Foin dadauk, Fundasaun Mahein (FM) hakfodak rona notísia kona-ba suspensaun akordu atu entrega ro’o patrolia rua ho klase “Guardian” husi Austrália mai Timor-Leste. Ofisiál sira husi Timor-Leste hatete katak Austrália mak foti desizaun ne’e tanba “kondisaun iha portu navál Hera a’at”. Nune’e mos, ro’o la bele tama iha portu Dili ka Tibar tanba kondisaun atuál la permite. Ministru Defeza hatete katak Governu Timor-Leste sei kontinua hadia kondisaun iha portu navál Hera “servisu hamutuk ho Austrália no mos ho nasaun seluk”, atu nune’e Timor-Leste bele simu ro’o patrolia rua refere.
Desizaun atu suspende ro’o no deklarasaun públika husi Governu halo ema barak konfusaun no hakfodak, tanba razaun oi-oin. Primeiru, Governu Austrália fó sai iha fulan Marsu 2024 katak Timor-Leste sei hetan ro’o rua tinan ida ne’e. Nune’e mos, FM, hamutuk ho observadór sira seluk, husu kleur ona atu transfere ro’o rua ne’e lalais. FM konsidera ro’o ne’e esensiál atu haforsa kapasidade seguransa marítima iha Timor-leste. Ro’o rua ne’e sei mai Timor-Leste hanesan pakote kompreensívu ida, ne’ebé sei inklui formasaun, manutensaun, no reabilitasaun portu navál iha Hera. Konstrusaun iha Hera la’o dadaun, tanba ne’e hamosu pergunta barak kona-ba esplikasaun ne’ebé ofisiál Timor-Leste fornese kona-ba suspensaun ro’o.
Asuntu ne’e kompleksu oituan, tanba refleita interese polítiku ne’ebé bo’ot tebes, no iha posibilidade interese privadu mos kahur iha laran. Maske ita la hatene lolós tanba saida mak akordu ne’e suspende, tuir FM nia hanoin, desizaun ne’e sei kria impaktu bo’ot ba integridade no funsionamentu instituisaun seguransa sira iha Timor-Leste, no mos ba seguransa nasionál Timor-Leste tomak. Tanba ne’e, FM hakerek artigu ida ne’e hodi elabora FM nia hanoin no preokupasaun kona-ba asuntu ne’e.
Primeiru, suspensaun ro’o patrolia ne’e akontese iha kontekstu kompetisaun jeopolítiku entre Xína ho nasaun osidentál sira iha rejiaun Indo- no Ázia-Pasífiku. Situasaun ne’e loke espasu ba nasaun ki’ik sira iha rejiaun atu kompete hodi hetan benefísiu husi nasaun viziñu no parseiru bo’ot sira, liu-liu nasaun ki’ik sira hanesan Timor-Leste ne’ebé ho relevánsia jeo-estratéjiku ne’ebé bo’ot. Hanesan FM hakerek tinan kotuk, Timor-Leste nia parseria estratéjika ho Xína ne’ebé asína iha Setembru 2023 refleita tebes interese jeopolítiku sira ne’e. Akordu ne’e promete atu aumenta kooperasaun militár-seguransa entre Timor-Leste ho Xína. Maibé to’o agora maioria kooperasaun ne’e envolve de’it “vizita boa-vontade” husi ro’o navál Xína.
Timor-Leste aumenta nia kooperasaun seguransa ho Xína ne’e estratéjia ida ne’ebé lori risku bo’ot, maibé nia benefísiu potensiál mos bo’ot. Ne’e duni, sinál hatudu katak Timor-Leste nia estratéjia bele atinje rezultadu ne’ebé di’ak: notísia foin lalais sujere katak Austrália besik atu halo akordu ho Timor-Leste liga ho Greater-Sunrise, ho razaun prinsipál mak Austrália preokupa katak Timor-Leste hakbesik-an ba Xína. Tanba ne’e, karik Austrália mak deside atu suspende ro’o, posibilidade katak desizaun ne’e hanesan resposta ida ba Timor nia estratéjia ne’ebé tenta atu “joga” entre Xína ho Austrália. Karik Timor-Leste mak halo desizaun, desizaun ne’e bele parte husi Timor nia estratéjia atu fó presaun ba Austrália liu husi halo desizaun liga ho setór seguransa ne’ebé susar ba Austrália atu antesipa.
Situasaun ho ro’o patrolia ne’e komplikadu liu tanba deskonfia kahur ho interese pesoal ne’ebé bele hetan benefísiu bainhira negosia fila fali programa reabilitasaun fasilidade navál iha Hera.
