Fontes Foto: Tatoli
Artigu ida ne’e diskute kona-ba oinsá atividade Grupu Arte Marsiais no Rituais (GAMR) dezafia seguransa públiku, estadu de direitu no seguransa nasionál iha Timor-Leste. Artigu ne’e mos analiza oinsá ho Estadu nia resposta ba problema ne’e dezde Timor-Leste hetan independénsia. Aleinde ne’e artigu mos diskute kona-ba fatór saida-saida mak aumenta rekrutamentu no violénsia GAMR sira. Ikus liu, artigu fó sujestaun balun kona-ba oinsá bele hadiak liu tan polítika estadu liga ho GAMR. FM konklui katak Governu tenke dezenvolve estratéjia integrada ida atu responde ba fatór estrutural sira ne’ebé kontribui ba rekrutamentu no violénsia GAMR sira nian. Nune’e, estadu bele atinje paz no seguransa ne’ebé sustentável iha Timor-Leste.
Fundasaun Mahein (FM) nota katak asuntu ne’e kompleksu tebes, ho nia abut iha okupasaun Indonézia, luta ba independénsia, no mos iha sosiedade Timor rasik. Tanba ne’e, imposível atu artigu ne’e bele fó solusaun simples ida ba kestaun oinsá Estadu Timor-Leste bele responde ba GAMR sira hodi promove diak liu tan seguransa públiku no estadu de direitu. Maske nune’e, ami espera katak artigu ida ne’e bele kontribui ba diskusaun konstrutívu iha sosiedade Timor-Leste no entre lidér sira kona-ba oinsá bele responde ba kestaun ida ne’e.
Polítika estadu kona-ba GAMR la konsistente
GAMR sira envolve iha perturbasaun públiku barak dezde Timor-Leste hetan independénsia, inklui partisipa iha violénsia komunál krize 2006 nian, no mos insidente violentu barak ne’ebé halo públiku tauk no pániku. Iha mos evidénsia hatudu katak membru forsa seguransa estadu barak sai membru GAMR. Ema balun mos deskonfia katak grupu balun kolabora ho eis-milisia ne’ebé hela iha Timor Barat (Indonézia) hodi provoka instabilidade sosiál no polítiku iha Timor-Leste.
Preokupasaun hirak ne’e provoka diskusaun no polemika barak iha públiku nia leet kona-ba oinsá bele responde ba GAMR sira. Ema balun hakarak estadu atu foti asaun forte no adopta polítika “toleránsia zero” ba GAMR sira. Maibé ema seluk hakarak estadu tuir dalan rekonsiliasaun, hanesan legalizasaun no regulasaun. Infelizmente, to’o ohin loron solusaun seidauk iha, no GAMR sira komesa aumenta tinan ba tinan.
Lidér Timor-Leste seidauk konkorda malu kona-ba oinsá atu responde ba kestaun GAMR. Tanba ne’e, Estadu muda nia pozisaun liga ho GAMR dala hira ona. Uluk, Estadu promulga Lei atu legaliza no regula GAMR, maibé depois Governu bandu fali GAMR no mobiliza forsa seguransa hodi hanehan grupu sira. Pur ezemplu, Parlametu adopta Lei Nu. 10/2008 hodi regula atividade arte marsiais no kria Consellu Regulador Arte Marsiais (CRAM). Depois, entre 2011-2013, iha tan Lei no Rezolusaun balun ne’ebé bandu no halo “estinsaun” GAMR balun, hanesan Rezolusaun Governu Nu. 35/2011 no 16/2013.
Maibé, hanesan FM hakerek ona tinan hirak liu ba, implementasaun rezolusaun sira ne’e limitadu tebes. Momentu ne’ebá ami dehan katak falta implementasaun ne’e hatudu forsa seguransa menus vontade atu konfronta GAMR sira. Posibilidade ida maka grupu sira ne’e konsege tama ona iha instituisaun seguransa estadu sira. FM mos haree katak wainhira estadu kriminaliza GAMR sira, la konsege rezolve problema tanba grupu sira kontinua halo atividade iha fatin segredu. Tanba ne’e, kleur ona FM suporta legalizasaun GAMR, tanba ami haree katak ida ne’e dalan úniku atu bele monitoriza atividade GAMR, no mos masimíza kontribuisaun GAMR ba dezenvolvimentu no seguransa nasionál.
