Dezde Marsu 2020, Governu Timor-Leste implementa meius extraordináriu balun hodi prevene transmisaun SARS-CoV-2 iha territóriu nasionál, hanesan deklara Estadu de Emerjénsia, suspende aviaun komérsial, kuarentina obrigatória ba ema ne’ebé mai husi rai liur, ho restriksaun internal ba sidadaun nia movimentu no halibur malu. To’o Marsu 2021, ema barak asume meius sira ne’e konsege duni prevene transmisaun Covid-19 iha Timor-Leste laran, no Governu hetan apoiu barak husi observador Timor-oan ho estranjériu, inklui artigu pozitivu iha media internasionál.
Fundasaun Mahein rekuiñese katak Governu foti asaun iha momentu ne’eba bazeia ba informasaun limitadu no tauk boot kona-bá Covid-19 fó ameasa ba populasaun no sistema saúde públiku. Maske iha ona mudansa barak iha situasaun ho debate iha nivel internasionál desde Marsu 2020, seidauk iha debate públiku ne’ebé sériu kona-bá sustentabilidade ka impaktu total husi Timor-Leste nia resposta kontra Covid-19. Foin lalais, pâniku no restriksaun aumenta ba beibeik tanba transmisaun lokál, nune’e Fundasaun Mahein haree importante tebes atu revé fila fali resposta kontra Covid-19, liu-liu haree evidénsia husi nasaun seluk kona-bá impaktu ba ema baibain nia moris. Maske ami konkorda katak presiza duni foti meius oin-oin, ho artigu ida ne’e Fundasaun Mahein husu pergunta kritiku balun kona-bá Governu nia estratéjia ba longu-prazu, no mos oferese sujestaun balun atu hadiak Estadu nia jestaun ba krize ne’e.
Iha kuarta-feira, loron 10 Marsu, video ida sirkula iha media sosiál hatudu polísia ida ho kilat boot obriga traballador saneamentu na’in rua basa malu, tanba sira viola regras ‘serca sanitaria’ foun ne’ebé aplika iha Dili. Akontesimentu ne’e viola klaru lei ne’ebé regula hahalok polísia nian, maibe mos hatudu limitasaun kapasidade PNTL nian atu evita violasaun ema nia direitu, hapara atividade esensiál no provoka konflitu sosiál bainhira implementa orden emerjénsia. Komandu PNTL kondena ona asaun ne’e no komesa ona investiga membru polísia refere, no Fundasaun Mahein louva resposta husi komandu ne’ebé halo lalais.
Maske nune’e, ami mos hanoin katak ita tenke haree akontesementu ne’e iha ninia kontextu. Fundasaun Mahein konsidera ne’e hanesan konsekuénsia husi polítika maka’as ne’ebé autoridade iha Timor-Leste hili hodi kontrola Covid-19, no mos iha rai barak. Covid-19 hanesan ameasa boot ba saúde públiku, maibe aproximasaun brutál ne’ebé kontribui ba pâniku sosiál no violasaun direitus umanus mos sai ameasa ba seguransa públiku ho direitu demokrátiku. Tanba violasaun barak ne’ebé mosu durante krize Covid-19, Sekretária-Jerál ONU António Guterres foin hakerek artigu ida dehan katak Covid-19 lori “pandemia abuzu direitus umanus”. Ema barak komesa ona hakilar ba Governu atu implementa regras maka’as liu tan no aumenta penalidade kontra ema ne’ebé la kumpre regras, maibe Fundasaun Mahein preokupa tebes katak ida ne’e sei fó impaktu negativu barak, no ema vulnerável sei sofre. Tanba ne’e, ami repete ba públiku ho ukun na’in, Covid-19 iha nia baze krize saúde, la bele konsidera nu’udar asuntu kriminál ka polisiamentu deit.
