Fundasaun Mahein (FM) nudar Organizasaun Naun Govermental (ONG) ne’ebe durante ne’e hala’o peskiza, monitorizasaun no advokasia ba seitor defeza no siguransa iha Timor-Leste, hahu husi 2009 to’o ohin loron. Bazeia ba misaun FM ne’ebe atu esforsa ba Timor-Leste ida ne’ebé soberanu no sidadaun hotu-hotu sente seguru no protejidu; bazeia ba Deklarasaun Universál Direitus Umanus nian no mós Konstituisaun Repúblika Demokrátika Timor-Leste nian.
Ho ida ne’e mak, liu husi atividade FM nian, Kuarta, (09/02) Diretur Interinu FM Frei Guterres entrega ofisial livru tradusaun la-ofisial lei husi lian Portugez ba lian Tetum ba lejizlasaun seitor defeza no siguransa nian hamutuk 14 liu husi Segundu Komandante PNTL, Komisariu Afonso De Jeusu hodi bele distribui ba Komandante PNTL iha distritu 13 iha teriotoria Timor-Leste.
Komisariu PNTL Afonso de Jesus apresia tebes ba Fundasaun Mahein ninia kontribuisaun ba instituisaun PNTL liu husi tradusaun lei ba lejizlasaun seitor defeza no siguransa atu bele ajuda serivu instituisaun PNTL diak liu tan. Tanba durante ne’e instituisaun PNTL hetan difikuldade boot konaba lei sira ne’ebe produz iha lian Portugez ne’ebe halo komando no membru PNTL la kompriende diak konaba lei organiku PNTL nian.
Atu bele hetan informasaun diak liu tan bele klik video ne’e.
