Observasaun hosi Fundasaun Mahein kona-bá Eleisaun Lideransa Komunitaria tinan 2023

Foto : STAE 2023

Iha relatóriu ida ne’e, deskreve rezultadu monitorizasaun hosi Fundasaun Mahein (FM) kona-bá eleisaun ba lideransa komunitaria períodu 2023-2030 ne’ebé preimeira volta hala’o iha loron 28 Outubru 2023 iha suku 442 no segunda-volta hala’o iha loron 13 Novemrbu 2023. FM hetan kredensial hosi Sekretariadu Tekniku Administrasaun Eleitoral (STAE) hodi halo monitorizasaun durante periodu eleisaun lideransa komunitaria. FM hala’o observasaun iha munisipiu sira hanesan Baucau, Bobonaro, Covalima, Dili no Viqueque.

Relatóriu observasaun ida ne’e konsentra iha difikuldade no irregularidade sira ne’ebé akontese durante eleisaun lideransa suku hanesan tuir mai ne’e.

Votasaun la tuir oras – iha sentru votasaun ne’ebé FM observa nota sentru votasaun votantes sira fó nia votos to’o kalan bo’ot. Ida ne’e akontese tambá menus ofisial sira STAE nian no la atende prosesu eleisaun tuir regras ne’ebé estabelese kona-ba prosedimentu eleisaun nian.

Populasaun sira la vota – ida ne’e akontese tamba distansia sentru votasaun ne’ebé dook halo komunidade balun la fó nia votus iha eleisaun lideransa komunitaria. Ezemplu akontese iha Suku Tapo/Memo, Maliana, populasaun balu la konsege fó nia votus tambá hela dook hosi sentru votasaun nian.

Menus pessoal seguransa – FM mos rejista katak menus pessoais PNTL iha sentru votasaun sira. Liu-liu iha área risku sira ba violênsia, tambá mosu provokasaun entre apoiante kandidatu xefe suku no xefe aldeia sira, membru PNTL konsetra deit hodi assegura meterial sensetivu sira duke atende provokasaun entre apoiante sira.

La iha lista eleitor sira nian – oficial sira hosi STAE nian simu votantnte nia kartau eleitor no hakerek fila-fali ho liman iha lista votantes nian. Nune’e iha suku balu populasaun sira vota to’o iha kalan bo’ot hanesan akontese iha suku Bahu munisipiu Baucau, suku Comoro munispiu Dili.

Menus kavina no urna votu nian – material ba eleisaun la sufisiente hanesan kavina votu ida, urna ida tau hamutuk deit buletin xefe suku, xefe aldeia no delegadu nian hamutuk iha fatin ida deit no tinta la iha. La iha ekipamentu hanesan lapijeira ka pregu ne’ebé utiliza hodi marka iha buletin votu. Nune’e votante balun les kuak deit buletin votus, ezemplu akontese iha suku Bahu-Baucau Vila.

Sentru votasaun la asesivel ba ema ho difisiente no vulnerável sira – iha sentru votasaun balu ami nota katak la asesivel ba ema ho difisiente, idozu sira nomos inan isin rua sira. Nune’e difikulta sira fó nia votus ba eleisaun lideransa komunitaria, hanesan ami nota iha suku Bairo Pite Dili.

Kartaun eleitor duobru – ami mos rejista populasaun balu lori kartaun liu hosi ida ka lori kartaun eleitoral tolu no vota dala-tolu. Ofisial STAE la rejista akontesimentu sira ne’e, tambá la iha lista ba eleitor sira nomos la iha tinta.

Menus ofisial STAE nian – ho menus ofisial STAE nian, nune’e ladun tau matan didiak ba urna votu nian tanba iha votante balun maka koko atu hatama liman ba urna laran. Nune’e mos la kontrola prosesu tomak eleisaun lideransa komunitaria nian. Inklui iha eleisaun xefe aldeia nian, iha prosesu simu dokumentu xefe aldeia no delegadu sira nian, buletin votu la tau karimbu antes fó ba votante sira.

Rezultadu votasaun igual – iha eleisaun xefe aldeia nian, FM nota iha munisipiu Viqueque iha segundu volta nian kandidatu xefe aldeia ne’ebé tama ba segundu volta no rezultadu votu hanesan. Nune’e sira lori rezultadu ida ne’e aprezenta ba meja maibe la iha solusaun no autoridade lokal sira halo dialogu no fó deit ba kandidatu ida sai hanesan xefe aldeia, la liu hosi eleisaun.

Violênsia durante eleisaun lideransa suku – FM mos rejista iha munisipiu Viqueque akontese violênsia entre apoiante kandidatu xefe suku nian ne’ebé akontese iha Postu Administrativu Uatolari no Viqueque Vila. Nune’e mos rezulta xefe suku eleitu ida nia uma hetan sunu hosi apoiante kandidatu seluk ne’ebé lakon iha eleisaun segunda volta.

Influênsia hosi grupu arte-marsiais – FM observa mos katak konflitu entre interese grupu arte-marsiais durante períodu eleisaun lideransa komunitaria. Nune’e mos kadidatu balun utiliza arte-marsiais hodi halo presaun oin-oin hasoru komunidade sira hodi fó votu ba ninia kandidatura.

FM konklui katak iha eleisaun lideransa komunitaria aleinde difikuldade sira ne’ebé ofisiais STAE no PNTL hasoru maibe iha mos irregularidade balu ne’ebé akontese durante eleisaun ne’e nian. Maske nune’e, eleisaun ba lideransa komunitaria iha suku 442 la’o ho susesu. Ho ida ne’e FM rekomenda iha eleisaun sira tuir mai:

Governu liu hosi Ministériu Administrasaun Estatal no STAE tenke hadi’a no moderniza sistema eleisaun suku nian ho apoiu ekipamentu nesesariu sira eleisaun nian. Nune’e mos iha futuru tenke aumenta no fó treinamentu ba ofisiais sira eleisaun nian hodi kompriende didi’ak prosesu eleisaun.