Ami mos preokupa tebes katak polísia prevene hela transportasaun sasán esensiál tama-sai Dili, hanesan produtu agrikola ho ai-han importadu. Ami agradese ba Governu tanba fó sai ona avizu dehan katak polísia tenke fó dalan ba movimentu produtu ai-han ho bens no servisus esensiál sira seluk. Maske nune’e, ami nafatin preokupa katak Governu implementa serca sanitária antes informa polísia atu la bele prevene movimentu produtu ai-han entre kapital Dili ho area rurál sira. Tuir ami nia haree, ne’e hatudu falta antisipasaun husi parte autoridade sira kona-bá konsekuénsia ne’ebé mai husi “lockdown” iha sidade kapital.
Atu mellora polísia nia kompreensaun kona-bá regras no restriksaun sira, Fundasaun Mahein sujere katak Governu bele kria mekanizmu formal ida anexu ba Sentru Integradu Jestaun Krize hodi asegura komunikasaun ho koordensaun diak entre polísia ho autoridade Estadu sira seluk, hanesan Provedoria Direitus Umanus no Justisa, Ministériu Interior, Ministériu Komérsiu ho Indústria ho Ministériu Agrikultura. Iha parte ida, ne’e bele prevene violasaun ema nia direitus, no segundu bele garante katak polísia komprende katak transportasaun produtu esensiál sira tenke la’o nafatin hanesan baibain. Karik atividade sira ne’e para, ne’e bele fó impaktu negatívu ba ema nia moris rasik, no mos ba sistema ai-han nasionál no funsionamentu sosiedade tomak.
Fundamentál liu, Fundasaun Mahein observa katak anúnsiu emerjénsia lor-loron, orden ba “lockdown” ne’ebé mosu derepente, no asisténsia insufisiente ba grupu vulnerável ne’ebé afeita husi impaktu ekonómiku, meius hotu ne’e kontribui ba tensaun, terus ho konflitu sosiál iha públiku. Ne’e mos kria stress psikolójiku barak ne’ebé lori impaktu negatívu mai iha saúde públiku. Hanesan akontese ona iha nasaun barak, Ospitál Nasionál Guido Valadares agora pasiente menus hela tanba ema barak tauk ba ospitál, ne’e sei lori impaktu ba moras sira seluk tanba ema la buka tratamentu. Aleinde ne’e, maske ema barak haree lockdown iha Dili hanesan buat ida ne’ebé nesesáriu, ema barak halai husi Dili iha Segunda-feira kalan (8 Marsu 2021) tanba sira tauk lockdown sei afeita ba sira nia atividade ekonómiku ka lori atensaun husi Estadu. Ne’e signifika iha posibilidade ema balun infetadu halai tiha ona ba foho.
Governu tenke haree didiak fali nia estratéjia tanba razaun rua: Falta kapasidade ajénsia seguransa sira atu implementa regra emerjénsia sira ne’e ho seguru, no pâniku públiku ne’ebé aumenta beibeik. Governu kleur ona hein deit katak taka fronteira ho kuarantina sei prevene transmisaun lokál. Maibe, fasil atu halo prediksaun katak kazu foun sei mosu, liu-liu bainhira Governu komesa halo teste masál iha komunidade. Nune’e mos, fasil halo prediksaun katak violasaun direitus umanus sei mosu bainhira manda polísia ho treinamentu ne’ebé limitadu atu hapara ema nia movimentu ho atividade loro-loron. Tanba ne’e, en vez de kontinua tuir planu bazeia ba desizaun ne’ebé halo iha Marsu 2020, Fundasaun Mahein haree importante atu análiza didiak asumsaun balun ne’ebé informa Governu nia polítika kontra pandemia.
Primeiru, dadus barak hatudu katak virus SARS-CoV-2 sirkula iha nível internásional dezde Dezembru 2019, no iha evidénsia katak virus tama ona iha Europa iha Setembru 2019. Nune’e mos, perítus barak asume iha inísiu katak SARS-CoV-2 sei halo ema barak moras bainhira nia daet iha kualker fatin ruma, inklui iha Timor-Leste. Maibe, estudu antibody balun husi New Delhi (India) ho Tokyo (Japaun) hatudu katak virus ne’e daet duni ba ema barak iha ne’eba, maibe husi partisipante iha estudu ne’e, ema minimu tebes moras grave ka mate. Tanba Timor-Leste foin taka nia fronteira iha Marsu 2020, iha posibilidade katak SARS-CoV-2 komesa ona hadaet durante fulan balun, maibe ema la deteta. Maibe, la iha dadus ruma atu bele konfirma ida ne’e, tanba ne’e Governu bele halo estudu antibody ida atu sukat se ema balun kona duni virus ne’e tiha ona. Aleinde ne’e, estudu antibody dala barak la kapta ema hotu iha populasaun ne’ebé iha ona imunidade, tanba antibody sai lalais husi isin, signifika iha posibilidade teste sei la hetan antibody, maske imunidade iha tiha ona.
