Fontes Foto: Premium Vector | Male prisoner in jail semi flat color vector character (freepik.com)
Relasiona ho kazu ema mate iha sela laran, ne’ebé akontese iha Quinta kalan, loron 1 Setembru 2022 iha fatin PNTL Kaikoli Dili, Fundasaun Mahein (FM) konsidera insidente ne’e nu’udar fallansu bo’ot no grave seguransa PNTL nian iha fatin servisu. FM haree insidente lamentavel teb-tebes, no halo ami kestiona instituisaun PNTL sira nia funsionamentu institusional rasik. Kestaun ida seluk mosu husi kazu ne’e maka FM seidauk hatene lolos se karik kazu ne’e tama iha kazu suisidiu ka omesidu. Tanba ne’e, FM públika artigu ida ne’e hodi alerta públiku no instituisaun estadu ba kazu sériu ne’e.
Kondisaun jeral celál iha Timor-Leste
Tuir prinsípiu direitus umanus no mos convensaun internasionál hanesan Nelson Mandela Rules kona-bá tratamentu prizoneiru sira, fatin detensaun sira tenke tuir padraun mínimu (minimum standard) hodi garante dignidade no seguransa pesoal prizoneiru sira nian. Infelizmente, tuir FM nia analiza no dadus ne’ebé rekolla durante ne’e, kondisaun prizaun inklui kondisaun sela detensaun nian seidauk bele garante seguransa di’ak ba prizioneiru no dadur sira durante prosesu penal sira. Iha tinan hirak liu ba, FM hakerek ona kona-bá kondisaun fatin prizaun nian, maibé to’o agora seidauk iha asaun konkretu husi Governu atu hadiak problema sira ne’ebé ami identifika iha momentu ne’ebá.
Sela detensaun nu’udar espasu esensial tebes ne’ebé sai fatin hodi halo investigasaun ka identifikasaun ba pesoal ne’ebé komete krime, atu evita ema ne’e labele halai ka subar, prevene problema seluk tan atu mosu, no evita amiasa ba vítima ka sasin. Maibé, au mezmu tempu, espasu sela temporariu mos sai nu’udar mahon hodi asegura ema husi perigu no ameasa sira.
FM sente triste wainhira ami nota katak en jeral PNTL ladun fó atensaun ne’ebé sufisiente atu sela detensaun sai fatin ne’ebé seguru, komfortável no garante suspeitu sira nia seguransa pesoal. Kondisaun sira iha sela polísia nian bele halo ema neon-susar, no ida ne’e bele sai fatór ida ne’ebé kontribui ba sira nia oho-an. Ida ne’e sai ona ligasaun ne’ebé fraku iha prosesu justisa kriminál, iha ne’ebé ema bele mate iha sela detensaun. Tanba ne’e, FM konsidera katak PNTL seidauk iha polítika di’ak atu kumpre ba misaun no reponsabilidade iha servisu seguransa nian.
Mate tara an iha sela detensaun: suisídiu ka omisídiu?
Foin dadauk, kazu mate ho tara-aan iha sela laran hamosu dúvida boot no halakon konfinasa sidadaun barak ba instituisaun estadu, liu-liu vítima nia familia sira. Nune’e mos, FM haree inaseitável atu ida ne’e bele akontese iha seguransa sira nia espasu de servisu. Tanba ne’e ami husu ba Komandante Jeral PNTL atu halo investigasaun klean ho metodolójiku sientífiku hodi bele hatene loloos saida maka akontese iha kazu ida ne’e.
PNTL hanesan forsa seguransa ida ne’ebé iha misaun atu defende legalidade demokrátika, garante seguransa ba ema no bens nian no garante ezersisiu direitu, liberdade no garantia sidadaun sira nian tuir Konstituisaun no lei haruka. Nune’e mos medida ne’ebe polisia uza tenke tuir Konstituisaun no lei la’os ho ameasa, no lori ema ba mate. Tanba ne’e, tuir FM nia analiza akontesimentu ne’e la’os deit sai ameasa ba sidaudaun hot-hotu, maibé kontra diretamente misaun PNTL rasik tuir Konsituisaun RDTL no Lei Organika PNTL nian.
Ema mate iha sela laran la merese atu akontese, no FM hare akontesimentu ne’e la lójika no la razoável. Karik ofisiál polísia tuir duni regras no prosedimentu, imposível iha sela laran ema ida bele mate husi dalan “tara an”. Tanba ne’e FM kestiona PNTL nia lideransa tanba sá mak sidadaun ida bele mate iha sela laran ho maneira violentu hanesan iha kazu ne’e? Será ke polisia falla atu kontrola espasu detensaun nian? Objetu (tali) ida ne’ebé vítima uza hodi tara an mai hosi ne’ebé?
