Simbolu Segredu
Fundasaun Mahein, 19 Abril 2023
Komunikadu Imprensa:
Tuir notísia ne’ebé Agência Lusa públika iha loron 17 Abril 2023 katak Governu remete ona kuadru legal importante rua ba Prezidente da Repúblika: Revizaun ba Dekretu-Lei n.o 3/2009, 15 Janeiru, Serviço Nacional de Inteligência(SNI) no Estatutu Pessoal SNI.
Pakote lejislativa refere sei ajuda hametin liu-tán profesionalizmu SNI nian nu’udar servisu personalizadu Estadu nian ida ne’ebé rekolla informasaun sira hodi salvaguarda interese Estadu, liu-liu husi ameasa sira ne’ebé bele prejudika Estadu ida ne’e. Misaun SNI nian ne’e importante tebe-tebes ba Estadu ida, tan SNI, hanesan mos servisu intelijênsia sira seluk iha mundu, maka produz informasaun sira ne’ebé ajuda Governu ka Estadu hodi foti desizaun sira ho informadu. Desde existénsia SNI nian iha tinan 14, seidauk iha revizaun ka introdusaun kuadru legal sira ne’ebé ajuda SNI hodi dezempeña ho profesionalizmu, imparsial no liu-liu iha kbiit hodi responde ba dezafiu rejional no global. Natureza dezafiu seguransa atuál iha nível nasional, rejional no globa ejije SNI atu servisu maka’as liu-tán, no ida ne’e katak presiza kuadru legal sira hodi hakbi’it dezempeñu servisu sekreta.
Tuir monitorizasaun ne’ebé Fundasaun Mahein (FM) halo durante ne’e, revizaun ba baze legal SNI refere no introdusaun Estatutu Pessoal própria SNI nian ne’e sai nu’udar passu ida signifikativu, tamba razaun sira tuir mai ne’e:
- Dekretu-Lei n.o 3/2009,15 Janeiro lakon ona relevánsia iha parte balu, tamba ne’e presiza halo ajustamentu ba lei refere hodi bele ajuda SNI implementa misaun ho professional no imparsial;
- Iha esbosu ba revizaun ba dekretu-lei refere, Governu propoin atu estabelese tan diresaun nasional ida dedikadu ba intelijênsia sibernetika Intelijênsia sibernetika ne’e importante tebe-tebes, liu-liu iha mundu globalizadu ohin loron iha ne’ebé sistema hotu-hotu inklui governasaun nian sai dijitalizadu. Ho nune’e, importante ba entidade seguransa liu-liu servisu intelijênsia presiza adapta-an ho realidade mundu dijitalizadu ida ne’e. Liu-tán, ho planu cabo submarino ne’ebé sei mai presiza mos kondisaun seguransa ba infraestrutura vital refere;
- Iha esbosu decreto-lei foun refere mos introdus komponente foun ida maka gabinete inspesaun no auditoria. Ida ne’e sai nu’udar mekanizmu kontrolu ida ka check and balance ida hodi asegura katak atuasaun SNI nian ne’e kumpri duni lei. Iha decreto-lei atuál, la-iha mekanizmu kontrolu ida rigorozu. Durante ne’e, mosu preokupasaun iha públiku liu-liu husi Prezidente da Repúblika kona-bá atuasaun husi SNI nian. Revizaun ba baze legal SNI nian liu-liu estabelesimentu gabinete foun ba inspesaun no auditoria nian ne’e passu ida signifikativu tebe- Iha servisu sekreta sira iha país sira adota demokrasia aplika mekanizmu refere, no sira defini iha lei no estrutura servisu sekreta sira mekanizmu hotu-hotu hodi fó garantia ida ba públiku katak servisu sekreta sira dezempeña sira nia misaun tuir duni lei no ordem.
Sira-nia servisu ne’e sigilo, maibé, sira labele dezempeña funsaun ka kompetênsia sira ne’e iha imunidade nia laran. Tamba ne’e, esbosu lei refere husi Governu importante hodi asegura akuntabilidade no profesionalizmu;
Revizaun ba baze legal ne’e importante tebe-tebes hodi garante katak lala’ok ka ezekusaun misaun sira ne’e hala’o iha maneira iha akuntável, responsável no liu-liu kumpri duni Lei-Inan no lei sira ne’ebé vigora iha Timor-Leste;
- Iha pakote lejislativa refere, Governu mos propoin atu defini estatutu pessoal própriu ba SNI. Ida ne’e passu ida pozitivu tebe-tebes, tamba iha razaun prinsipal rua. Dahuluk, SNI ne’e servisu personalizadu Estado ida esensial tebe-tebes, tamba ne’e presiza estatutu ida ne’e hodi reforsa rekursu umanu iha instituisaun refere. Daruak, natureza servisu SNI nian diferente ho instituisaun públiku sira seluk, ho nune’e, estatutu refere bele ajuda defini modalidade rekrutamentu rekursu umanu, hasa’e liu-tán motivasaun pessoal liu-husi oportunidade dezenvolvimentu pessoal no nível remuneratóriu, favorese espesializasaun pessoal SNI nian iha área oin-oin inklui iha língua estranjeira sira.
- Ho estatutu pessoal própriu, SNI bele ona iha baze legal ida hodi reforsa liu-tán rekursu umanu liu-liu ho estatutu refere bele ajuda prevene politizasaun ba instituisaun ida ne’e. Bainhira la-iha estatutu própriu maka bele loke liu-tán marjin ba polítizasaun servisu sekreta nian tamba la-iha rekrutamentu ho maneira própriu, formasaun no treinamentu própriu ba pessoal SNI nian. Iha kualker servisu sekreta iha país demokrátiku sira, sempre iha estatutu própriu ba rekrutamentu nian. Tamba ho tendénsia polítizasaun instituisaun Estado ne’ebé sa’e maka’as iha Timor-Leste, estatutu foun SNI ne’e bele sai nu’udar esforsu ida signifikante ba profesionalizasaun SNI nu’udar organizmu Estado ida ne’ebé apartidária.
FM fiar katak Prezidente da Repúblika sei promulga pakote lejislativa husi Governu ba fortalesimentu SNI nian. Durante ne’e, FM akompañia tebe-tebes polêmika ne’ebé mosu rezulta husi atuasaun sira SNI nian, maske nune’e, FM rekomenda ba Prezidente da Repúblika atu promulga pakote lejislativa refere atu nune’e, SNI bele sai instrumentu Estadu ida ne’ebé relevante no iha kbiit hodi responde ba dezafiu seguransa sira liu-liu dezafiu seguransa ne’ebé mosu husi plataforma dijital sira.
