Fontes foto: Fundasaun Mahein (FM)
Iha loron Sesta-feira 24 Fevereiru, Fundasaun Mahein (FM) hamutuk ho Centru Juventude Municipiu Ermera organiza Diálogu Nasionál ida hodi diskute asuntu boot ne’ebé Timor-Leste enfrenta dadaun, maka hanesan Tranzisaun Jerasionál, Identidade Nasionál no Partisipasaun Juventude iha Prosesu Dezenvolvimentu. Eventu ne’e hala’o iha East Timor Coffee Institute (ETCI) iha sidade Gleno, Munisípiu Ermera. Orador sira mai husi instituisaun oi-oin, hanesan partidu polítiku sira, forsa seguransa, veteranu, Autoridade Munisípiu Ermera, departmentu governu seluk, instituisaun relijiozu, organizasaun joven no NGO sira. Númeru partisipante iha eventu ne’e liu ema na’in 100, inklui feto na’in 43 e mane na’in 60.
FM foti desizaun atu organiza eventu ne’e hodi estimula diskusaun entre grupu xave iha sosiedade Timor-Leste kona-bá dezafiu sira ne’ebé Timor-Leste enfrenta iha tempu Eleisaun Parlamentar 2023. Asuntu sira hanesan seguransa e konflitu, kapasidade estadu atu fornese servisus bázikus no infraestrutura, no dezenvolvimentu setór ekonómiku produtivu sira. Objetivu Diálogu Nasionál ida ne’e maka atu lori reprezentate estadu, instituisaun polítiku e sosiedade sivíl hamutuk hodi diskute oinsá bele rezolve problema klean ne’ebé ita nia nasaun enfrenta dadaun, no mos atu buka hatene oinsá joven sira bele envolve iha prosesu foti desizaun no dezenvolvimentu nasionál.
Tuir FM nia hanoin, importante tebes ba joven sira atu envolve iha diskusaun sira hanesan ne’e, tanba Timor-Leste nia kultura ne’ebé respeitu boot ba ema idade sira, signifika dala barak desizaun iha nível nasionál ladun tau prioridade ba joven sira nia nesesidade no esperansa. FM hakerek ona kona-bá lider rezisténsia sira ‘jerasaun 1975’ tenke prepara ba jerasaun foun atu ukun. Parte preparasaun ne’e maka haforsa programa no instituisaun estadu atu ajuda joven sira atu partisipa ho másimu iha prosesu dezenvolvimentu nasionál.
Aleinde ne’e, FM deside atu hala’o eventu ne’e iha foho tanba debate nasionál sira baibain la’o iha kapital deit, no susar ba ema iha area rural atu asesu ba diskusaun importante liga ho polítika no programa sira. Munisípiu Ermera nia populasaun segundu iha Timor-Leste, só Dili maka boot liu. Nune’e mos, maioria populasaun Timor-Leste hela iha area rural, la’os iha Dili. FM espera katak eventu ne’e bele sai modelu ba Governu Timor-Leste atu fasilita prosesu desentralizasaun, liu husi hala’o diskusaun importante kona-ba polítika iha area sira ne’ebé la’os sidade kapital.
Diretor Fundasaun Mahein aprezenta kona-bá FM nia vizaun ba tranzisaun pasífiku entre jerasaun “tuan” no jerasaun “foun”. Nia dehan ketak jerasaun foun maka hanesan jerasaun “kontinuador” ba prosesu libertasaun no dezenvolvimentu nasionál ne’ebé jerasaun tuan maka inisia. Nia rekomenda ba joven sira atu servisu makas atu bele partisipa ho konstrutivu iha prosesu dezenvolvimentu nasionál, ne’ebé maka presiza vizaun ne’ebé luan no naruk ba futuru Timor-Leste nian. Nia enkoraja joven sira atu foti responsabilidade ba hadiak kualidade moris no dezenvolvimentu, komesa husi nivel komunidade. Pur ezemplu, karik fatuk monu iha dalan ka lixu ruma, lalika hein ema seluk – bele foti rasik deit ona, ka mobiliza kolega sira atu hamoos lixu iha bairro! Ezemplu seluk maka, se karik imi nia kolega ida lanu ka baku ema seluk, lori sira ba toba iha uma!
Reprezentante husi Prezidente Autoridade Munisípiu nota katak joven sira tenke servisu makas atu sai pilar dezenvolvimentu nasionál, atu nune’e sira bele goza benefísiu luta independénsia ne’ebé jerasaun tuan maka halo hodi manán independénsia. Nia subliña katak importante tebes atu hetan edukasaun no sempre aprende buat foun, no nota katak desentralizasaun bele kria oportunidade barak ba joven sira iha area rural.
