Foto: Fundasaun Mahein
Sistema demokrátiku kontinua estável no saudável bainhira públiku fiar lidér polítiku no prosesu demokrátiku sira. Maibé, demokrátiku sai ameasadu bainhira lidér sira halo asaun ruma ne’ebé hafraku povu nia fiar. Durante tinan barak, Fundasaun Mahein (FM) observa katak lidér jerasaun tuan sira sempre insulta ka ataka malu, ho linguajen ne’ebé kasar demais ka ameasa. Iha tempu seluk, lidér sira komunika ba malu la ho profisionalidade, ka sira koalia iha públiku kona-bá asuntu ofisiál ne’ebé tuir lolos tenke rezolve privadu, ne’ebé provoka polémiku iha públiku.
FM preokupa kona-bá hahalok ne’e tanba la maduru no la respeita ba papél polítiku ne’ebé importante tebes. Ita nia istória hanorin ita katak bainhira lidér polítiku uza tatika hanesan ne’e iha tempu ne’ebé nakonu ho tensaun, destabilidade no violénsia bele mosu. Ami mos haree katak povu Timor-Leste barak la satisfás ho lidér boot sira nia governasaun, tanba korrupasaun, nepotizmu no maljestaun rekursu estadu buras iha ita nia rai. FM hakerek artigu ida ne’e atu diskute kona-bá ligasaun entre hahalok polítiku no dezorden sosiál. Ami espera katak públiku no membru partidu baibain sira bele fo presaun ba lidér boot sira atu respeita malu no lalika ameasa ka koalia kasar iha tempu kampaña ka diskursu polítiku. Tuir lolos sira tenke foka ba papél prinsipál – servii interese nasionál atu hadiak povu Timor nia moris.
Iha mundu ne’e, polítiku sira sempre ataka malu, bosok ka hatuun malu. Bainhira instituisaun polítiku no kondisaun sósio-ekonómiku avansadu ona, polítíku sira nia asaun ne’e normalmente ladun kria dezorden boot ne’ebé ameasa estadu. Maibé, iha Timor-Leste ho nasaun seluk iha ne’ebé instituisaun polítiku sei “fraku”, fasil ba ema elite halo asaun ruma ne’ebé halo estadu monu ka violénsia masál mosu. Ema boot balun bele hetan benefísiu bainhira estadu monu, maibé ema baibain maka sofre. Bainhira FM haree lidér sira ataka malu, ami hanoin fali divizaun polítiku ne’ebé sai abut konflitu no prevene progresu iha ita nia nasaun.
Ita Timor-oan toman ona rona lidér polítiku insulta ka ameasa malu. Ema Timor barak sente hahalok ne’e komik karik, no mais fasil atu bele komprende ida ne’e duké rona diskusaun kona-bá polítika ka asuntu kompleksu sira. Lidér balun haree ataka malu hanesan estratéjia diak atu manipula povu no manán iha eleisaun. Ataka malu mos atu subar sira nia sala rasik. Maibé, FM haree hahalok ne’e insulta memória povu ne’ebé sakrifíka vida atu manán independénsia, no la respeita ba povu Timor ka dignidade papél polítiku.
Iha sistema demokrátiku maduru bazeia ba lei, ema hotu konsidera igual no tenke tuir regras ne’ebé hanesan. Ida ne’e signifíka bainhira ema elite sira servisu la diak ka halo krime, sira hetan konsekuénsia ruma, hanesan mos ema baibain. Maibé, realidade iha nasaun ne’e maka maioria polítiku sira viola regras sein konsekuénsia, no ignora norma demokrátika sira. Sira fahe benefísiu no pozisaun ho familia no kliente polítiku, no ataka ema seluk bainhira halo hanesan. Iha tempu hanesan, ema Timor rihun ba rihun moris sein esperansa, no lidér polítiku kontinua halo promesa falsu atu manán votus.
Keta katuas sira ukun kleur ona karik, to’o sira haluha tiha moris “baibain”, signifika bainhira ita halo aat ruma, konsekuénsia tenke iha. FM hakerek ona kona-bá kultura ne’ebé tane aas ba ema idozu sira, liu-liu Maun Boot heroi rezisténsia sira. Kultura partriarkal ida ne’e signifika dala barak mane sira ne’ebé tuur iha pozisaun aas la sofre konsekuénsia ruma bainhira halo prátika aat. Ema barak la kestiona sira tanba tauk, ka tanba respeita liu ba “Maun Boot”. Iha governu, asesór ka funsionáriu sira ladun kestiona xefe sira tanba tauk atu lakon pozisaun.
Husi perspetiva FM, karik Timor-Leste hakarak bolu an Repúblika Demokrátika bazeia ba Estadu de Direitu, duké estadu korruptu ne’ebé domina husi eis-guerilleiru no oportunista oi-oin, presiza halo mudansa boot iha nível altu estadu. Ida maka lidér polítiku sira presiza hadiak hahalok no profisionalizmu. Insulta ka ameasa malu, ka responde “pasivu-agresivu” ba malu liu husi media, ne’e la’os maneira komunikasaun polítiku ne’ebé produtívu ka apropriadu iha demokrasia modernu ida. Karik lidér sira la bele deskonkorda malu iha públiku ho respeitu, diak liu komunika liu husi karta ofisiál ka iha enkontru privadu.
