http://www.google.tl/imgres?imgurl=http://3.bp.blogspot.com/
Fundasaun Mahein, 27 Maiu 2013
Komunikadu Imprenza
Iha Mahein Nia Lian Nú. 53 (relatoriu kumpletu versaun tetun, pdf) (English Version) ne’e halo análiza kona-bá “Serbisu Militar Obrigatóriu iha Timor-Leste” ne’ebé oras ne’e dadaun lidera husi Gabinete Prezidensia Repúblika nian hahu ona halo estudu no konsultasaun. Bainhira Sr. Taur Matan Ruak (TMR) sai nu’udar kandidatu ba Prezidente Repúblika ba periodu 2012-2017, serbisu militar obrigatóriu nu’udar programa prinsipal ida ba programa polítika kandidatu ne’e nian. Durante tempu kampañia, kandidatu TMR defende katak serbisu militar obrigatóriu nu’udar programa kampañia númeru lima. Programa ne’e sai tiha ona nu’udar mehi ida kleur TMR nian, tan iha tinan 2007-2008, bainhira TMR kaer hela Komandu F-FDTL hatama proposta programa ne’e ba iha Parlamentu Nasional no Governu iha tempu ne’eba hodi hetan aprovasaun. Maske, ikus mai laiha resposta ruma husi Governu no Parlamentu Nasional ba proposta TMR nian ne’e. Maibe, Kandidatu TMR eleitu nu’udar Prezidente da Repúblika (PR), hahu dudu programa ne’e. PR estabelese ona ekipa ida ne’ebé lidera husi Gabinete PR nian hodi halo estudu komparativu no konsultasaun.
Objetivu husi relatoriu ne’e hodi kontribui hanoin ruma kona-bá programa serbisu militar obrigatóriu liu-liu atu dezafia programa ida ne’e. Fundasaun Mahein (FM) iha razaun prinsipal tolu tansa FM kestiona ba programa serbisu militar obrigatóriu. Dahuluk; tan razaun enkuadramentu legal, daruak; tan razaun prioridade polítika Governu nian kona-bá área siguransa no defeza, datoluk; tan razaun estratéjiku.
Razaun sira defini tiha ona iha leten, FM hare iha pontu dahuluk PR la iha kompetensia atu formula kualker polítika defeza nian hanesan oras ne’e dadaun PR esforsu hela kona-bá serbisu militar obrigatóriu ka definisaun ne’ebé formula husi PR Sidadania Sivika no Patriota. Maibe kompetensia ida ne’e monu ba Governu nian kompetensia nu’udar mandatu konstituisional ne’ebé Konstituisaun RDTL Artigu 103, Artigu 107, no Artigu 108 hatete momos katak Governu maka iha responsabilidade atu define polítika no programa jeral nasaun nian.
Pontu seluk husi razaun hirak ne’e maka Dokumentu Plano Força 2020, Planu Estratéjiku Dezenvolvimentu Nasional no Programa V Governu Konstitusional 2012-2017 la temi ho kle’an kona-bá serbisu militar obrigatoriu iha Timor-Leste. Entaun, oinsa programa serbisu militar obrigatóriu PR bele iha ligasaun ho dokumentu polítika ezekutivu nian?
Ikus liu, tan razaun estratejiku, programa ne’e la’os mosu deit nune’e, tenki iha mudansa jeoestratéjiku ruma ne’ebé dramátiku tebe-tebes iha rejiaun ne’ebé sisi Estadu hodi mosu ho konseitu serbisu militar obrigatório. Signifika iha nasaun balu maka konstitui ameasa ba soberania no integridade territorial RDTL. Planu Força 2020 identifika Indonézia nu’udar ameasa externa ida boot, maibe, tenki tau iha kalkulasaun estratéjiku katak Indonézia agora la’os ona Indonézia ida iha rejime Soeharto nia okos. Presiza duni rekuiñese katak bele hamosu mudansa lideransa iha Indonézia ka Timor-Leste ne’ebé bele tau iha risku relasaun amigável ne’ebé nasaun rua durante ne’e goja hela. Bele hamosu lideransa foun ne’ebé lakohi hakoi buat dodok sira iha pasadu maibe hakarak lori buat sira ne’e ba iha justisa formal hanesan tribunal internasional. Ne’e bele lori impaktu boot tebes ba dínamika relasaun entre nasaun rua ne’e nian. Bainhira moris ona iha ambiente ida nune’e, nasaun rua bele haree malu nu’udar ameasa konvesional boot ba siguransa. Karik ida ne’e maka nu’udar hanoin ka pensamentu ne’ebé dudu PR hodi hamosu programa Sidadania Sívika Patriota, entaun presiza esplika ho klaru iha rasionalizasaun programa ne’e.