Bazeia ba kazu ida ne’e, no mos kazu violasaun regras barak ne’ebé akontese ona, FM preokupa katak membru PNTL barak la iha liu disiplina hodi respeita misaun seguransa nian. Misaun ne’e signifika PNTL tenke tuir regras ne’ebé eziste hodi proteje sidadaun Timor oan sira nia seguransa no direitu (no mos ema estranjeiru ne’ebé hela iha Timor-Leste). Nune’e sei la garante atu iha futuru PNTL bele fo seguransa ne’ebé di’ak ba sidadaun sira hotu.
FM iha tinan hirak ba kotuk koalia bebeik ona kona-bá disiplina husi membru PNTL sira nian. Disiplina no komprimentu ba lei no regulamentu tenke sai hanesan baze fundamental ba sira nia atuasaun. Maibé, infelizmente iha ona kazu violasaun barak teb-tebes ne’ebé membru PNTL komete. Atuasaun PNTL hasoru komunidade baibain, lideransa komunitaria, mediku, estudante, jornalista, membru F-FDTL, entre membru sira polísia rasik hamosu violasaun no krime barak, no ikus liu taka ho kazu ida ne’e. Bainhira ami haree lista violasaun naruk ne’e, FM dúvida boot ho Komandu Jerál PNTL nia komitmentu ba misaun PNTL bazeia Lei Organika no Konstituisaun RDTL.
Kazu mate iha sela laran ne’e, bazeia ba FM nia monitorizasaun durante tinan barak, ne’e foin primeira vez akontese iha rai laran. Nune’e, FM afirma presiza halo investigasaun kle’an ba kazu ne’e hodi konfirma lolos saida maka akontese iha sela laran no mos iha PNTL nia servisu fatin. FM husu mos ba xefe instituisaun PNTL tenke sériu hodi haree ba kazu ne’e ho rigorozu no aplika medida sira tuir regulamentu disiplinar nian no loke prosesu sira tuir kazu ne’e nian, inklui loke prosesu kriminal se karik investigasaun hatudu asaun kriminal ruma.
Kazu ne’ebé akontese daudauk, dezafia lideransa foun instituisaun PNTL nian. Ida ne’e hanesan mos lisaun boot ida ba lideransa instituisaun nian hodi impoin lei no regulamentu ba membru sira hodi obdese no aplika, nune’e mos hola medida ida ho rigorozu hasoru membru sira ne’ebé hakat liu lei no regulamentu. Nune’e povu nia moris la’os iha ameasa no mate maibe ema hotu-hotu iha lei nia oin hanesan.
Ikus liu, FM fo rekomendasaun sira hanesan tuir mai ba desizaun nain sira:
- Komandu Jeral PNTL tenke halo investigasaun ne’ebé sientífiku no kle’an hodi deskobre no hatene lolos motivu husi kazu ne’e, suisidu ka omesidiu.
- Komandu Jeral PNTL presiza hola medida disiplinar ida ne’ebé rigorozu ba membru sira ne’ebé viola lei no regulamentu. Maibe prosesu ba kazu ida ne’e tenke la’o ho tranparénsia tantu ba kazu disiplinar no kazu ne’ebé nia natureza mate tara an iha sela, nune’e mos prontu responsabiliza ba públiku duke halo auto defeza deit.
- Atu Timor-Leste bele kumpre ho ita nia kompromisu direitus umanus sira, kada sela detensaun – inklui sela temporariu no sela iha prizaun sira – presiza mai ho kondisaun sira hanesan tuir mai:
- Sela tenke iha naroman no ventilasaun ne’ebé adekuada
- Sela tenke iha kondisaun sufisiente atu bele deskansa, hanesan kadeira.
- Tenke fo fatin ba ema atu uza hariis-fatin.
- Komandu Jeral PNTL prezisa halo avaliasaun ba dezempeñu membru sira PNTL nian no lalaok formasaun iha area disiplina no prosediementu nian, liu-liu prosedimentu sira liga ho tratamentu suspeitu no prizoneiru sira.
- Komandu Jeral PNTL presiza kontrola kona-bá knar servisu membru ida-idak nian. Atu serví ho fuan la’os liafuan, serví ho domin la’os emosaun.
