imajen: Australian Institute of International Affairs
Maske Timor-Leste hanesan nasaun ki’ik ida ne’ebé luta ba tempu naruk atu hetan liberdade, ita nia ambiente polítiku fahe entre grupu no interese oi-oin. Rivalidade pesoál entre elite sira sai nu’udar karakterístika prinsipál iha polítiku nasionál. Divizaun, deskonfiansa no falta konsensus entre elite sira hafraku progresu, no kria ambiente iha ne’ebé falta kooperasaun di’ak no interese pesoal no partidu mak domina buat hotu.
Fragmentasaun ida ne’e la’ós de’it entre polítiku no partidu diferente sira, maibé iha mos divizaun iha partidu ida-idak nia laran. Maioria partidu polítiku boot sira fahe ba faksaun oin-oin ne’ebé kompete malu, no konflitu interna hafraku fali governasaun. Fatór xave ida mak lider sira ne’ebé seidauk hatudu vontade atu prepara lideransa jerasaun tuir mai atu ukun. Bainhira lider sira ohin nia lahatudu lideransa, no la aprezenta vizaun ba tempu naruk atu promove jerasaun tuir mai atu sai lider, membru partidu sira tenke kompete atu asegura sira nia futuru pesoal, no hein de’it to’o lider sira ne’ebé idade ona reforma ka mate.
Divizaun polítika iha Timor-Leste ohin loron ne’e la’os buat foun, maibé eziste kleur ona. Husi inísiu kedas, grupu polítiku Timor-oan sira la unidu. Tensaun entre UDT no Fretilin hamosu funu sivíl iha 1975 molok Indonézia invade. Indonézia sira aproveita konflitu internal ida ne’e atu justifika invazaun, no konflitu ne’e mos kria kanek bo’ot iha sosiedade ne’ebé seidauk rezolve to’o agora.
Maske Fundasaun Mahein (FM) hare’e importante tebes atu ita aprende husi sala pasadu nian, ita bele mos aprende lisaun importante husi desizaun di’ak ne’ebé lider sira halo iha momentu xave iha ita nia istória. Iha dekada 1980 nia rohan, lider sira konsege kria unidade polítika, liu-liu tanba lideransa no vizaun Xanana Gusmão no José Ramos-Horta nian. Sira rekonhese nesesidade atu koopera hamutuk kontra ita nia inimigu komún, tanba ne’e sira halo desizaun estratéjiku atu harii Konsellu Nasional Rezistensia Maubere (CNRM), ne’ebé ikus mai sai Konsellu Nasional Rezistensia Timor (CNRT). Lider sira nia desizaun ida ne’e konsege unifika rezisténsia Timor-oan no sai hanesan fatór krítiku ida ne’ebé asegura susesu movimentu ba ukun rasik-an.
Infelizmente, espíritu unidade ne’ebé mosu momentu ne’ebá la kontinua durante tempu independénsia. Komesa husi periodu tranzisaun iha 1999 no kontinua hafoin tinan 2002, lider polítiku falla atu kolabora hamutuk ba interese nasionál. Divizaun sai fali hanesan karakter polítika Timor-Leste nian. Krize 2006 hatudu klaru ida ne’e, iha ne’ebé estadu monu tanba rivalidade entre elite sira ne’ebé prioritiza sira nia ambisaun pesoál duké interese nasionál.
Maske krize hetan “rezolusaun” hafoin tinan 2008, maibé rivalidade entre elite sira kontinua nafatin. Lider sira kontinua kompete ho agresivamente atu mantein podér no priviléjiu sira. Nune’e bo’ot sira fahe benefísiu ho sira nia maluk bainhira sira mak ukun, no bainhira la kaer podér ona sira uza meius oi-oin atu hatun no insulta governante sira. Kompetisaun polítika ne’e normál iha estadu demokrátiku nian, maibé realidade iha Timor-Leste mak ema barak sente baruk tanba katuas sira sempre hatun no ataka malu. Rivalidade ne’e halo públiku kolen no menus konfiansa, no mos hafraku governasaun.
Maske nune’e, durante ne’e Timor-Leste relativamente estavel no pasifiku. Ema balun konsidera katak estabilidade ne’e só eziste tanba estadu hetan osan barak husi reseita mina no gáz atu nune’e orsamentu estadu bele aumenta tinan-ba-tinan. Ukun na’in sira konsege mantain páz liu husi fahe benefísiu ba ema ne’ebé iha potensiál atu kria instabilidade. Orsamentu estadu mos fahe osan ba sidadaun sira nia seguransa sosiál. Maibé, estratéjia ne’e la sustentavel, finanseiramente tanba rekursu petrolíferu ne’ebé fornese maioria estadu nia osan limitadu; no politikamente tanba estratéjia “sosa páz” ne’e signfika elite sira lapresiza servisu hamutuk atu harii estabilidade no reziliensia ba tempu naruk. Populasaun barak lasatisfas ho elite polítiku sira, tanba sira haree elite sira fahe de’it benefísiu ho família no aliadu polítiku sira. Karik Timor-Leste enfrente krize finanseiru iha tinan balun tan no governu tenke ko’a orsamentu, instabilidade no konflitu sosiál sei aumenta.
