Polêmika Exonerasaun kargu Chefe Estadu Maior F-FDTL no Solusaun sira

Iha loron 1 Dezembru 2021, Conselho de Ministros aprova projetu deliberasaun ida hodi exonera Brigadeiro General Coliati husi kargu Chefe Estado Maior (CEM) F-FDTL nian (Tatoli, 1 Dezembro 2021). Noticia ida ne’e hamosu polêmika iha sociedade nia leet no hetan resposta ida husi Brigadeiro General Coliati rasik kona-bá “exonerasaun” ne’e iha loron tuir mai. Tambá liafuan “exonerasaun” hanesan soke ida ba Brigadeiro General Coliati nian personalidade. Esplikasaun balu husi Chefe Estado Maior General Tenente General Lere Anan Timur katak exonerasaun ne’e hodi troka deit pozisaun, Brigadeiro General Coliati nomeia fali ba Diretor Instituto Defesa Nacional no Comodoro Pedro Klamar Fuik nomeia ba CEM F-FDTL nian. Nune’e mos husi Ministru Defesa Filomeno Paixão katak exonerasaun ne’e normal no sei hanesan proposta hato’o ba Presidente Repúblika hodi halo desizaun tuir kompetênsia Presidente Repúblika nian (Tempo Timor, 2 Dezembru 2021).

Iha âmbito ida ne’e, Fundasaun Mahein hakarak fahe ninia observasaun hodi fó klareza ba polêmika ne’e, relaciona proposta Governu nian hodi halo exonerasaun ba Brigadeiro General Coliati husi cargo CEM F-FDTL. Nune’e mos regra no mekanismu sira ne’ebé regula kona-bá exonerasaun no nomeasaun ba kargu sira a’as liu F-FDTL nian hanesan CEM F-FDTL.

Fator importante ida ne’ebé hamosu polêmika ne’e maka deliberasaun Conselho de Ministros nia la explika klaru proposta exonerasaun ne’e ho nia fundamentu sira. Inklui media sira mos la konsege halo nia kna’ar ho diak hodi husu esplikasaun klaro husi Governu kona-bá proposta exonerasaun ba CEM F-FDTL nian. Nune’e hamosu deit interpretasaun negativu ba liafuan “exonerasaun” hodi habelar deit polêmika ne’e.

Tuir Decreto-Lei n.^o 33/2020 de 2 de Setembro Novo Estatuto dos Militares das F-FDTL, n.^o 1 artigo 92 no Decreto do Governo n.° 6/2016, de 11 de Maio Regimento do Conselho Superior de Defesa Militar regula kona-bá mekanismu nomeasaun no exonerasaun ba kargu CEM F-FDTL. Iha ne’ebé processu hahu husi membru Governu ne’ebé kompetênsia iha área Defesa ka Ministru Defesa, atu halo audisaun no konsulta uluk ho Konsellu Superior Defesa Militar ne’ebé kompostu husi CEMGFA nomos Vice-CEMGFA, Komandantes Komponente sira, no preside husi Ministru Defesa. Hafoin hetan ona aprovasaun iha Konselho Superior Defesa Militar maka Ministru Defesa sei hato’o ba Conselho de Ministros atu hetan aprovasaun. Processu ikus liu sei hato’o proposta aprovasaun husi Conselho de Ministros ba Presidente Repúblika atu nomeia tuir dekreto Presidente no públika iha Jornal da Repúblika.

Iha kazu exonerasaun ba CEM Brigadeiro General Coliati nia processu foin hetan aprovasaun iha Conselho de Ministros. Processu ida ne’e seidauk final, tamba Conselho de Ministros sei hato’o proposta exonerasaun ba Presidente Repúblika. Maske ne’e kompetênsia Presidente Repúblika kona-bá exonerasaun no nomeasaun ba kargu CEM maibe sei consulta mos ho Konsellu Superior Defesa e Seguransa.

Nune’e mos proposta Governu nian kona-bá exonerasaun ba CEM F-FDTL la vincula desizaun Presidente da Repúblika. Tamba nomeasaun no exonerasaun ba kargu CEM F-FDTL ne’e kompetênsia Presidente Repúblika. Signifika katak Presidente Repúblika bele halo tuir proposta exonerasaun husi Governu ka bele mos rejeita proposta ne’e.

Brigadeiro General Coliati nomeia ba kargu CEM F-FDTL iha loron 29 Outubro 2018 ho mandatu durasaun tinan 2 tuir disposição artigo 75 Decreto-Lei n.^o 7/2014, de 12 de março, alterado pelo Decreto-Lei n.o 28/2016, de 13 julho Estatuto Militares F-FDTL no Decreto Presidente da República n.^o 45/2018 de 23 de Outubro. Mandato CEM F-FDTL bele renova dala-ida deit ho durasaun ne’ebé hanesan tuir Estatuto Militares F-FDTL nian.