Perítus barak mos asume katak la iha imunidade ruma kontra SARS-CoV-2 iha populasaun. Maibe, estudu barak hatudu ona katak ne’e sala, iha duni imunidade husi virus seluk – hanesan virus ne’ebé provoka moras inus metin no mear – ne’ebé bele proteje ema husi moras Covid-19. Sientista balun hanoin katak “cross-immunity” ne’e hanesan fator importante ida ne’ebé esplika tanba sa la iha impaktu boot husi Covid-19 iha Africa ka Asia Leste. Fator rua tan ne’ebé sientista hanoin limita impaktu Covid-19 iha nasaun seidauk dezenvolvidu maka populasaun ho maioria joven no klima. Analiza komparativa balun hetan katak fator xave ne’ebé determina impaktu husi Covid-19 maka fator estrutrual hanesan idade populasaun, GDP (nasaun riku maka hetan impaktu boot liu), klima, ho saúde populasaun, liu-liu obesitas (bokur).
Asumsaun ida tan maka Governu tenke halo teste masál ho PCR, no uza rezultadu teste ne’e hodi deside restriksaun ba ema individuu no mos sosiedade tomak. Iha Timor-Leste, depois hetan teste pozitivu balun deit, Governu implementa kedas “konfinamentu obrigatóriu”, inklui iha Dili. Maibé, sientista barak avizu katak PCR teste ne’e sensitivu los, signifika bele pozitivu nafatin maske ema la iha ona infeksaun ativu. Artigu ne’ebé foin públika iha jornál médiku The Lancet deklara katak bainhira teste PCR uza síkulu 30-40, “entre 50-75% husi pozitivu ne’e, sira la iha ona infeksaun ativu”. Dr Rui de Araújo rasik rekuiñese problema ida ne’e, nia nota katak ema ne’ebé teste pozitivu iha Baucau tama ona iha faze rekuperasaun tanba nia teste pozitivu ho síkulu 42, ne’ebé hatudu montante virus iha ema ne’e nia isin minimál tebes.
WHO responde tiha ona ba preokupasaun no artigu husi sientista barak kona-bá problema ‘pozitivu falsu’ ne’e, hakerek avizu katak tenke haree didiak ba rezultadu pozitivu PCR. Sira fó razaun katak bainhira ita uza sikulu 30-40, maibe virus iha komunidade la barak, iha posibilidade katak rezultadu pozitivu barak ne’e la’os infeksaun ne’ebé ativu. Ema balun hanoin opsaun seguru liu maka halo teste masál, maske hetan pozitivu falsu barak, tanba bele kontrola transmisaun. Maibe, ami hakarak fó hatene katak pozitivu falsu mos lori impaktu negativu barak ba individuu ho sosiedade, tanba bainhira ema teste pozitivu ema bele sofre stress, trauma no stigma, lakon osan ka servisu, no mos bele lakon tratamentu saúde ba moras seluk tanba doutor ka ospitál lakohi fó tratamentu ba ema ho teste pozitivu.
Karik Governu ho asesór sira haree teste masál ho anúsiu loro-loron hanesan dalan ne’ebé seguru liu. Maibé, Governu tenke rekuiñese katak polítika ne’e mos kontribui ba pâniku no tauk iha populasaun, liu-liu bainhira públiku rona kona-bá kazu foun loro-loron maibe la iha informasaun klaru kona-bá pasiente ne’e nia kondisaun, hanesan ema ne’e sen sintomas (la moras), ka moras oituan deit, ka moras todan. Maske Governu sempre ko’alia “la bele pâniku”, ami haree imposível atu hamenus pâniku bainhira restriksaun ba movimentu no númeru kazu kontinua aumenta. Falta fiar entre populasaun ho autoridade mos kontribui ba tensaun entre komunidade ho ekipa saúde, hanesan ameasa violentu kontra ekipa saúde ne’ebé foin akontese.
