Projetu Tasi-Mane nu’udar planu estadu ne’ebé ambisiozu hodi introduz dezenvolvimentu no forñese benefísiu oin-oin ba povu Timor liu husi dezenvolve industria petrolíferu iha kosta sul. Mesmu nune’e, komunidade afeitadu iha area kosta sul konsidera Governu la halo estudu klean hodi responde ba risku sosiál no ambiental ne’ebé lori impaktu ba komunidade nia moris loron-loron. Hosi inísiu implementasaun Projetu infrastrutura sira hanesan auto-estrada no Airportu iha Munisipiu Cova Lima to’o mai ohin-loron, komunidade sente iha mudansa infrastrutura pozitivu maibe komunidade sira mós insatisfaz ho sira nia direitu ne’ebé violadu, inklui limitasaun ba movimentu no asesesibilidade. Projetu resente mak perfurasaun mina iha rai maran. Ida ne’e mós kontinua sai preokupasaun komunidade afeitadu hosi inísiu implementasaun to’o agora.
Artigu ida ne’e sei foka liu-ba impaktu no esperiénsia komunidade afeitadu ba proejtu estadu iha Munisipiu Cova Lima, liu-liu ba Projetu Tasi Mane no perfurasaun mina iha “Feto Kmaus” ne’ebé implementa hosi kompañia Timor Resources. Iha artigu ida ne’e, Fundasaun Mahein (FM) tenta identifika no deskobre komunidade afeitadu hosi perfurasaun mina iha suku Matai sira nia esperiensia diskriminasaun no inseguransa ne’ebé sira ultrapasa, inklui oinsá governu proteje grupu vulnerável sira nia direitu ba rai no benefisiu saida mak komunidade afeitadu hetan hosi projetu estadu refere. Diskusaun iha artigu ida ne’e mós akumula informasaun sira kona-ba koñesimentu komunidade afeitadu ba projetu estadu rasik, oinsá komunidade partisipa iha sensibilizasaun projetu estadu, oinsá prosesu kompensasaun ba komunidade afeitadu, no papel organizasaun komunitáriu no sosiedade sivil partisipa iha advokasia ligadu direitu ba rai, inklui disputa rai ne’ebé akontese entre komunidade no autoridade estadu.
Benefisiu no impaktu Projetu Tasi Mane
Tuir FM nia observasaun, membru komunidade balun deklara katak sira sente diak tanba infraestrutura iha Munisipiu Cova Lima iha mudansa diak. Nu’udar ezemplu haktuir iha peskiza ida ne’e maka estrada iha sidade Cova Lima kuaze diak barak no ida ne’e hafasil komunidade nia viajen ka movimentu loron-loron. Maibé ba komunidade afeitadu iha area projetu estadu boot sente triste tanba iha prosesu implementasaun projetu ne’e la involve membru komunidade afeitadu sira iha prosesu foti dezisaun. FM identifika hosi komunidade afeitadu sira katak, hosi inísiu konsultasaun too iha implementasaun projetu informasaun barak mak la klaru no la informadu. Iha maioria parte, informasaun inportante sira too deit iha Autoridade Munisipal. Sistema rekrutamentu ba trabalhador sira mós la balansu no la transparante. Nune’e mos, organizasaun sosiedade sivil wainhira halo monitorizasaun ba área afeitadu, autoridade lokal sira la autoriza no taka informasaun. Governu tantu kompañia la esplika klaru kona-ba impaktu no risku ambiental ba komunidade afeitadu sira. Ikus mai, komunidade lakon sira nia rai, natar, kintal toos nian. Wainhira FM konfirma ho membru komunidade afeitadu sira no sosiedade sivil ne’ebé halo advokasia ba komunidade nia direitu ba rai hatudu katak komunidade sente la satisfaz, mesmu hetan ona pagamentu ba kompensasaun maibe montante osan sira ne’e la konsidera sustentável. Konsekuensia maka, komunidade sira sente dadaun impaktu hosi projetu estadu ne’ebé implika ba sira nia sustentabilidade ekonomia no la iha fatin atu hela tanba rai kompañia uza hotu ba projetu estadu.