Depois, durante iha kampaña eleisaun tinan 2018 nian, ema barak komesa diskute ona kestaun legalizasaun GAMR, inklui partidu boot sira. Momentu ne’ebá partidu KHUNTO mos komesa manán apoiu barak, maske nia organizasaun arte marsial rasik nafatin ilegál. Iha tinan 2022, Governu halo seremónia ida hodi legaliza grupu boot tolu, inklui KORK ne’ebé afiliadu ho KHUNTO. Partidu boot sira seluk mos komesa ona rekruta lidér no membru GAMR sira atu ajuda mobiliza militante sira. Ida ne’e hatudu katak lidér polítiku komprende ona katak GAMR sai nuudar forsa polítiku importante iha Timor-Leste.
Estratéjia autoritária ladun efetivu
Iha Agostu tinan ida ne’e mosu insidente violentu balun entre GAMR iha Dili, ne’ebé rezulta ema balun mate, inklui membru GAMR ida mate iha sela laran iha edifisiu PNTL. Depois, Governu lansa operasaun konjunta ida entre PNTL no F-FDTL kontra atividade GAMR sira. Foin lalais loron hirak liu ba, PNTL kaptura membru PSHT na’in 26 tanba sira viola termu akordu ho Governu ne’ebé bandu sira halo atividade arte marsiál iha fatin públiku.
FM kondena makaas hahalok violentu no ilegal husi membru GAMR balun ne’ebé sai ameasa ba seguransa públiku no paz iha Timor-Leste. Ami haree Governu legaliza GAMR tolu hanesan buat ne’ebé pozitivu no hatudu boa vontade husi Governu ba grupu sira ne’ebé sai influénsia boot iha sosiedade Timor. Maibé lidér GAMR falla atu kontrola sira nia membru, no ida ne’e sujere katak se estadu fó deit rekoñesimentu no apoiu formal ba sira, sei la rezolve problema violénsia no dezorden públiku.
Maske nune’e, FM preokupa kona-ba estadu nia hahalok autoritária ka militarístika, tanba bele provoka tan tensaun no konflítu iha sosiedade nia leet. Iha artigu ida FM foin públika, ami nota katak membru GAMR ida mate iha sela laran ne’e hanesan fallansu boot ida, ne’ebé hafraku PNTL nia misaun seguransa. Insidente ne’e mos rezulta ona tensaun sosiál aumenta, no estadu halo ona atuasaun hodi responde. Ami preokupa katak asaun agresívu husi estadu sei provoka tan violénsia entre GAMR ho forsa seguransa sira, no ida ne’e kontribui ba síkulu violénsia no halo komunidade barak la fiar ona estadu, liu-liu joven sira.
Estadu tenke komprende no responde ba abut GAMR nian
FM hanoin importante ba Estadu atu analiza didiak tanba saida mak joven barak kontinua tama iha GAMR no komete aktu violentu, atu nune’e Estadu bele responde ba problema ho efetívu. Ema barak haree GAMR hanesan prátika ida ne’ebé “importa” mai iha Timor-Leste husi Indonézia, no ema barak konsidera GAMR rezulta husi manipulasaun ka estratejia estadu Indonézia nian. Maske nune’e, klaru katak prátika ne’e metin ona iha sosiedade Timor. Hanesan FM hakerek ona, fatór importante ne’ebé influénsia joven barak envolve iha violénsia no GAMR maka joventude la inkluidu iha prosesu dezenvolvimentu, menus oportunidade ba edukasaun no empregu, no falta fasilidade no eventu ba joventude. KHUNTO no GAMR kontinua sai forte liu tan tanba joven barak sente marjinalizadu husi prosesu polítiku no sósio-ekonómiku.