Agora ema barak preokupa: saida mak sei akontese bainhira katuas sira la iha ona? Bainhira jerasaun 1975 reforma ka mate, se mak sei lidera país ba oin? Maske lider sira iha frakeza barak, sira mos konsege kria estabilidade no kontinuidade. Populasaun sei respeita sira tanba konsege asegura Timor nia independénsia. Maibé, seidauk iha lider ruma husi jerasaun foun ne’ebe bele troka katuas sira, no seidauk iha grupu politiku unidu ne’ebé bele ukun. Tanba ne’e ami preokupa katak fragmentasaun polítika sei intensifika bainhira kompetisaun politika aumenta iha futuru. Divizaun entre partidu polítiku no mos iha partidu laran bele hamosu konflitu no instabilidade bainhira grupu kompete malu iha ambiente ne’ebé polarizadu. Governasaun iha setór seguransa sei fraku no polítiku balun kontinua rai kilat ilegál, no ida ne’e sai preokupasaun boot, liu-liu se instabilidade polítika aumenta.
Situasaun ida ne’e hatudu katak Timor presiza duni konsensus husi elite foun: matadalan ne’ebé guia dezenvolvimentu ba oin, ne’ebé la refleita ambisaun individuál no interese partidaria. Timor-Leste presiza lideransa ne’ebé forte, no katuas polítiku sira tenke foti responsabilidade no asegura katak lideransa husi jerasaun foun prontu atu lidera pais. Sira tenke promete atu fahe podér no koopera malu, no mos prepara ba tranzisaun polítika, dezenvolvimentu nasionál no governasaun inkluziva.
Maske klaru ona katak presiza konsensu entre elite sira atu garante tranzisaun polítika, maibé maioria katuas sira kontinua fó prioridade ba buat seluk. Ida ka rua tenta atu envolve jerasaun foun, maibé en-jeral elite sira halo esforsu uitoan de’it atu prepara jerasaun tuir mai atu lidera nasaun iha futuru. Diskursu polítiku barak kontinua foka ba pasadu duké hare’e ba oin no diskute kona-ba governasaun Timor-Leste iha futuru. Lideransa gasta tempu barak diskute kona-ba rekonsiliasaun entre grupu pro-independénsia no pro-Indonezia, no rekonsiliasaun ho militár Indonezia hanesan Prezidente foun Indonézia nian, Prabowo Subianto.
Maske Timor-Leste nu’udar Republika Demokrátika bazeia ba Estadu Direitu, realidade mak relasaun informál no prátika tradisionál kontinua domina desizaun iha Timor-Leste. Ne’e signifika katak relasaun pesoál no ierárkia tradisional mak importante liu duké regra formál no prosedimentu sira. Nune’e mos, maske estadu konsolida no moderniza, nepotizmu no informálidade kontinua aumenta. Desizaun barak kontinua domina husi relasaun pesoal no akordu informal duké prosedimentu formál ka méritu, inklui prosesu administrativu báziku no fahe oportunidade servisu no kontratu estadu.
Seremonia tradisional – ka lia – ne’ebé tane a’as istória pasadu no matebian sira kontinua domina sosiedade Timor, inklui lider bo’ot sira. Tanba ne’e lider polítiku sira gasta tempu no enerjia barak liu komemora pasadu ho seremonia bo’ot. Importante atu onra eroi sira no sakrifísiu pasadu, maibé bainhira lider sira foka liu ba konflitu pasadu, enerjia no rekursu menus atu investe iha futuru, liu-liu iha área xave sira hanesan edukasaun, dezenvolvimentu ekonómiku no tranzisaun polítika.
Nune’e, maske lider sira sempre deklara katak sira defende prinsípiu demokrasia no meritokrasia, realidade mak ema nia pozisaun iha ierarkia tradisionál no kulturál mais respeitadu duké pozisaun ofisiál. Nune’e Timor nia sistema sosiál kuaze feudal kontinua to’o ohin loron. Sistema ida ne’ebé Maun Bo’ot sira kontinua domina desizaun iha nivel sosiedade hotu, inklui iha governu, partidu, instituisaun edukasaun, aldeia, família no mos iha NGO sira. Realidade ida ne’e relevante ba kestaun dezenvolvimentu nasionál, tanba dala barak individu sira ne’ebé iha kapasidade di’ak la bele hetan pozisaun, maibé ema seluk ne’ebé kapasidade menus hetan pozisaun bazeia ba sira nia status ka koneksaun pesoal. Nune’e mos, sistema ida ne’e ajuda elite sira atu aproveita sira nia pozisaun hodi fahe benefísiu ba sira nia maluk sira.