Husi disposisaun legal iha leten ne’e, Brigadeiro General Coliati nia mandatu nu’udar CEM F-FDTL ramata ona iha loron 29 Outubru 2020 no lolos iha tempo ne’eba Governu halo ona nomeasaun foun ka extensaun ba kargu CEM F-FDTL. Maibe Governu husik deit kargu CEM F-FDTL iha situasaun interinidade to’o ohin loron. Liu tiha tinan ida Governu halo proposta exonerasaun ho polêmika. 

Iha sorin seluk, antes Brigadeiro General Coliati nia mandatu ramata nu’udar CEM F-FDTL iha loron 29 Outubru 2020, iha fulan Setembru 2020 Governu hamosu uluk Novo Estatuto Militares F-FDTL (Decreto-Lei n.^o 33/2020 de 2 de Setembro Novo Estatuto dos Militares das F-FDTL ) hodi revoga tiha Estatuto Militares F-FDTL anterior (Decreto-Lei n.^o 7/2014, de 12 de março, alterado pelo Decreto-Lei n.o 28/2016, de 13 julho). Kontinua ho Estatuto Militar F-FDTL foun (Decreto-Lei n.^o 33/2020 de 2 de Setembro, Novo Estatuto dos Militares das F-FDTL), mandato CEM F-FDTL ne’ebé regula iha n.^o 2 artigo 92, mandato CEM F-FDTL nia duração tinan 2 no bele halo renovação dala-ida deit ho duração ne’ebé hanesan. Maibe Governo nafatin la procede nomeação foun ou recondução ba cargo CEM F-FDTL desde Novo Estatuto Militar F-FDTL tama iha vigor.

Husi observasaun iha leten ne’e, Fundasaun Mahein konklui katak:

1. Mesmu Governu halo ona proposta exonerasaun ba Brigadeiro General Coliati husi kargu CEM F-FDTL maibe la automatikamente exonera ona husi kargu CEM F-FDTL no proposta ne’e la vinkula Presidente Repúblika nia desizaun. Tambá nomeasaun no exonerasaun ba kargu CEM F-FDTL ne’e kompetênsia Presidente Repúblika nian tuir dispozisaun alínea m) artigo 86 Konstituisaun RDTL, alínea e) artigo 14 Lei Defesa Nacional no n.^o 2 artigo 92 Decreto-Lei n.^o 33/2020 de 2 de Setembro, Novo Estatuto dos Militares das F-FDTL;
2. Bainhira Presidente Repúblika rejeita proposta Governu nian kona-bá exonerasaun ne’e, obrigatoriamente Governu apresenta proposta foun, ne’ebé regula iha n.^o 4 artigo 92 Decreto-Lei n.^o 33/2020 de 2 de Setembro, Novo Estatuto dos Militares das F-FDTL;
3. Brigadeiro General Coliati sei bele nomeia hikas ba kargu CEM F-FDTL, tambá foin assume kargu CEM F-FDTL ba tinan 2 husi tinan 2018 to’o 2020 no bele renova tan dala ida sura husi 29 Outubru 2020 to’o 29 Outubru 2022, tuir dispozisaun n.^o 2 artigo 92 Decreto-Lei n.^o 33/2020 de 2 de Setembro, Novo Estatuto dos Militares das F-FDTL.
4. Situasaun seluk, mesmu Brigadeiro General Coliati passa ona ba idade reforma (tuir n.^o 1 artigo 224 Decreto-Lei n.^o 33/2020 de 2 de Setembro, Novo Estatuto dos Militares das F-FDTL). Maibe hanesan oficiais generais ne’ebé sei efetivu servisu sei bele continua kaer kargu sira iha F-FDTL, tuir dispozisaun artigu 300 Dekreto-Lei n.^o 33/2020 de 2 de Setembro, Novo Estatuto dos Militares das F-FDTL.
5. Bainhira Presidente Repúblika simu proposta exonerasaun husi Governu nian no dekreta tuir dekretu Presidente Repúblika nian, ne’e mos tenke simu desizaun ne’e. Tambá exonerasaun Brigadeiro General Coliati husi kargu CEM F-FDTL la’os “demissão” husi F-FDTL no la’os mos exonerasaun ne’e tambá kazu ruma ne’ebé komete husi Brigadeiro General Coliati. Portantu explikasaun husi CEMG F-FDTL Tenente General Lere Anan Timur katak proposta exonerasaun Brigadeiro General Coliati husi kargu CEM F-FDTL hodi nomeia fali ba kargu Diretor Instituto Defesa Nacional no ida ne’e normal iha kareira militar hodi manan experiensia oin-oin iha área ne’ebé diferente.