Loron: 21 Outobru 2024
Orsamentu Jeral Estadu (OJE) 2025 Timor-Leste nian aprezenta ho total proposta ida hamutuk dolar amerikanu biliaun 2,6, hodi kontinua esforsu sira hodi hametin setor esensial sira hanesan defeza, seguransa no relasaun esterna sira. Ezekusaun orsamental tinan anterior (2024) nian aprezenta dezafiu signifikativu, ho taxa ezekusaun média 55,2%, ne’ebe revela difikuldade sira iha implementasaun rekursu sira, liuliu iha área krítiku sira hanesan Ministériu Defeza no PCIC.
Ba tinan 2025, proposta orsamentu buka atu finansia programa xave sira, ho dotasaun signifikante ba Ministériu Defeza no ba Forsas Armadas Timor-Leste (F-FDTL). Maibe, iha subutilizasaun persistente ida hosi fundu sira, liuliu ba dezenvolvimentu infraestrutura no ekipamentu sira, área sira ne’ebe esensial ba modernizasaun no resposta ba ameasa rejional sira. Orsamentu ba Polísia Nasional Timor-Leste (PNTL), ne’ebe hasoru mós dezafiu lojístiku no formasaun nian, hatudu foku ne’ebe demaziadu ba saláriu, husik hela rekursu oituan de’it ba investimentu estrutural no teknolójiku.
Kona-ba relasaun esterna, orsamentu ba MNEC reflete intensaun atu habelar prezensa diplomátika Timor-Leste nian, ho nesesidade atu aumenta rekursu ba protesaun konsular no apoiu ba sidadaun timor-oan sira iha estranjeiru.
Proposta destaka nesesidade urjente hodi hadi’a koordenasaun interministerial, formasaun téknika no investimentu iha teknolojia, esensial hodi hasoru dezafiu transnasional sira hanesan tráfiku ilegal no krime sibernétiku sira.
Tanba ne’e atu hetan no hatene kle’an liu kona-ba asuntu sira ne’ebe temi liu daudauk ne’e, haree no hanehan iha link kraik ne’e:
Press Release (PDF)
Relatóriu Kompletu MNL 164 (PDF)
Fundasaun Mahein
Email: mahein2009@gmail.com
Telemovel: (+670) 75771766
Website: www.fundasaunmahein.org