Sosiedade mos tenke envolve-an ativu liu iha prosesu polítiku atu dezafia status quo iha ne’ebé Maun Boot-izmu kontinua domina. Sistema patriarkál ida ne’e limita tebes joven, feto no grupu marjinalizadu sira seluk atu influénsia desizaun, liu-liu iha arena polítika. Katuas sira ka’er metin podér, no ida ne’e kria ambiente ida ne’ebé dala barak halo susar ba ema seluk atu espresa perspetiva kritika ka ideia foun. Tanba ne’e, ema matenek barak la bele kontribui ho máximu, tanba sistema fó prioridade ba autoridade tradisionál no ligasaun pesoal duké meritu no inkluzaun.
Situasaun ida-ne’e muda ba beibeik tanba foin-sa’e sira asesu ba edukasaun no informasaun global. Tanba ne’e balun komesa fiar-an atu bele kritika hanoin klot no prátika a’at iha sira nia familia. Maske modernidade lori dezafiu no problema oi-oin, maibé modernidade benefisia tebes ema hanesan individu no sosiedade tomak. Ne’e tanba modernizasaun liberta ema husi estrutura sosial opresivu sira. Idealmente, modernizasaun promove ema nia liberdade, kreatividade no dezenvolvimentu individu. Atu atinje vizaun ida ne’e, sosiedade tenke ativu atu ezije mudansa; ita tenke fó presaun ba lider sira atu adopta polítika inkluziva sira ne’ebé reflete nesesidade no mehi Timor-oan hotu nian.
Iha parte seluk, istória hatudu katak bainhira grupu ruma – grupu elite ki’ik ka masa populasaun baibain – tenta atu obriga mudansa sosial la’o lalais, konflitu mosu beibeik. Dala ida-rua de’it mudansa revolusionariu hanesan ne’e hamosu progresu ne’ebé di’ak ba populasaun – no dala barak, instabilidade ne’e loke dalan ba ema atu foti podér liu husi prinsípiu “dividir e conquistar”. Timor-Leste mos sai vitima tanba razaun ida ne’e iha 1975 – Indonézia konsege aproveita ita nia konflitu internal atu hala’o sira nia invazaun. Maun Boot-izmu sei metin iha sosiedade no polítika Timor-Leste nian, no FM hare’e la-realistiku atu halakon prátika no mentalidade tradisionál sira iha tempu badak. Ema balun prefere aselera mudansa sosial, maibé ne’e sei provoka konflitu no instabilidade, no ita tenke evita situasaun hanesan akontese iha pasadu.
Klaru katak ierarkia tradisional hamosu eskluzaun no korrupsaun, maibé bele mos harii konsensus no rezolve konflitu, liu-liu bainhira katuas sira haraik-an no prioritiza interese komun. Lia hanesan mekanizmu importante ida ba rekonsiliasaun, no ajuda tebes Timor-oan sira atu jere no rezolve konflitu durante tinan barak. FM fiar katak lider sira tenke adopta prinsípiu sira ne’e atu buka konsensus foun ne’ebe bele hametin estabilidade no dezenvolvimentu inkluzivu iha país.
Urjente ona ba katuas sira atu mai hamutuk para rezolve divizaun no estabelese vizaun unidu ba futuru. Lider sira tenke komprende katak ameasa bo’ot liu ba estabilidade iha futuru mak ambiente polítika ida ne’ebé fahe no domina husi rivalidade duké kooperasaun ba interese nasional. Tanba ne’e, ami husu katuas sira atu husik sira nia odiu no konflitu iha kotuk, no hare’e ba oin hodi kria konsensus foun ida ne’ebé refleita no avansa mehi povu Timor-Leste nian.
FM komprende katak ne’e la’os buat ne’ebé fasil. Maibe esensial ba Timor-Leste atu bele realiza nia potensiál hanesan nasaun ida estável, demokrátiku no prósperu. Lidér sira tenke prioritiza ben-estar nasaun nian ba longu prazu, duké luta ba podér iha tempu badak. Karik katuas sira foti asaun ne’ebé responsável no inkluzivu, Timor-leste bele atinje unidade polítiku ne’ebé ita presiza atu bele hasoru dezafiu sekulu 21 nian.
