Impaktu Estrada A’at Ba Siguransa Públiku

Estrada a'at iha Portu tasi ibun

Fundasaun Mahein, 24 Maiu 2013

Komunikadu Imprenza

Liu husi Mahein Nia Lian Nú. 52 (relatotiu kumpletu versaun tetun,pdf) ne’e analiza klean kona-bá impaktu estrada aat iha teritoriu Timor-Leste ne’ebé konsidera fo ameasa ba siguransa públiku. Infra-estrutura (estrada) nu’udar pilar importante tebes ba dezenvolvimentu nasional. Maibe realidade estrada iha teritoriu Timor-Leste barak maka aat no la favorese nu’udar dezafiu ida ba prosesu dezenvolvimentu nasional.

Liu ona dekade ida Timor-Leste hetan independensia maibe asuntu infra-estrutura hanesan Estrada sei problematiku tebes. Faktus hatudu mai ita katak kuaze estrada sira iha teritoriu Timor-Leste sai preokupasaun ba entidades tomak iha nasaun ida ne’e. Kondisaun Estrada iha teritoriu laran kuaze aat hanesan parte Leste nian maka Distritu Viqueque, Lautem, Mantuto no Baucau. Nune’e mos iha Distritu parte Oeste no Norte maka Distritu Covalima, Bobonaro, Maliana, Aileu, Ainaro iklui mos iha rejiaun Oe-Cusse.

Fatór sira ne’ebé sai nu’udar kauza ba Estrada kuak no aat maka problema rekursu umanu husi kompañia ne’ebé halo rehabilitasaun prejudika Estrada laiha kualidade. Aumenta tan klima/udan ne’ebé tun hodi naliun iha Estrada halo alktraun sai kuak no nakloke. Nune’e mos Estrada ne’ebé laiha valeta fasil hetan estragus husi udan been. Ironiku liu tan laiha sistema kordenasaun entre Sekretariu Estadu Agua no Saneamentu ho kompañia Telekomunikasaun wainhira ke’e estrada ninia atu kanaliza kanu bee nian no instala fiu telekomunikasaun fo impaktu ba estrada sai aat hotu.

Impaktu husi estrada aat iha teritoriu Timor-Leste fo amesa boot ba movimentu transporte inklui siguransa moris komunidade nian. Tanba wainhira Estrada aat bele hafasil asidenti trafiku ne’ebé afeita ba siguransa umanu nian. Bele mos hasusar ba inan-feto sira ne’ebé presiza atu hetan asistensia saude wainhira atu partus inklui mos komunidade sira seluk ne’ebé moras. Seluk maka fo impaktu mos ba serbisu Polisia Nasional Timor-Leste – PNTL atu halo patrollamentu iha area rural nomos atu atua konflitu ruma ho lalais.

Parte seluk maka wainhira komunidade barak labele asesu merkadu hodi faan produtu lokal atu hetan rendementu, susar asesu saude no edukasaun bele hamosu hanoin negativu hodi halo violensia ne’ebé bele estraga siguransa umanu no siguransa nasional.

Rekomendasaun:

1. Rekomenda ba Governu atu halo estudu tekniku ne’ebé profundu antes fo projetu ba kompañia atu nune’e bele garantia kualidade estrada ne’ebé diak. Nomos Governu tenki perpara rekursu umanu ne’ebé adekuadu atu nune’e bele halo supervizaun ba projetu rehabilitasaun estrada ho diak.

2. Rekomenda ba Ministeriu Infra-estrutura atu kontrola no regula ba movimentu kareta boot ne’ebé tula kontainer atu labele tula sasan ne’ebé ninia volume boot liu ho kapasidade estrada nian. No, tenki fo sansaun ba kompañia sira ne’ebé hadi’a estrada la tuir estandar ne’ebé Governu hatur tiha ona.

3. Rekomenda ba Ministériu Infra-estrutura atu halo manutensaun rutina ba estrada no rehabilitasaun sedu ba estrada kuak sira atu nune’e labele fo impaktu ba estrada sai aat wainhira tempu udan.

4. Rekomenda ba Governu presiza iha planu integradu ba infra-estrutura nasional nian, liu husi Sekretaria Estadu Obras Públiku, Sekretaria Estadu Eletresidade, Agua no Saneamentu no Ministériu Transporte no Telekomunikasaun atu halo koordenasaun serbisu. Ezemplu kona-bá estrada ohin halo, aban sobu halo kanalizasaun bee mos no monta fiu telekomunikassaun no bain rua taka estrada kuak ne’ebé ikus implika estrada kontinua aat no kontinua loke kuak – taka kuak.

5. Rekomenda ba Ajensia Dezenvolvimentu Nasional – ADN atu halo supervizaun ne’ebé kle’an ba projetu husi kompañia atu nune’e bele fornese kondisaun estrada ne’ebé kualidade.

Atu hatene klean liu kona-bá asuntu ne’e bele kontaktu:

Nélson Belo
Diretur Fundasaun Mahein
Website : www.fundasaunmahein.org
Email: nelson@fundasaunmahein.org
Tlp +670 7737 4222