Espekulasaun Informasaun no Desizaun Lori Fila Dadur Juga Gama no Alcino M. Pereira

Dadur Nain rua “Juga Gama no Alcino M. Pereira ne’ebe halai lakon

Fundasaun Mahein, 18 Agustu 2014

Komunikadu Imprensa

Hafoin dadur sira iha Prizaun Bekora halai sai iha loron 2 fulan Novembru tinan 2013, autoridade siguransa kaptura fila fali dadur na’in rua nulu resin rua no restu rua seluk to’o agora seidauk hetene nia paradeiru. Dadur na’in rua ne’e maka Juga Gama no Alcino M. Pereira. Juga Gama komete ilisitu droga iha tinan 2012 no Alcino M. Pereira komete krime oho Patraun Garden Beach iha tinan 2012.

Besik tinan ida ona seidauk hatene sira na’in rua nia paradeiru. Espekulasaun informasaun ka rumoris ne’ebé serkula iha públiku katak sira na’in rua halai sai ona husi teritoriu Timor-Leste nian. Esforsu atu kaptura Juga Gama no Alcino M. Pereira durante ne’e sai hanesan notisia prinsipal iha media nasional hotu-hotu kada semana.

Iha semana hirak liu ba ulun boot Estadu Timor-Leste nian liu husi media nasional fo sai katak dadur na’in rua nia paradeiru dadaun ne’e iha Indonezia no sei esforsu atu kaptura fila fali.

FM nia preokupasaun katak deklarasaun sira ne’ebé fo sai la iha responsabilidade no ami konsidera katak informasaun ne’ebé ulun boot sira hasai hanesan rumoris deit no la iha dadus kredivel ruma kona-bá dadur na’in rua nia paradeiru. Nune’e mos deklarasaun hirak ne’e hasusar deit serbisu informasaun nian.

Karik dadur na’in rua nia paradeiru iha Indonezia. Siguransa fronteira iha ne’ebé nune’e sira na’in rua hakat liu ba Indonezia? Esforsu atu kaptura ne’e oinsa? Portantu se maka bele ejekuta esforsu hirak ne’e? Bainhira maka bele ejekuta?

Ka Juga Gama no Alcino M. Pereira ema importante ida? Ami hanoin katak sira na’in rua la importante ba siguransa nasional no hanesan amaesa, karik importante ba interese seluk. Ka Juga Gama no Alcino M. Pereira hanesan objetu ida hodi hakle’an tan informasaun seluk hodi buka tuir se maka iha sira na’in rua nia kotuk?

Juga Gama no Alcino M. Pereira nia paradeiru ne’ebé la klaru, karik iha intervensaun husi ema ruma hodi asegura sira na’in rua? Iha ne’ebé besik tinan ida ona seidauk hatene lolos sira na’in rua nia paradeiru no kaptura.

FM rekomenda ba instituisaun siguransa no judisial nian presiza iha koordenasaun integradu ida liu husi Interpol komunika ba nasaun viziñu karik halai ona ba nasaun viziñu balu, hodi buka tuir sira na’in rua nia paradeiru.

FM rekomenda katak deklarasaun hirak ne’ebé ulun boot sira hasai presiza seriu iha orientasaun no ejekusaun hodi kaptura dadur na’in rua ne’e. Portantu besik tinan ida ona seidauk hatene nia paradeiru no kaptura.

Portantu, ami nia preokupasaun dadur na’in rua hanesan dezafiu boot ba instituisaun siguransa no hamonu kredibilidade instituisaun siguransa nian.

Atu hatene kle’an liu kona-bá asuntu ne’e bele kontaktu:

Nélson Belo
Diretur Ezekutivu
Website: www.fundasaunmahein.org
E-mail: direktor.mahein@gmail.com
Tlp: +670 7737 4222 ka 77561184