Partidu polítiku sira kontribui sira nia hanoin. Reprezantante husi Partidu Demokrátiku (PD) rekomenda joven sira tenke proativu hodi buka solusaun no kontribui ba rezolve komunidade nia problema, no bele mos envolve iha partidu polítiku ho objetivu atu hadiak moris komunal. CNRT dehan katak joven barak sai husi Timor-Leste tanba falta kampu traballu, no nia husu joven sira atu tuir lidér istóriku hodi partisipa iha prosesu dezenvolvimentu nasionál. KHUNTO nota katak joven barak interese atu envolve iha polítika no prontu atu ukun, no nia espera katak lider atual sira bele fo espasu ba jerasaun foun atu envolve iha prosesu foti desizaun.
Konsellu Solidaridade ba Joven no Estudante (Dewan Solidaritas) esplika kona-bá papél jerasaun diferente iha luta ba independénsia no prosesu harii estadu. Nia rekomenda katak joven sira tenke esforsu atu hadiak displina no étika servisu (work ethic), no nia mos lamenta ábitu lidér balun tanba maljestaun rekursu nasaun nian. Membru Konsellu Kombatante Libertasaun mos observa jerasaun tuan ukun ladun efetívu, no dala barak falla atu implementa planu. Nia haree prosesu tranzisaun jerasionál la’o hela, tanba ita bele haree membru jerasaun kontinuador agora okupa pozisaun a’as iha estadu. Nia rekomenda ba joven sira atu kontinua dezenvolve sira nia koñesimentu no kapasidade atu prepara ba governasaun.
Insituisaun seguransa sira suporta aprezentasaun husi sosiedade sivíl no partidu polítiku sira. Komandante PNTL iha Munisípiu Ermera enkoraja jerasaun foun atu partisipa iha atividade sira hodi prepara atu sai lidér iha futuru, no mos la bele envolve iha krime ka atividade “sala”. Nia subliña katak joven sira tenke garante paz no estabilidade. Komandante F-FDTL mos esplika katak militár agora fó oportunidade barak ba jerasaun foun atu aumenta kapasaidade no esperiénsia hodi prepara sira atu sai lidér.
Reprezentante sira husi ajénsia governu sira fahe perspetiva kona-bá papél no responsabilidade joven sira nian. SEFOPE fahe informasaun kona-bá programa formasaun ne’ebé bele prepara joven sira atu servisu iha Timor-Leste no mos iha rai liur. Nia mos mensiona importante tebes atu apoia joven feto sira atu partisipa iha moris ekonómiku atu garante igualdade jéneru no mos dezenvolvimentu ne’ebé sustentável. Obras Públika rekomenda ba joven sira atu dezenvolve kapasidade tékniku, liu-liu iha area hanesan enjiñeiru, matemátika no siénsia. Nia mos mensiona katak joven sira tenke servisu makas hodi dezenvolve kompeténsia antes simu responsabilidade. Saúde rekomenda ba joven sira atu foka ba estudu duké kaben sedu, tanba saúde no moris diak iha futuru depende ba edukasaun ne’ebé diak. Ikus liu, reprezentante husi Institutu ba Apoiu Dezenvolvimentu Emprezarial (IADE) rekomenda ba joven sira atu kontinua envolve-an iha atividade ne’ebé produtivu, liu-liu edukasaun iha area negósiu, siénsia no teknolojia, atu nune’e bele prepara-an atu sai lidér no peritu tékniku iha futuru.
Konkluzaun
Diálogu Nasionál ida ne’e lori partisipante barak husi grupu no instituisaun oi-oin iha sosiedade Timor-Leste. Eventu ne’e hanesan oportunidade diak ba lidér no reprezentante sira atu fahe perspetiva, aprende hamutuk no halo diálogu hamutuk ho joven sira kona-bá sira nia papél no responsabilidade. Orador sira mos bele rona joven sira nia hanoin no preokupasaun.
FM identifíka tema boot ne’ebé mosu iha diskusaun, hanesan tuir mai:
- Tranzisaun jerásional sai ona realidade, no joven sira tenke prepara-an atu sai lidér no peritu tékniku iha futuru.
- Valór ne’ebé importante liu ba juventude Timor-Leste atu prepara-an ba futuru maka edukasaun, formasaun, saúde diak, mentalidade diak no tenke badinas.
- Joven sira la bele hein deit Governu – sira tenke proatívu atu hadiak-an no partisipa iha atividade ne’ebé produtivu, hanesan servisu voluntáriu iha komunidade, buka oportunidade atu hetan koñesimentu no skil foun, no servisu makas ba paz no estabilidade.
Fundasaun Mahein agradese ba co-organizador, orador, no partisipante sira ne’ebé servisu hamutuk atu fasilita Diálogu Nasionál kona-bá Tranzisaun Jerásional, Identidade Nasionál no Partisipasaun Juventude iha Prosesu Dezenvolvimentu. Ami espera katak Governu, hamutuk ho sosiedade sivíl, bele organiza tan eventu hanesan ne’e iha Timor laran tomak, atu promove komprensaun mutual, aprendizajen no respeitu entre jerasaun no instituisaun sira, no atu prepara joven ohin loron atu sai lidér aban-bainrua nian.
