Foto: FM
28 Marsu 2025
Peskiza ida ne’e ezamina PNTL nia situasaun operasionál atuál, liu-liu prosesu alokasaun rekursu, dezafiu infraestrutura no ekipamentu, no mekanizmu envolvimentu komunidade sira. Estudu ne’e analiza dezafiu sira ne’ebé PNTL hasoru iha munisípiu oioin, ho objetivu atu fornese análise detalladu ida kona-ba lakuna sistémiku ne’ebé instituisaun polisia hasoru dadaun, no mos oferese rekomendasaun atu hasa’e instituisaun nia efisiénsia no efikásia, hodi garante seguransa ba sidadaun Timor-oan sira hotu.
Bazeia ba intervista estruturadu ne’ebé hala’o ho komandante no ofisiál PNTL sira, no mós ho eis-ministru governu nian ida, relatóriu ida nee subliña nesesidade atu halo mudansa no investimentu liga ho rekrutamentu, formasaun no distribuisaun rekursu. Governante sira tenke responde ba dezafiu urjente sira ne’e atu PNTL bele ne’ebé sai reziliente no adaptativu liu, nune’e bele responde ba Timor-Leste nia nesesidade seguransa no justisa kriminál ne’ebé sempre muda.
Atu bele responde ho kompriensívu no sustentável ba dezafiu sistémiku ne’ebé peskiza ne’e identifika, FM hanoin katak Governu Timor-Leste tenke dezenvolve Polítika Programasaun PNTL nian. Polítika ne’e tenke dezenvolve liu hosi peskiza intensivu kona-ba nesesidade polisiamentu atuál no futuru, depois bele uza rezultadu peskiza hodi dezeña alvu klaru kona-ba investimentu no dezenvolvimentu ba tempu badak, médiu no naruk. Polítika Programasaun ida ne’e sei sai nu’udar matadalan ba reforma no investimentu sira ho objetivu atu haforsa PNTL nia kapasidade, atu nune’e instituisaun ne’e bele responde ba dezafiu sira polisiamentu no seguransa nian ba oin.
Polítika Programasaun sei garante katak mudansa no investimentu sira sei responde ba nesesidade institusionál sira duké interese pesoal ka partidu. Polítika ne’e mós sei garante kontinuidade bainhira governu troka, nune’e garante sustentabilidade dezenvolvimentu kapasidade nian.
Atu asesu ba Sumariu Ezekutivu verzaun Tetun bele klik iha link iha kraik ne’e.
Komunikadu Imprensa(PDF)
Sumariu Ezekutivu MNH 21(PDF)
Fundasaun Mahein
Email: mahein2009@gmail.com
Telemovel: (+670) 75771766
Website: www.fundasaunmahein.org