Maske iha razaun balu husi PR katak implementasaun programa serbisu militar obrigatóriu ba foin-sa’e sira iha programa ida hanaran ”Sidadania Sívika Patriota (SSP) ne’ebé iha objetivu hodi hasa’e sentidu nasionalismu no patriotismu, atu nune’e, kontribui ba defeza soberania no integridade territorial nasaun nia. Nune’e mos programa ne’e sei haforti nasionalismu, sidadania, no hametin liután konsiênsia foin-sa’e sira nian ba sosiedade, hametin disiplina moral, kontribui ba halakon dezempregu no redus droga no krime sira ne’ebé iha relasaun ho arte marsiais.
Rekomendasaun :
1. Casa Militar PR hamosu deit planu ida atu halo estudu ida kona-bá importânsia Timor-Leste define polítika defeza foun tan Planu Força 2020 mos lakon tiha ona relevânsia balu iha kontextu ohin-loron no responsabilidade ida ne’e dudu ba Governu nian kompetensia.
2. Casa Militar PR presiza halo konsulta kle’an liu tan kona-bá Timor-Leste aplika serbisu militar obrigatóriu husi entidade hotu husi nasional no nivel komunidade.
3. Investe ba seitor prinsipal sira seluk hanesan edukasaun, saúde, agrikultura no seitor prinsipal seluk tanba serbisu militar obrigatóriu sei aumenta deit despeza Estadu nian.
Atu hatene kle’an liu kona-bá asuntu ne’e bele kontaktu:
Diretor Ezekutivu Fundasaun Mahein Nélson Belo, email: nelson@fundasaunmahein.org no Tlp +670 7737 4222 ka Adjuntu Diretor João Almeida, email: joao@fundasaunmahein.org no Telp +670 77561184. Website : www.fundasaunmahein.org
Hau fo apoyo tomak ba senor presidente,,,,servizo militar ne importante
Presija halo estudu ida ne’ebe klean antes atun implementa….
Mais ema to’o ga lae, tamba rekursus humanus ba Munipal mos la to’o ona, ba fali militar Obrigatoriu.
Sim ida nee loos, nebee ita tau hanoin ba malu nafatin, maibe itahotu lalika pesimista ba ida nee..abraco.
Desde hau rona kona ba serbisu militar obrigatoriu, 2012 sira momentu nebaa, hau hanoin kedas katak, karik ita iha posibilidade atu Impelmenta Serbisu Militar Obrigatoria nee ka lae? Husi nebaa hau komesa hanoin kona ba nia benefisiu sira deit, liu liu ba ita nia rain.
Iha Korea do Sul. Militar obrigatoriu vale ba mane sira nee obrigatoriu duni no ba feto sira ne librdade katak. katak Joven sira, wahinria remata nia estudus husi nivel sekundariu, ba joven mane sira obrigatoriamente tama militar, no ba joven feto sira hakarak bale la iha obrigasaun. Depois hotu tiha tinan tolu, mak sira foin ida-idak deside hakarak kontinua vida militar ka, hakarak sai ba vida sivil hodi kontinua nia esutudu. Nebee, kuandu sira sai husi vida militar mos sira matura duni ona. Sira komprende makas liu kona edukasaun sivika, lei, vida sosial, no moss fo proteksaun ba ninia an rasik no sosiedade(Fo apoio total no kaer metin ba prinsipiu nebee loos).Informasaun hirak hau hetan husi funsionariu Universitariu ida iha korea do Sul, la detallu liu mais pelu menus ideia nee hanesan nee.
Nebee fila fali Timor nia situasaun husi Timor hahu too agora, hau hanoin katak wahira ita iha hanoin deha katak atu implementa Servisu Militar Obrigatoria, nee foo benefisu boot ba Timor.
Bele eduka foin sae sira atu hatene duni edukasaun sivika, hatene no kaer metin prisipius nebee loos, em relasaun ba desenvolvimetu nasional, husi nee sentimentu patriotismu no nasiolismo sei makas liu tan, tamaba ita hotu hatene ita rain nee sei presiza atu muda duni, mentalidade nebee la fo benefisiu.
Apoio 100%..
Avanca…compatriotas
ABRACO…