Impaktu seluk identifika hosi organizasaun feto iha Cova Lima maka kazu violénsia bazeia ba jéneru no limitasaun direitu ba rai ba feto-sira. Iha ezemplu ida ne’e makaautoridade estadu (mane) hasoru feto-faluk iha suku Dato tolu, Postu Foheren, Munisipiu Cova Lima. Haktuir organizasaun asistensia ba feto iha Cova Lima katak, feto sira hetan problema disputa rai hosi autoridade estadu balun durante projetu Tasi Mane implementa. Tuir fontes FM asesu katak problema ne’e dadaun iha Tribunal no hein prosesu kontinuasaun. Mesmu nune’e, inan-feton iha problema ida ne’e hetan presaun bebeik ho karakter ameasa simples no abuzu poder hosi autoridade estadu hodi deskoraja no desmotiva inan-feto hodi defende nia-direitu ba rai. Situasaun ida ne’e, halo inan-feto sai tauk no la brani liután.
Impaktu auto-estrada seidauk rezolve
Hafoin auto-estrada inagura iha tinan 2019, autoridade Munisípiu hato’o bebeik limitasaun sira ba autoridade nasionál, inklui ba Ministru Obras Públika atu haree dalan alternativa ba komunidade, selae bele implika komunidade nia liberdade no kria risku iha futuru. FM mós halo ona peskiza iha área auto-estrada iha tinan 2020 ho rezultadu katak komunidade barak sofre impaktu negatívu. Problema primeiru no prinsipál ne’ebé governu seidauk rezolve maka dalan alternativu hodi fasilita komunidade asesu ba auto-estrada la iha, no ida ne’e fó impaktu ba komunidade no estudante sira hodi asesu ba edukasaun, saúde, atividade kulturál, no atividade ekonómiku. Tanba kuaze maoria komunidade iha suku Matai nia produsaun alimentar lokaliza iha auto-estrada sorin. Iha mós bairo ida konstitui hosi uma kain 70 resin mak hela iha estrada sorin. Iha kazu konkretu haktuir hosi komunidade afeitadu sira katak, komunidade sira wainhira asesu ba sira nia toos, bee matan lulik, inklui estudante ba eskola tenke halai korta auto-estrada, hafoin hakat besi (kawat) ne’ebé baliza ba auto-estrada. Ikus sira tenke tula ka hada ai halo aas hodi sira bele ultrapasa besi ne’ebé satan sira atu asesu ba auto-estrada sorin. Iha kazu balun, komunidade hahú tesi kotu tiha kawat atu sira bele asesu sira nia nesesidades báziku. Tuir experiensia haktuir hosi komunidade durante grupu diskusaun ne’ebé FM realiza maka, feto no labarik sira dala barak hetan dezastre wainhira hakat ka korta hosi auto-estrada. No Inan-feto sira mós monu beibeik wainhira hakat hosi baliza auto-estrada.
Aleinde dalan pasajeirus la iha, preokupasaun bo’ot segundu hosi komunidade afeitadu iha suku Matai mak impaktu no risku hosi kanalizasaun be dalan (saluran) hosi auto-estrada. Kuaze kanalizasaun hosi dalan auto-estrada husik fali ba komunidade, tanba ne’e wainhira tempu udan, bee sulin fali ba komunidade nia uma no estraga komunidade nia hela fatin, inklui toos, no simitériu. Risku seluk hosi kanalizasaun bee (saluran) ba komunidade maka wainhira tempu udan lori rai-mutin hotu ba komunidade, no estraga komunidade nia toos. Rai-mutin sira ne’e mai hosi auto-estrada ne’ebé kompañia husik hela iha estrada ninin. Informasaun hosi komunidade katak, sira nia toos ohin loron kuda batar ka ai-han ruma la moris tanba rai-mutin mak domina liu no halakon tiha rai-nia bokur. Haktuir hosi komunidade iha grupu diskusaun ne’ebé FM realiza iha fulan ida ne’e katak, iha fulan Novembru selebrasaun loron matebian nian, komunidade balun la konsege hetan rate balun iha simiteriu Matai tanba rai-mutin taka hotu wainhira udan bo’ot iha fulan Abril tinan ida ne’e.
