Foto : Fundasaun Mahein
Fundasaun Mahein (FM), 5 Outubro 2023
Komunikadu Imprensa
Iha loron 2 Outubro 2023, Media Online Hatutan fó sai noticia importante descreve kona-ba alegasaun acusação liga ho hahalok liderança superior Polícia Científica de Investigação Criminal (PCIC) nian. Tuir artigo media Hatutan ne’e, informação refere mai liu husi “karta protestu hosi internal PCIC”, iha ne’ebé desconfia envolve ou comete caso crime, abuso de poder e irregularidade sira hosi superior PCIC nian ne’ebé noticia ne’e identifica hanesan tuir mai ne’e:
- Desconfia iha individo balun ne’ebé la preenche requisitos hosi Decreto-Lei N.o 15/2014, ho nível educação Escola Secundário de’it, nomeia ba cargo chefia iha PCIC hosi 2015 no continua nomeia to’o 2025;
- Pessoal ne’e mos desconfia comete crime ne’ebé registo iha Ministério Público ho Comissão Anti-Corrupção ne’ebé parte sira constitui ona hanesan arguido ba crime burla agravado tamba desconfia simu vítima sira-nia osan (montante hale’u $700.00) inclui abuso poder tamba utiliza edifício PCIC hodi resolve problema particular balun (caso sira-ne’e desconfia taka ka congela tiha de’it);
- Discriminação hosi superior PCIC nian iha processo formação ba especialista e investigador nian iha rai liur ka delega de’it ema confiança superior PCIC nian maka ba tuir formação iha rai liur;
- Desconfia usa poder hodi assegura pessoal confiança balun iha PCIC facilita fó treino ba executivo PCIC nia oan-mane utiliza armas PCIC nian no pratica tiru iha carrega de tiro PCIC nian iha área Kaitehu, Município Liquiçá;
- Desconfia iha mos caso utiliza armas hodi ameaça ema seluk iha PCIC, tamba problema feto e vítima hato’o queixa bá superior PCIC, maibé la hola medida tamba individo refere pertence ba superior PCIC balun nia ema confiança;
- Desconfia iha mos pessoal cargo chefia balun iha PCIC halo lakon motorizada Estado nian, maibe processo ne’e rai de’it iha superior sira-nia “gaveta” laran;
- Iha fulan-Fevereiro 2023, pessoal cargo chefia ida hetan pena suspensão fulan-rua hosi Tribunal, maibe superior PCIC nian continua promove pessoal refere hodi exerce função nu’udár chefe iha PCIC, maske Comissão da Função Pública (CFP) ho Ministro Justiça Tiago Sarmento la aprova, ho razão katak funcionário público ka agente administração público ida ne’ebé hetan ona sansão disciplinar (suspensão) labele hetan promoção;
- Desconfia iha mos caso amante, entre cargo chefia balun iha PCIC, to’o baku-malu iha arredores PCIC nian no resulta vidro edifício PCIC nian rua rahun. Caso ne’e parte sira hosi PCIC usa poder e força, inclui lori arma ba ameaça família feto nian hodi resolve. Superior sira iha PCIC desconfia taka de’it ou laloke processo disciplinar tamba pessoal rua ne’ebé comete caso amante ne’e nu’udar confiança superior PCIC nian.
Maske FM seidauk bele confirma lolos informação no acusação hotu ne’ebé descreve iha carta ne’e, durante ne’e FM mos rona no observa direita irregularidade balun envolve membro PCIC no mos instituição nia funcionamento. Tuir FM nia observação. acontecimento balun temi iha leten ne’e acontece tambá fator oin-oin hosi liderança PCIC nian, liu-liu incapacidade liderança PCIC nian hodi impõe lei no regulamento sira, no halo serviço la imparcial no discrimina ema baseia ba relação pessoal.
Tamba ne’e, FM husu Governo atu halo investigação kle’an no imediata hodi confirma acusação sira ligado ho crime, abuso de poder no irregularidade sira hotu. Liu husi processo investigação ne’e, Governo bele desenvolve programa ida ne’ebé compreensivo hodi reforma no capacita PCIC. Ho objetivo atu hametin ninia capacidade ba ações kona-ba prevenção, deteção e investigação crime.
Recomendação
- FM recomenda ba Parlamento Nacional cria comissão eventual ida hodi halo investigação ba caso ne’ebé envolve superior sira PCIC nian no acelera processo reforma ba PCIC ne’ebé tama iha competência Parlamento Nacional nian maka liu hosi alteração ba LOIC.
- Baseia ba resultado processo ne’e, Governo bele cria plano reforma compreensivo ba PCIC nu’udar programa principal hosi IX Governo Constitucional iha loron 120 mandato Governo nian.
- FM recomenda ba Procurador-Geral da República nu’udar fiscalizador ba lalaok órgão sira polícia criminal nian, halo fiscalização, inspeção, inquérito e sindicância ba superior PCIC nian ne’ebé desconfia envolve iha caso burla agravado, abuso de poder e irregularidade sira ne’ebé desconfia acontece iha PCIC.
Atu hetan informação kle’an halo favor contacto:
Fundasaun Mahein (FM)
Email: mahein2009@gmail.com
Telemóvel: (+670) 75771766 / 78316075
Website: www.fundasaunmahein.org
