Projetu Suai Supply Base: Dezenvolvimentu ka Ameasa?

Foto: La'o Hamutuk

Fundasaun Mahein, 29 Agostu 2013

Komunikadu Imprenza

Liu husi Mahein Nia Lian Nú. 57 (Relatoriu kompletu versaun tetun,pdf), (English Version.pdf) ne’e halo análiza kona-bá Planu Dezenvovlimentu Nasional – PEDN ne’ebé atu implementa projetu lubuk ida iha Kosta Sul ho naran Projetu Tasi-Mane, partikularmente projetu Suai Supply Base – SSB iha Camanasa – Suai. Governu nia espetativa projetu SSB sei fo oportunidade ka benefisiu ekonomiku sustentavel ba longu prazu maka fo kampu serbisu ba komunidade, treinamentu no edukasaun, hamosu atividade negosiu foun iha komunidade, atrai investimentu husi seitór seluk, promove produtu lokal, hasa’e kresimentu ekonomia.

Maibe projetu SSB la’os deit fo oportunidade ka benefisiu ba povu Timor-Leste, partikularmente komunidade Camanasa, iha ameasa balun ne’ebé hafalun an nu’udar tentativa ida ba estabilidade nasional iha futuru. Hanesan problema baliza rai entre Dais no Sanfuk ne’ebé sei iha dispusta laran, kestaun kampu traballdor, kestaun kompensasaun “Direta no “Indireta” ne’ebé laiha esplikasaun klaru husi parte Govenu.

Parte Governu dehan katak kompensasaun “Indireta” komunidade Camanasa sei hetan lukru 10% husi projetu SBB durante tinan 150 nia laran. Maibe tuir versaun komunidade kompensasaun “Indireta” ne’e Governu tenki seluk fulan-fulan $.1000.00 ba kada ema ida ne’ebé ninia rai tama ona parselas. Karik Governu la halo tuir maka komunidade sei halo boikota fila fali sira nia rai, maske entrega ona ba Governu.

Nune’e mos kestaun kampu traballu no Nova Suai ne’ebé sai mos preoukupasaun komunidade afeitadu sira. FM nia peskiza identifika katak komunidade sira hadau malu kona-bá kampu traballu. Nomos komunidade afeitadu sira husi Suku Hat hotu-hotu hakarak hela iha Nova Suai tanba sira entrega ona sira nia rai no riku-soin ba Governu atu harii projetu SSB. Maibe laiha esplikasaun klaru husi Governu se maka bele hela iha Nova Suai ne’e. Governu dehan deit Nova Suai ema maka hela, laos animal.

Impaktu seluk ba komunidade maka ameasa ambiental no kultural. Dadaun ne’e area ne’ebé kobre ba projetu SSB sei estraga rai bokur komunidade, plantasaun, ai-horis no we matan ne’ebé durante ne’e fo ar fresku ba komunidade, animal no balada-fuik sira. Nune’e mos sei afeita fatin lulik, rai lulik no lagua lulik inklui semiteru sira. Tanba tuir timor-oan nia fiar katak, wainhira ema kontra Lulik, nia sei hetan kastigu iha ninia moris. Kastigu ida ne’e la’ós de’it individual refere (ema ne’ebé kontra Lulik) maibe bele mos afeita ba ninia inan-aman, maun, alin, feton, ka membru familia seluk inklui ba komunidade tomak.

Rekomendasaun

1. Rekomenda ba Governu atu aslera lalais esbosu Lei kona-bá rai no lori ba Parlamentu Nasional atu halo aprovasaun hodi nune’e defini lolos nain ba rai. No, kontinua halo mediasaun hodi rezolve lalais problema rai entre Dais ho Sanfuk ne’ebé to’o ohin loron seidauk rezolve atu bele evita tensaun konflitu entre komunidade iha futuru.

2. Rekomenda ba Ministériu Petroliu no Rekursu Minarais no Sekretariu Estadu Meiu Ambiente atu kria mekanizmu legal hodi regula kompañia sira ne’ebé sei implementa projetu SSB atu nafatin garantia valor ba konservasaun ambiental hodi nune’e labele hamosu impaktu ne’ebé fo ameasa ba komunidade.

3. Rekomenda ba Ministériu Petroliu no Rekursu Minarais inklui Timor Gap atu halo indeminizasaun lolos ba komunidade afeitadu ne’ebé oferese ona sira rai no riku-soin sira. No tenki esplika klaru kona-bá kompensasaun “indireta” inklui benefisiu seluk atu nune’e labele hamosu fali tensaun konflitu iha futuru.

Atu hatene kle’an liu konaba asuntu ne’e bele kontaktu:

Nélson Belo,
Direktor Fundasaun Mahein
Web: www.fundasaunmahein.org
Email: direktor.mahein@gmail.com
Tlp: +670 7737 4222