FM hetan ona informasaun katak projetu iha Hera – ne’ebé antes ne’e lidera husi kontratór husi militár Austrália – agora paradu tanba desizaun atu suspende ro’o. Hanesan ofisiál F-FDTL nota, kompañia husi “nasaun seluk” bele envolve iha projetu hodi kompleta konstrusaun. FM preokupa katak ofisiál estadu bele hetan benefísiu pesoal liu husi negosiasaun kontratu foun tanba ne’e osan bo’ot. FM hakarak klarifika katak ami la iha evidénsia korrupsaun iha kazu ne’e; maibé, hanesan ita hotu hatene, realidade iha Timor-Leste mak ofisiál estadu dala barak hetan “persentajen” bainhira envolve iha prosesu negosiasaun kontratu konstrusaun, liu-liu bainhira kompañia rasik prontu atu selu hodi manán kontratu.
FM espera katak ami sala, no ami espera desizaun atu suspende ro’o ne’e la kahur ho interese privadu. Maibé, esplikasaun ne’ebé fornese husi ofisiál estadu ladún lójiku. Tanba ne’e hamosu preokupasaun katak iha ajenda seluk ne’ebé influénsia desizaun. Maske nune’e, katak husi kestaun sé mak deside suspende ro’o no tanba sá, FM hare’e risku bo’ot rua tan ne’ebé mosu tanba desizaun ne’e. Primeiru, hanesan FM nota ona iha artigu seluk, dezkontentimentu no dez-uniaun komesa mosu ona entre membru elite F-FDTL sira, no mos entre lideransa ho membru baibain sira. FM rona ona informasaun katak membru ierárika F-FDTL balun la kontente ho suspensaun ro’o patrolia. FM hakarak repete tan ami nia avízu ba polítika na’in sira no membru públiku sira katak devizaun no politizasaun iha setór seguransa ne’e perigozu tebes. Hanesan Timor nia esperiénsia rasik hatudu, no mos esperiénsia iha nasaun seluk, devizaun iha setór seguransa bele hafraku estabilidade no seguransa nasionál. Liu-liu bainhira atór ruma ho intensaun ne’ebé la di’ak tenta atu aproveita devizaun ne’e hodi avansa sira nia interese.
Risku ida tan ne’ebé rezulta husi suspensaun programa ne’e maka impaktu ba funsionamentu no dezenvolvimentu forsa defeza nian. Ida ne’e mos afeita ba Timor-Leste nia seguransa nasionál. Hanesan ami nota ona iha leten, ro’o patrolia rua sei mai Timor-Leste hanesan pakote kompreensívu ida, signifika Timor-Leste sei simu ro’o rua, formasaun, manutensaun ro’o durante tinan tolu-nulu (30), no reabilitasaun portu navál iha Hera. Tuir FM nia hare’e, apoiu ne’e sei ajuda tebes estadu Timor-Leste atu dezenvolve nia kapasidade seguransa marítima. Seguransa marítima ne’e importante tebes ba Timor-Leste, liu-liu tanba osan barak lakon kada tinan husi atividade peska ilegál. Membru governu barak rekoñese realidade ida ne’e tiha ona. Tanba ne’e, suspensaun akordu hamate oportunidade bo’ot atu haforsa seguransa marítima no proteje Timor-Leste nia rekursu natural.
Atu konklui artigu ne’e, maske FM la hatene lolós se mak deside atu suspende ro’o, maibé tuir FM nia hanoin desizaun ne’e fó impaktu negativu bo’ot tebes ba dezenvolvimentu kapasidade seguransa marítima iha Timor-Leste, no mos ba seguransa nasionál. Karik Austrália mak foti duni desizaun ne’e, ne’e ladún lójiku tanba antes ne’e programa la’o ba oin, no Austrália mos deklara iha públiku katak ro’o sei to’o mai Timor iha tinan 2024. Karik Timor-Leste mak foti desizaun,
desizaun ne’e kontra deklarasaun husi ofisiál estadu sira kona-ba urjénsia atu hametin kapasidade seguransa marítima. Tanba ne’e FM hare’e desizaun ne’e la konsistene no la promove interese nasionál.
Iha tempu hanesan, hanesan baibain, FM kontinua preokupa kona-ba interese privadu ne’ebé influénsia ba desizaun polítika sira. FM mos preokupa kona-ba devizaun ne’ebé mosu iha ierárkia F-FDTL tanba membru barak la konkorda ho lideransa nia desizaun balun. Tanba ne’e, FM harak husu ba Governu atu asegura katak desizaun hotu bazeia ba lei ho objetivu atu promove interese nasionál. Ne’e signifika tenke elimina prátika sira ne’ebé tenta atu aproveita pozisaun públiku ba interese privadu. Nune’e mos, FM espera katak Prezidente no Parlamentu Nasionál sei halo fiskalizasaun máximu ba desizaun sira ne’ebé ofisiál militár sira foti liga ho programa kooperasaun seguransa estratéjika sira. Presiza halo investigasaun kle’an kona-ba desizaun atu suspende fornesimentu ro’o patrolia atu determina se mak foti desizaun ne’e, no fatór saida mak influénsia ba desizaun. Nune’e mos presiza buka solusaun atu rezolve situasaun ida ne’e, atu nune’e Timor-Leste bele hetan ro’o patrolia rua ne’e tuir planu orijinál.
