Fundasaun Mahein
Iha fulan Juñu 2012, Fundasaun Mahein (FM) hetan surpreza diak ida tanba husi Outreach Matrix nia hatudu katak vizitantes ne’ebé akompanha FM nian website durante Juñu aumenta sa’e maka’as liu tan kompara ho fulan hirak liu ba. Durante Juñu 2012 vizitantes sa’e to’o hamutuk 3.395. Ida ne’e hatudu katak kada fulan vizitantes ba portal ofisial FM sempre iha mudansa (Janeiru 2012 1.497, Febreiru 2012 hamuruk 1.853, Marsu 2012 hamutuk 2.270, Abril 2012 hamutuk 2.229 no Maiu 2012 hamutuk 2.958).
Durante fulan Maiu no Juñu FM halo publikasaun 3 hanesan (MNL no. 34 Hanoin Ida Ba Prezidenti Republika Konaba Servisu Casa Militar, MNL no. 35 Asesu Informasaun Seitor Defeza no Singuransa ho Politika Lingua iha Timor-Leste no MNL no. 36 Partidu Politiku Sira Nia Politika ba Seitor Defeza no Siguransa iha Periodu 2012-2017). Publikasaun ba blog ne’ebé FM halo komentariu ba asuntu oi-oin ho relasaun seitor defeza no siguransa nian.
Nune’e mos FM realiza debate direta iha radio hamutuk dala 2 ho liu husi stasaun radio ne’ebé diferente mak hanesan Radio Liberdade ho topiku: “Siguransa Trafiku no Manajementu Estrada Publiku” ho orador Komandante Polisia Tranzitu Inspetor Xefi Antonio Soares, Diretur DNTT Silvetre de Oliveira ho Kordenador Peskiza FM, João Almeida. Nune’e mos iha Centru Radio Comunidade (CRC) ho topiku: “Siguransa Maritima no Eleisaun Parlamentar” ne’ebé ho orador mak Komandante Polisia Maritima, Lino Saldanha ho Kordenador Peskiza FM, João Almeida. Informasaun konaba debate ne’e bele hetan iha portal ofisial FM www.fundasaunmahein.org
Iha Juñu nia laran mos, FM hetan intervista husi jornalista nasional hamutuk dala 26 inklui ho jornalista internasional sira. FM mos hetan numeru boot konaba atividade FM ne’ebé publika iha media durante Juñu hamutuk 42, publikasaun hirak ne’e hanesan iha radio hamutuk 20, Jornal 12, online 9 inklui TV 1. Publikasaun ne’e la sura ho fulan Abril ho Maiu nian. FM mos hakarak sita katak portal ofisial Fundasaun Mahein ne’e kada lor-loron hetan vizita husi nasaun sira iha mundu tomak ho kuantidade maka’as mak hanesan: Indonezia, Amerika, Jerman, Australia, Japaun, Britania, New Zeland, Xina, Portugal, Hongkong, Korea du Sul, Singapura, Filipina, Canada, Tailandia no nasaun Europia sira inklui seluk-seluk tan.
Ho ida ne’e, FM hakarak agradese ba vizitantes sira hotu iha mundu tomak ne’ebé mak vizita ona portal FM. Vizitantes sira barak liu mai husi USA, Indonezia, Australia no Timor-Leste. FM fiar katak vizitantes hirak ne’e maioria estudantes timor oan sira ne’ebé dadaun estuda iha rai liur. Iha biban ne’e FM hakarak fo apresiasaun no agradese ba ita boot sira nia apoiu ne’ebé bele motiva FM hodi halo kontinuasaun FM nia servisu ba dezenvolvimentu seitor defeza no siguransa ho independente, transparansia no demkokratiku iha nasaun joven ida ne’e.