Tanba Governu tenke kontinua monitoriza Covid-19, ami sujere Governu tenke konsidera dalan alternativa duké uza deit teste masál PCR ho lockdown bainhira hetan rezultadu pozivitu. Opsaun ida Governu bele husu doadór atu ajuda kria kapasidade ba teste rapidu antigen, ne’ebé hetan rezultadu iha minutu balun deit, no mos baratu ho nível teknolojia menus kompara ho PCR. WHO rasik rekomenda ona sistema ida ne’e ba nasaun seidauk dezenvolvidu, no Indonézia komesa implementa ona.
Atu hamenus pâniku no hasa’e kuiñesementu ho konfiansa iha públiku, Governu tenke halo esforsu atu fahe informasaun ne’ebé realistiku kona-bá risku husi Covid-19. Bainhira Governu responde ba kada teste pozitivu hanesan emerjénsia boot, ne’e bele hatun konfiansa públiku, liu-liu tanba ema barak fiar ona katak média ho Governu ezajera risku husi moras ne’e. Governu bele mos fahe informasaun klaru kona-bá kondisaun ema ho teste pozitivu, karik sira iha sintomas ka lae, moras grave ka lae. Au mezmu tempu Governu bele fornese informasaun realístiku kona-bá risku ba grupu diferente, hanesan joven kompara ho katuas ferik sira, no mos hanorin públiku atu oinsá bele haforsa saúde jerál.
Bainhira Governu falla atu informa povu katak ema hotu la iha risku ne’ebé hanesan, maibe depende ba idade no kondisaun fiziku, ne’e bele estraga povu nia fiar bainhira sira hetan informasaun ne’e husi fonte informasaun seluk. Aat liu sira bele lé informasaun sala ne’ebé nega realidade moras Covid-19. Governu bele halo komunikasaun pozitivu ne’ebé esplika klaru kona-bá risku, no dalan simplés atu hamenus risku, nune’e bele hamenus risku no hametin povu nia fiar. Iha evidénsia barak ona katak obesitas (bokur) ho falta Vitamina D kontribui ba moras todan Covid-19, hanesan mos ba moras oi-oin. En vez de obriga populasaun hein iha uma deit ka obriga ‘distansia sosial’ (ne’ebé bele dehan ladún realistiku iha kontextu Timor), Governu bele rekomenda ba públiku atu sai iha loron manas, exersisiu ho dada iis ho anin fresku mínimu 30 minutus loro-loron. Ida ne’e sei fó benefísiu ba populasaun nia imunidade no saúde jerál. Krize ne’e mos fó oportunidade diak atu hanorin povu kona-bá importánsia nutrisaun ba saúde.
Governu bele hamenus pâniku no uza rekursu ho estratéjiku liu, atraves de hapara teste masál PCR ho anúnsiu emerjénsia loro-loron kona-bá kazu foun. Opsaun diak liu maka Governu bele fokus rekursu atu buka deit ema ho sintomas iha komunidade, no halo teste ba sira ho kontaktu direta. Governu mos tenke investe iha kapasidade sistema saúde públiku tomak atu bele jere moras ho epidemia oi-oin. Ida ne’e seidauk akontese iha nasaun barak, karik tanba fasil liu ba Governu sira atu halo orden emerjénsia duké investe iha saúde públiku ba tempu naruk. Maibé, ida ne’e esensiál tebes ba jestaun saúde públiku, no mos epidemia seluk iha futuru.
