Estudante Involve iha Asidente Fatal

(Foto: Internet)

Fundasaun Mahein (FM), 12 Dezembru 2014

Komunikadu Imprensa

Fundasaun Mahein (FM) hakarak fo hatene ba públiku kona-bá asidente fatal ne’ebé akontense iha loron 11/12/14 ne’ebé rezulta estudante nain rua mate tamba kauza hosi asidente trafiku motor.
Relasaun ho ida ne’e tuir Fundasaun Mahein nia monitorizasaun iha terinu katak estudante sira rona rezuldadu husi izame final, depois estudante nain 3 sae lisuk motor ida, nain 2 uza kapisete no nain 1 la uza nomos laiha kartaun kondusaun.
Tanba kontra regra tranzitu halai iha estrada públiku, polisia duni tuir sira hosi kotuk, halo sira tauk no trauma hodi halai motor ho velosidade aas, ikus mai rezulta asidente fatal iha Bidau Santa Ana.

Tuir observasaun husi FM katak estudante feto nain rua lakon sira nia vida iha Hospital Nasional Guido Valadares (HNGV), nain ida hetan kanek.

Fundasaun Mahein lamenta tebes ho PNTL ne’ebé duni estudante sira hosi kotuk. Lolos PNTL halo cek point antisipasaun antes durante semana balun nia laran. Antisipasaun cek point hanesan sintidu atu reduz asidente ba estudante sira, nune’e mos ba motorista sira seluk ne’ebe laiha karta kondusaun ba lori motor ho kareta iha estrada públiku. Tamba asidente trafiku sira hanesan ne’e sempre akontese kada tinan-tinan depois estudante sira rona rezultadu ikus husi izame nasional.

Rekomendasaun

• Fundasaun Mahein rekomenda ba Governu liu-liu Ministeriu Transporte Telekomunikasaun, Diresaun Nasional Transporte Terestre (DNTT) atu kopera hamutuk ho PNTL aplika lei kodiku uza estrada nian ho regurozu.
• Rekomenda ba PNTL atu halo cek point antisipasaun ba eventu ne’ebé deit mak nota bele sai risku ba asidente fatal.

Atu hatene kle’an liu kona-bá asuntu ne’e bele kontaktu:

João Almeida
Vise Diretor FM
Web: www.fundasaunmahein.org
E-mail: joao@fundasaunmahein.org
Telefone (+670) 77561184