Bazeia ba FM nia diskusaun no observasaun, fatór xave seluk ne’ebé influénsia joven barak sai membru GAMR maka komunidade barak preokupa kona-ba auto-defeza atu bele proteje família no aldeia. Kompozisaun membru sira iha GAMR dala barak aliña ho rede parentesku. Kada bairru iha Dili kompostu husi aldeia sira. Kada aldeia maizumenus kobre família alargada ida nia territóriu, no dala barak aldeia tomak bele pertense ba GAMR ida de’it. Konflítu komunál mosu wainhira kada komunidade mobiliza ninia juventude atu defende ninia teritóriu. Fenómenu ne’e sujere katak maioria konflitu iha Timor-Leste akontese entre aldeia ida ho aldeia seluk, la’ós iha aldeia ida nia laran.
Aleinde ne’e, falta prezensa seguransa estadu iha fatin barak mos influénsia ba joven barak tama iha GAMR. Ida ne’e akontese tanba razaun barak, hanesan menus fasilidade transportasaun, rekursu umanus no ekipamentu báziku. Problema seluk maka membru PNTL barak servisu iha sira nia komunidade rasik, tanba toba fatin la iha ba PNTL sira atu ba hela no servisu iha fatin seluk. Tanba ne’e, kazu kriminál barak rezolve ho dalan kultura duké sistema justisa formál. Ida ne’e hafraku fali sistema polisiamentu estadu no estadu de direitu iha komunidade no mos iha instuisaun polísia rasik. Nunee mos joven barak bele sente katak sira tenke tama iha grupu auto-defeza komunitáriu hodi proteje seguransa iha sira nia komunidade.
Tanba falta seguransa no polisiamentu ne’e, ohin loron joven Timor-oan barak enfrenta dilemma ida: karik rejeita atu tama iha grupu ruma, sira enfrenta risku violénsia husi GAMR sira hotu. Karik joven sira deside atu sai membru grupu ida hamutuk ho membru familia alargada, sira sei enfrenta nafatin risku violénsia, maibé membru grupu rasik sei proteje sira. Aleinde ne’e, joven barak tama iha GAMR atu bele sente unidade hamutuk ho joven sira seluk, no mos atu asesu ba fasilidade no ekipamentu ezersísiu nian. Joven sira mos bele partisipa iha atividade komunitáriu ka polítiku liu husi sira nia grupu. Maibé, wainhira sira tama tiha grupu ruma, sira sai hanesan “kriminozu”, no forsa seguransa sei bele halo violénsia kontra sira. Nune’e klaru katak atu tama ka la tama GAMR, lori risku no mos benefísiu oi-oin ba joven sira.
Solusaun militaristika susar atu rezolve problema
Lidér balun haree Servisu Militár Obrigatóriu (SMO) nuudar solusaun ida ba problema sira ne’ebé joven Timor-oan sira enfrenta dadaun, inklui fenómenu GAMR. Momentu Lei SMO promulga iha tinan 2020, FM hato’o ami nia preokupasaun katak desizaun atu implementa SMO ne’e bazeia ba promesa polítika, no la iha estudu viabilidade ne’ebé klean kona-ba risku/benefísiu programa SMO nian. FM hanoin katak programa ne’e bele promove disiplina no espíritu patriotizmu joven Timor-oan sira. Maibé tenke mos dezeña estratéjia integrada ida hodi fasilita oportunidade edukatívu no ekonómiku, no promove kultura da paz no kooperasaun.
FM komprende katak Timor barak mai ho esperiénsia militár ne’ebé forte, no tanba ne’e sira tau valór a’as ba iha disiplina no orden. Ami mos konkorda katak valór rua ne’e importante ba sosiedade atu funsiona ho diak. Maibé, ami preokupa uituan wainhira desizaun na’in balun asume katak promove disiplina liu husi métodu militár deit mak sei rezolve problema joventude Timor-Leste nian, no ignora fali fatór edukasaun no ekonómiku ne’ebé kontribui ba problema indisplina, dezorden no inseguransa iha ita nia rai.
Rekomendasaun
Atu bele responde ho efikás ba problema rekrutamentu no violénsia GAMR nian, FM haree katak estadu presiza adopta estratéjia ne’ebé integrada, konsistente no bazeia ba evidénsia. Tanba ne’e ami oferese sujestaun balun tuir mai atu bele komesa kria polítika GAMR ida ne’ebé integrada no envolve governu tomak.
