Fundasaun Mahein (FM), 3 Jullu 2020
Komunikadu Imprensa
Polísia Nasional Timor-Leste (PNTL) nia Lei Orgânika dahuluk aprova iha tinan 2004 no liu tiha Krize 2006 iha tinan 2009 halo revizaun dahuluk ba Lei ne’e. Revizaun ne’ebé halo iha tinan 2009, PNTL adopta estratéjia no filozofia polisiamentu iha karakteristika Polísia Komunitária. Modelu polisiamentu ida ne’e halo servisu PNTL nian sai vizivel liu tan no harii hikas konfiansa komunidade nian ba PNTL.
Planu Estratéjiku PNTL 2014-2018 asaun ida maka revizaun no elaborasaun ba lejislasaun prinsipal sira, inklui Dekretu Lei n.o 9/2009 de 18 de Fevereiro, Lei Orgânika PNTL nian. Maske nune’e, to’o tinan 2020 esbosu revizaun ba Orgânika PNTL nian foin konklui no daudaun ne’e iha ona faze diskusaun iha Komandu Jeral PNTL no Ministériu Interior.
Preimeiru, Fundasaun Mahein (FM) apresia esforsu Ministériu Interior ho Komandu Jeral PNTL nian hodi halo revizaun ba Lei Orgânika PNTL nian nu’udar parte integrante ida iha reforma setor seguransa nian. Maske revizaun ne’e la’o neneik maibe esforsu ne’e responde ba Planu Estratéjiku PNTL nian ne’ebé expire ona iha tinan 2018 no liu ona tinan rua seidauk iha Planu Estratéjiku foun ba PNTL.
Segundu, esbosu ka Projetu Dekretu-Lei Orgânika PNTL ne’ebé mahar tebes hamutuk pajina 61 no nia dispozisaun sira hamutuk artigu 91 maibe dokumentu mahar ida ne’e Copy-Paste deit husi lei orgânika polísia-paramilitar Portugal nian. Liu-liu kopia husi Lei n.o 2/2007 de 6 de Novembro, Orgânica da Guarda Nacional Republicana nian. FM apresia mos servisu Asesor sira husi Guarda Nacional Republicana (GNR) Portugal nian hodi tulun PNTL sai polísia ida profesional. Maibe Projetu Dekretu-Lei Orgânika PNTL ne’ebé elabora husi Asesor sira kopia lolos husi Lei Orgânika GNR nian no la refleta ho natureza polisiamentu PNTL nian. Portantu, GNR hanesan forsa seguransa ida ne’ebé nia natureza militar no PNTL hanesan forsa seguransa ida ne’ebé nia natureza sivil no nia estratéjia no filozofia polisiamentu, iha karakteristika polísia komunitária.
Terseiru, tamba Copy-Paste deit husi Orgânika GNR nian entau Estutura Komandu PNTL nian iha Projetu Dekretu-Lei ne’e hanesan mos akontese iha Komandu GNR nian ne’ebé ho natureza militar. Nune’e, estratéjia no filozofia polisiamentu PNTL nian ne’ebé hatuur iha Projetu Dekretu-Lei ne’e “polísia komunitária” sei sai hanesan slogan deit.
Kuartu, Projetu Dekretu-Lei ne’e hamosu unidade sira ne’ebé la nesesariu no habokur deit estrutura Komandu PNTL nian. Exemplu, unidade foun ne’ebé sei harii maka Unidade Manutensaun Ordem Públika no Unidade Polísia Fiskal no Aduaneira. Maibe PNTL mukit ba rekursu no unidade sira ne’e dupla deit servisu sira iha institusaun seluk nian.
Kintu, Projetu Dekretu-Lei ne’e mai hakloot liu tan kompetênsia sira servisu no departamentu sira PNTL nian. Ezemplu Servisu Investigasaun Kriminal muda ba departamentu no altera tiha kompetensia balu. Alterasaun kompetênsia sira iha investigasaun kriminal nian hodi hamosu fali Unidade Polísia Fiskal no Aduaneira nomos Departamentu Protesaun Natureza. Maske servisu sira unidade no departamentu ne’e nian durante ne’e hala’o husi Unidade Investigasaun Kriminal iha âmbitu investigasaun kriminal.
Sestu, iha Projetu Dekretu-Lei ne’e fó kompetênsia ba Departametu Polisiamentu Komunitária hadau tiha kompetênsia sira ne’ebé durante ne’e hala’o husi Ofisial Polísia Suku (OPS) liu-liu iha servisu sira negosiasaun, mediasaun no prevensaun konflitu ka krime. Lolos Departamentu Polisiamentu Komunitária haree liu ba area estratéjiku sira hodi tulun Komandu PNTL iha âmbitu supervizaun no ezekusaun modelu polisiamentu komunitaria ne’ebé PNTL adopta. Portantu polisiamentu komunitaria la’os unidade ka departamentu ida nian maibe membru PNTL tomak hala’o polisiamentu komunitária. Hanesan hatuur ona iha Projetu Dekretu-Lei ne’e katak polisia komunitária hanesan estratéjia no filozofia polisiamentu PNTL nian.
Tamba Projetu Dekretu-Lei ne’e Copy-Paste deit no karik pasa ka hetan aprovasaun, PNTL sei lakon ninia natureza lolos hanesan “polísia komunitária” no subtitui hanesan “polísia paramilitar ida” nu’udar modelu ne’ebé GNR adopta. Nune’e mos PNTL nia situasaun, liu-liu unidade no departamentu foun sira sei hahu fila-fali husi zero, hanesan infra-estrutura, fasilidade, ekipamentu, formasaun no pesoal sira.
Rekomendasaun
FM rekomenda ba Ministériu Interior no Komandu Jeral PNTL haree fila-fali Projetu Dekretu-Lei ne’e no dezenvolve tuir natureza polisiamentu PNTL nian “polísia komunitária” ne’ebé durante ne’e halo no PNTL nia servisu sai vizivel no hetan konfiansa maka’as husi komunidade. Nune’e mos iha nivel global tuir Global Police Index 2019 PNTL nia rank 67 husi nasaun sira iha mundu no númeru datolu iha rejiaun Sudesta Aziatiku.
Atu hetan informasaun kle’an liu kona-bá asuntu ne’e bele kontaktu:
João Almeida
Acting Director
Email: almeidamahein@gmail.com
Telemovel: (+670) 7756 1184 / 77103346
Website: www.fundasaunmahein.org