Nune’e mos, ita presiza muda karakter no kompozisaun instituisaun estadu husi natureza klientilizmu, iha ne’ebé buat hotu bazeia ba rede familia no partidu, ba iha sistema modernizadu meritokrátiku no teknokrátiku, bazeia ba kompeténsia, kapasidade no dezempeñu servisu. Ema barak – inklui Prezidente Horta – koalia dehan presiza halo mudansa ne’e hodi prevene krize, dezorden sosiál no estadu monu. FM la bele fo solusaun ne’ebé simples, tanba problema ne’e la’os simples, maibé rezulta husi istória no estrutura sosiál ne’ebé kompleksu tebes. Ita nia situasaun ekonómiku ne’ebé frajil tebes mos kontribui ba problema ne’e, tanba maioria povu tenke servisu makas loron-loron atu buka moris. Maibé, ita bele dehan katak lidér polítiku sira nia hahalok mos kontribui ba problema hirak ne’e. Bainhira katuas sira halo jeitu la profisionál no fahe benefísiu estadu ho sira nia ema, ami la hakfodak bainhira burokrasía la funsiona, rekurus umanus sei fraku no korrupasaun ho violénsia buras iha sosiedade nia leet.
FM rekoñese governu no lidér sira atinji buat barak ona, hanesan eletrisidade, hadiak estrada no mantein paz. Maske nune’e, klaru katak jerasaun tuan mos fasilita korrupasaun no maljestaun rekursu estadu, no ladun konsege diversifika ekonomia ka hadiak edukasaun públiku, bee-moos ka saneamentu. Sistema atuál ba nomeasaun membru Parlamentu maka bazeia ba lista partidu, maibé ne’e signifika la iha ligasaun orgániku entre Parlamentu Nasionál ho munisípiu ka suku sira. Politíku iha Timor nafatin domina husi elite bazeia iha Dili, no kandidatu ka programa ne’ebé reprezenta interese jerasaun foun, area rural ka ema kiak kuaze la iha.
Foin dadauk, FM husu liu ema nain 100 oinsá sira haree partidu polítiku sira no eleisaun 2023. Rezultadu peskiza ne’e indika katak juventude Timor barak la satisfas ho situasaun atuál. Iha media sosiál, ema barak la satisfas ho opsaun ba eleisaun parlamentar, no observa katak ema foun la iha, só katuas sira hanesan deit ne’ebé sempre koalia kona-bá pasadu no ignora programa atu hadiak ema nia moris. Ami la hakfodak haree partidu foun hanesan KHUNTO ka Os Verdes mosu. Ema joven barak prefere ba rai liur ka tama iha grupu arte marsiais atu asegura sira nia moris, duké tama iha partidu tuan sira.
Ema balun hanoin partidu foun sei hametin demokrasia, tanba votante sira bele vota ba partidu seluk, signifika partidu tuan sira tenke tuir povu nia hakarak. Maibé, ita enfrenta konflitu iha pasadu no ita nia instituisaun polítiku seidauk maduru. Tanba ne’e ami preokupa kompetisaun polítiku barak liu bele hamosu dezunidade, korrupasaun no maljestaun ne’ebé boot liu tan. Nune’e mos, joven barak sai ba liur bele aprende buat foun ka hetan osan, maibé sai ba liur signifika esperansa atu hadiak moris iha rai laran la iha. Karik ekonomia la iha mudansa, dezigualdade no dezorden kontinua sa’e, no lidér boot sira kontinua koalia provokativu liu, Timor-Leste bele enfrenta dezorden ho destabilidade boot iha futuru.
Povu Timor tolera lidér istóriku sira nia sala dezde 2002 tanba sira konsege manán iha luta ba independénsia. Maske ema barak la satisfas, FM fiar katak povu sei fo oportunidade ida tan ba eroi sira atu ukun. Maibé, karik boot sira la servisu ho profisionalizmu no halo esforsu atu responde ba povu nia nesesidade sira, ema barak liu sei fo apoiu ba partidu seluk ka tama iha instituisaun paralelu hanesan grupu arte marsiais. Ita nia joven sira sei kontinua buka oportunidade iha liur, no povu barak sei kontinua moris iha mukit sein esperansa.
Dala ida tan, ami respeita tebes lidér sira nia susesu iha luta ba independénsia. Maibé, sira tenke sai ezemplu diak ba jerasaun foun. Ida ne’e signifika servisu ho profisionalizmu no lalika insulta polítiku seluk hodi manán apoiu husi públiku. Observador barak koalia dehan Timor-Leste hanesan “estadu frajil” – lidér polítiku nia hahalok aat ne’e hatudu estadu nia frajilidade, no halo estadu frajil liu tan. Tanba ne’e, ami husu lidér istóriku sira, favor husik imi nia konflitu pesoal, lalika ataka malu iha públiku, no foka ba servisu ne’ebé importante liu: harii futuru ida ne’ebé justu, prosperu no pasífiku ba Timor-oan sira hotu.