Impaktu hosi Airportu Cova Lima
Airportu Cova Lima nu’udar mós parte ida hosi Projetu Tasi 8891Mane sai nu’udar mega projetu Estadu nian. Infelismente, dezde inaugurasaun iha 2017 ate agora seidauk iha aviaun regular liu-hosi airportu, no movimentu animál komunidade nian livremente tama-sai. Bazeia ba sikular hosi administrador Munisipiu no autoridade Munisipál Cova Lima hetan konkordansia hosi komunidade hotu atu tau-matan ba ida-idak nia animál hodi la tama Airportu laran. Preokupasaun atuál ba komunidade maka sira nia animál hanesan karau ho bibi hetan oho (tiru mate) hosi autoridade kompetente iha Airportu no ekipa seguransa ne’ebé halao kna’ar iha ne’ebá.
Komunidade preokupa tanba Airportu Cova Lima ne’e portaun loke no la iha seguransa, nune’e animál hanesan karau no bibi dalabarak tama ba Airportu laran. Komunidade sira mós alega katak, tuir sirkular hasai hosi autoridade lokál dekreta katak animal sira ne’ebé tama ba ambiente Airportu laran, bainhira autoridade seguransa oho sei lori ba uma mahon Salele. Maibe iha kazu konkretu animal sira ne’e oho no segurana sira mak koa fahe malu, tanba ne’e komunidade sente la satisfaz no la justu ba sira. Situasaun ne’e hatudu katak projetu estadu boot balun la konsidera komunidade nia moris no realidade, no to’o ohin loron kontinua sai ameasa ba komunidade afeitadu nia moris sósio-ekonómiku.
Perfurasaun Mina Rai maran
Projetu estadu seluk ne’ebé namanas hela mak perfurasaun mina rai maran iha suku Matai, Aldeia Quiar. FM nia monitorizasaun no peskiza iha baze hatudu lakunas ne’ebé klean entre governu, kompañia, no komunidade afeitadu. FM nia diskusaun ho komunidade afeitadu suku Matai ne’ebé konstitui hosi aldeia tolu (Quiar, Matai, Kunain) identifika katak hosi inisiu perfurasan ne’ebé hahú iha mina matan feto kmaus maka komunidade afeitadu sira sei dúvida ho prosesu no esplikasaun kona-ba oinsá konserva mina-teen. Mesmu Ekipa Konjunta Interministerial koalia kona-ba impaktu ambiental maibe sira la esplika kona-ba oinsá konserva perfurasaun mina nia armajen “pembuangan”.
Iha parte seluk, tuir asosiasaun Rede Cova Lima nia observasaun katak kompañia taka informasaun ba mídia, la autoriza sosiedade no komunidade sira asesu informasaun, no durante ne’e informasaun kona-ba perfurasaun la natoon hodi halo advokasia. Mesmu etapa sensibilizasaun hetan kordenasaun entre kompañia no autoridade lokal hodi fahe informasaun ba komunidade afeitadu sira. Infelizmente, perfurasaun mina Feto Kmaus durante ne’e la iha transparénsia no iha potensial ba nepotismu tanba sistema rekrutamentu la loke vaga ba públiku. Tuir asosiasaun Rede Cova Lima nia haree katak, prosesu ne’e hamosu diskriminasaun iha komunidade no iha potensia hamosu konflitu iha komunidade iha futuru tanba hili malu deit. Prosesu ida ne’e mós la refleta ba promesa no sensibilizasaun inisiál katak joven no komunidade Cova Lima mak sei sai trabalhador wainhira implementa perfurasaun. Iha realidade, komunidade balun ne’ebé partisipa iha peskiza ida ne’e hateten katak trabalhador sira barak mai fali hosi Munisipiu seluk, no iha suku balun deit mak involve nu’udar trabalhador.
Ligadu ho direitu ba propriedade iha fatin perfurasaun kompañia halo kontratu ho toos nain no halo pagementu trimestral durante tinan rua nia-laran, no sei iha posibilidade extende tinan ida-tan iha 2022. Mesmu nune’e, wainhira ekipa peskiza hasoru malu ho toos nain, problema ne’ebé FM identifika maka feto bin-alin nain rua nia toos mak hetan kontratu. Maibe inan-feto toos nain durante ne’e la involve direita iha prosesu kontratu, no rona deit hosi nia alin. Kada trimestral nia hetan pagamentu no fahe ba rua. Ikus mai, inan-feto hahú dúvida no la sente konfortável ho kontratu. Tuir informasaun hosi peskiza ida ne’e, kompañia sei hola kotu tiha rai ho medida 10x20m iha fatin perfurasaun sekarik fatin ne’e hetan mina. Maibé diskusaun ida ne’e kompañia seidauk aproxima toos nain.
