Foto : Fundasaun Mahein
Iha dia 19 Setembru 2023, Fundasaun Mahein (FM) hala’o enkontru primeiru ho ninia Board foun. Enkontru ne’e hanesan milestone ka atinjimentu xave ida ligadu ho prosesu reformasaun institusionál FM nian. Ojetivu prosesu ida ne’e mak atu haforsa organizasaun nia jestaun no sistema internál sira, atu nune’e hadia efetivdade organizasaun nian, no ajuda organizasaun atu implementa ami misaun di’ak liu tan.
Aleinde FM nia Diretor Ezekutivu ho membru staff balun, membru Board foun sira hotu partisipa iha enkontru ne’e, hanesan: Sr Fidelis Magalhães, Sr João Sarmento, Sra. Florida Marques, no Sr. Fransisco da Silva Gary.
Board diskute konaba asuntu importante balun, inklui nomeasaun Prezidente Board no Terzoriu Board, Board nia papél no responsabilidade sira, no FM nia Planu Estratéjiku ba tinan 2024-2026 nian. Enkontru tuir mai sei hala’o iha fulan 6 tan.