- Primeiru, polítika na’in sira tenke estuda didiak fatór saida mak atrai joven Timor-oan barak ba iha GAMR sira. Fatór sira hanesan: kondisaun inseguransa jerál, konflítu komunál, falta fasilidade ba joventude, menus oportunidade edukativu no ekonómiku, prezensa seguransa estadu ne’ebé fraku, toleránsia ba violénsia iha sosiedade nia leet, no benefísiu pesoal husi GAMR sira.
- Esensiál tebes ba Governu atu kria mekanizmu ne’ebé efikás atu monitoriza didiak lidér, membru no atividade GAMR sira, inklui estabelese prosesu rejistrasaun no baze de dadús dijital. Au mezmu tempu mos, Governu tenke fó rekursu ne’ebé nato’on ba PNTL atu PNTL bele kumpre nia misaun seguransa iha territóriu nasionál tomak, inklui monitoriza atividade GAMR ilegal. Problema boot ida ne’ebé hafraku sistema polisiamentu maka falta dormitóriu ba membru PNTL atu sira bele servisu iha area ne’ebé dook husi sira nia komunidade rasik.
- Polítika estadu la bele kriminaliza joven marjinalizadu sira, tanba ida ne’e bele kria konflitu no viola joven sira nia direitu no dignidade. Bele mos estraga relasaun entre joven sira ho estadu no kria tan apoiante ba partidu foun ne’ebé afiliadu ho GAMR. Nune’e mos, aproximasaun ida ne’ebé todan ka agresívu liu bele halo GAMR sira sai forte liu tan. Tanba wainhira aumenta tensaun komunál no konflítu entre GAMR ho seguransa estadu, ne’e obriga membru GAMR atu defende an.
- Iha pasadu, desizaun na’in sira balun koalia kona-ba “importasaun” prátika arte marsiais husi Indonézia no bolu joven sira ne’ebé envolve-an iha GAMR “la patriótiku”. Klaru katak taktika ne’e la konsege hatuun GAMR sira nia popularidade. En vez de ataka no kondena membru GAMR sira, FM sujere diak liu desizaun na’in sira rekoñese katak prátika ne’e metin ona iha sosiedade Timor, no agora presiza adopta estratéjia seluk.
- Estadu tenke identifika no promove arte marsiais no rituais nia aspeitu pozitivu sira, hanesan patriotizmu, auto-defeza, ativizmu komunitáriu, desportivizmu no saúde fíziku (fitness). Bele kria kompetisaun formal atu direta atividade tuir dalan ne’ebé pozitivu. SEJD bele organiza hamutuk ho instituisaun estadu relevante sira seluk. Nune’e mos, programa treinamentu no ezibisaun arte marsiais no rituais bele atrai turista barak mai Timor-Leste. Nasaun barak promove maka’as sira nia prátika arte marsiais tradisionais ba vizitante husi rai li’ur, no UNESCO konsidera prátika arte marsiais balun nuudar Patrimóniu Kultural Imaterial Umanidade nian, hanesan Pencak Silat husi Indonézia no Capoeira husi Brazíl.
- Atu bele prevene GAMR ne’ebé seidauk regulariza tama iha insituisaun seguransa estadu, Governu bele estabelese programa formasaun arte marsiál hanesan parte forsa seguransa rasik. Programa hanesan ne’e bele fó benefísiu oi-oin hanesan treinamentu fíziku, kombate sein armas no filosófiku. Au mezmu tempu, lidér PNTL no F-FDTL tenke foti asaun disiplinária kontra membru sira ne’ebé envolve-an iha atividade GAMR ne’ebé seidauk regulariza.
- Ikus liu, tuir Fundasaun Mahein nia haree, atu bele kontrola ameasa sosiál no polítiku husi atividade GAMR ilegál sira, polítika estadu sira tenke responde ba fatór estrutural sira ne’ebé kontribui ba inseguransa no konflítu iha komunidade sira nia le’et. Fatór sira hanesan temi ona iha leten hanesan falta edukasaun, fasilidade ba joven sira no oportunidade ekonómiku. Problema hirak ne’e kompleksu tebes no susar ba Estadu Timor-Leste atu bele rezolve iha tempu badak. Maske nune’e, FM fiar katak ida ne’e dalan úniku atu bele garante paz no seguransa ne’ebé sustentável iha Timor-Leste.