Informasaun seluk liga ho perfurasaun ne’e rasik mak kompañia promete atu ateru hikas fatin perfurasaun wainhira remata atu nune’e komunidade toos nain bele uza fali hodi halo toos. Maibé, FM kestiona kona-ba promesa ne’e tanba la mensiona posibilidade rai ne’e sei kontaminadu ho mina iha futuru, signifika toos nain sira sei la bele uza hodi produz ai-han.
Kazu konkretu maka, wainhira mina teen sulin no estraga komunidade afeitadu nia toos kompañia la fó informasaun klaru no la husik mídia ka organizasaun lokál atu bele asesu. Koñesimentu komunidade afeitadu kona-ba projetu estadu, liu-liu perfurasaun mina iha suku Matai la natoon no inserteza iha inísiu estabelisimentu planu. Wainhira FM konsulta ho NGO Fokupers iha Cova Lima hodi konfirma sekarik iha vítima feto ne’ebé afeitadu hosi perfurasaun, Fokupers hateten katak durante perfurasaun mina iha Feto Kmaus sira seidauk hetan keixa ruma. Maibé nu’udar organizasaun ne’ebé fó asistensia ba vitima violénsia iha komunidade, lideransa Fokupers asume mós papel importante nu’udar lider komunitáriu no konsidera kompañia Timor Resources taka informasaun no iha impaktu ba komunidade sira. Maske sosidedade sivil, no mídia tenta hasoru kompañia hodi buka hatene prosesu perfurasaun maibé la hetan autorizasaun.
Impaktu seluk hosi perfurasaun mina matan Feto Kmaus ne’ebé konsidera bo’ot liu mak impaktu ambiental no produsaun agríkola tanba perfurasaun ne’e iha kedas komunidade nia leet no toos. Realidade kona-ba armajen (pembuangan) ne’ebé akontese durante perfurasaun mina iha Feto Kmaus mak liga direita ba mota-laran (husi fatin perfurasaun mais ou menus 100 metrus ba mota no maismenus 300 metrus tun ba tasi). Poluisaun no kontaminsasaun ida ne’e sei afeita makaas ba ema-nia saude no produsaun agrikola iha komunidade. Signifika katak, komunidade ne’ebé hela besik iha área perfurasaun iha pontensia risku ambiental no impede ba produsaun agrikula, rendimentu loron-loron ho aihan lokál ne’ebé saudavel no nutritívu.
Konkluzaun
Peskiza ida ne’e refleta katak nesesáriu tebes atu re-evalua risku sosiál no ambiental ne’ebé kria hosi Projetu Tasi Mane, liu-liu perfurasaun mina, auto-estrada no Airportu Suai, no oferese solusaun efetivu no sustentável ba komunidade afeitadu sira. Infrastrutura auto-estrada iha risku bo’ot liu ba komunidade sira iha tempu agora, no mós iha futuru wainhira funsionamentu auto-estrada hahú sei fó ameasa ba komunidade sira nia movimentu se karik governu la bele rezolve kestaun dalan alternativu.
Feto sira mós kontinua sai vítima ba prosesu no implementasaun projetu estadu tanba kuaze projetu sira ne’e la involve direita feto ho informasaun ne’ebé klaru. Insatisfasaun dalabarak mosu wainhira projetu implementa ona tanba desizaun akontese hosi parte ida deit. Kustu no kontratu ba rai sira ne’ebé oferese hosi kompañia mós konsidera la informadu ba feto sira, ikus mai inan-feto sira la komprende no la kontente ho rezultadu maibe sira nonok, pasensia, no tenke simu deit tanba prosesu liu tiha ona.
Hosi peskiza ida ne’e, ita bele konklui katak governu nia papel importante tebes hodi asegura povu afeitadu sira nia direitu fundamental no la prejudika sira nia movimentu loron-loron ka estraga meiu-ambiente. Importante tebes atu hasae komunidade nia koñesimentu kona-ba perfurasaun mina iha rai-maran, liu-liu impaktu ba ekonomia no ambiente. Esplika impaktu perfurasaun ba komunidade afeitadu iha tempu badak no tempu naruk, inklui direitu ba kompensasaun ba komunidade afeitadu. Governu tenke responsabiliza komunidade nia moris ka bein-estar iha tempu naruk hodi responde ba kompensasaun ne’ebé adekuadu no sustentável.
