’e presiza resposta ne’ebé koordenada husi Governu ho instituisaun seguransa sira, hamutuk ho apoiu husi parseiru internasionál sira. Karik ita la dezenvolve planu integradu ho sistemátiku hodi responde ba limitasaun kapasidade sira ne’ebe iha, imposível atu rezolve problema komplexu sira ne’ebé ita enfrente iha area fronteira nian.
FM hakerek tiha ona katak ami konkorda ho konseitu kolokasaun F-FDTL hodi envolve iha atividade seguransa fronteira, bazeia ba papél ne’ebé hatuur ona iha Konstituisaun RDTL no mos ba difikuldade ne’ebé PNTL enfrenta iha fronteira. Maibé, importante mos ba PNTL atu kontinua nia envolve iha seguransa fronteira, hodi kontinua melhora kapasidade PNTL no mos ajuda F-FDTL atu evita hahalok militarizadu ka violentu ne’ebé bele provoka konflitu no abuzu iha komunidade no forsa Indonézia nian.
FM oferese sujestaun tuir mai nuudar solusaun potensiál ba dezafiu komplexu deskreve iha leten:
- Dezenvolve Polítika Seguransa Nasionál ne’ebé kompreensívu ne’ebé inkorpora planu ne’ebé realístiku hodi melhora kapasidade seguransa fronteira.
- Aumenta apoiu ba kooperasaun entre F-FDTL ho PNTL kona-bá asuntu seguransa fronteira, no aumenta alokasaun orsamentál ba hasa’e PNTL nia kapasidade iha area fronteira. Liu-liu, UPF ho UPM presiza apoiu espesífiku hodi hasa’e kapasidade iha area rekursu umanu, komunikasaun no transporte, no mos ekipamentu no prátika vijilánsia. Ida ne’e bele haforsa forsa seguransa sira nia kapasaidade hodi detekta no kontrola atividade ilegál ne’ebé ameasa seguransa nasionál, liu-liu trafiku umanu no droga, no mos grupu arte marsias.
- Maske atividade arte marsias nafatin sai preokupasaun, insidente deportasaun husi Atambua ba membru arte marsias Timor-oan sira la justifika resposta agresivu no militaristiku husi estadu Timor-Leste, liu-liu tanba insidente hanesan ne’e la barak no mos bele provoka violasaun direitu umanu no tensaun ho forsa seguransa Indonézia. Tanba ne’e, FM husu ba Governu, F-FDTL no PNTL atu la’o ho kuidadu hodi evita resposta ne’ebé militaristiku no agresivu demais.
- Esforsa atu asina MoU entre TNI ho F-FDTL, no mos entre unidade fronteira polisia nasaun rua nian, atu nune’e haforsa koordensaun entre forsa seguransa Timor-Leste ho Indonézia. Ida ne’e bele fasilita respeitu, fahe informasaun no prevene konflitu entre forsa seguransa sira, nune’e bele haforsa seguransa nasionál no prevene kriminalidade no abuzu direitus umanu.
- Hamutuk ho Governu Indonézia, kria rejime espesiál ba sidadaun sira hela iha area fronteira hodi fasilita movimentu legál no prevene kriminaliza komunidade sira. Rejime espesiál ne’e bele inklui lisensa ba movimentu ba atividade sósio-kultural no ekonómiku, no mos bele kria rejime taxa no alfandega espesiál hodi formaliza ekonomia fronteira nian. Ida ne’e bele fasilita komunidade lokál sira atu halo komérsiu iha fronteira, livre husi tauk no kriminalizasaun husi estadu.