Iha posibilidade vasina bele hapara epidemia, maibe Timor-Leste nia kapasidade saúde limitadu tebes, signifika halo vasinasaun ba populasaun tomak sei han tempu naruk los. Maibe Timor-Leste presiza sai husi krize urjente, tanba krize ne’e kria terus, problema saúde seluk, estraga dezenvolvimentu ekonomia no hatun konfiansa públiku. Tanba ne’e, Governu tenke konsidera estratéjia seluk duké depende deit ba vasina. Hanesan mensiona iha letan, tenke investe iha setór saúde públiku. Au mezmu tempu, Governu bele prepara atu kombate impaktu direta husi Covid-19 atraves de sosa ai moruk oi-oin hanesan corticosteroid ho anti-malarial ne’ebé baratu ho seguru, ne’ebé uza tiha ona iha nasaun barak. Persentajen pasiente ne’ebé mate husi Covid-19 tun maka’as tanba doutor iha rai barak aprende oinsá bele fó tratamentu ne’ebé diak liu. Timor-Leste la presiza repete fali sala ne’ebé halo iha nasaun barak iha Marsu-Abríl 2020.
Ikus liu, akadémiku ho organizasaun internasionál barak avizu ona katak bainhira halo “lockdown” iha nasaun seidauk dezenvolvidu araska tebes tanba halo ema barak lakon osan ho menus hahan lalais. Ne’e akontese tanba iha nasaun seidauk dezenvolvidu, númeru empregu informal barak liu no falta apoiu sosiál husi Governu. Tanbe ne’e, Dr David Nabarro husi WHO husu Governu sira atu la bele depende ba lockdown hanesan mekanizmu kontrola primaria tanba lockdown fó impaktu boot ba ema kiak ho vulnerável sira. ONU ho estudu akadémiku barak mos hatudu ona katak pobreza ho malnutrisaun aumenta ba beibeik tanba restriksaun ba atividade ekonómiku durante pandemia, no ida ne’e lori impaktu negativu ba ema barak agora no ba futuru. Ajénsia internasionál avizu katak programa vasinasaun ba moras seluk ho programa kontra TB ho malaria suspende, no eskola ba labarik barak taka, no ida ne’e sei fó impaktu boot liu duké Covid-19 rasik iha nasaun barak, liu-liu ba labarik. Maske Timor-Leste evita impaktu negativu barak liu, ema barak terus ona no ita seidauk haree impaktu hotu husi meius kontra Covid-19. Fundasaun Mahein haree katak tenke avalia impaktu negatívu sira ne’e kompara ho risku husi Covid-19 rasik, no la bele dehan deit impaktu aat sira ne’e hanesan sakrifísiu nesesáriu hodi kontrola Covid-19. Mínimu Governu tenke rekuiñese impaktu sira ne’e no esforsa atu fó apoiu ba ema vulnerável sira.
Fundasaun Mahein apresia Governu nia susesu minimiza impaktu husi Covid-19 iha Timor-Leste. Ami la nega risku husi Covid-19 ba saúde públiku, maibe ami fiar katak ita presiza halo debate públiku kona-bá kustu ho benefísiu husi meius ne’ebé Governu foti, tanba debate ne’e seidauk la’o to’o agora. Maioria haree meius sira ne’e hanesan susesu boot, maibé ita tenke rekuiñese katak meius sira ne’e lori terus ba ema barak, hatun konfiansa públiku no kontribui ba pâniku sosiál. Nune’e mos, Governu nia estratéjia atu sai husi krize depende deit ba vasinasaun, maibe planu ne’e presiza tempu, signifika fronteira bele taka ho lockdown bele repete ba tinan ida-rua tan, no ida ne’e la sustentável. Ukun na’in sira tenke lembra katak saúde públiku la’os deit kontrola Covid-19 – tenke haree no jere prioridade oi-oin, inklui moras sira seluk ho problema ekonómiku ne’ebé bele mos oho ema barak. Ne’e duni, ema balun mate tiha ona iha Timor durante krize ne’e tanba sira la bele ba rai liur hodi halo tratamentu saúde. Tanba ne’e, ami husu Governu atu konsidera deit evidénsia totál no estratéjia alternativa ne’ebé eziste. Ida ne’e bele hamenus pâniku ho konflitu sosiál, no impaktu sira seluk husi meius kontra Covid-19, atu nune’e Timor-Leste bele sai neneik husi krize ne’e, no mos kontrola impaktu direta husi Covid-19 rasik.
