FALINTIL- Forsa Defeza Timor-Leste: Misaun, Intervensaun no Direitu sira ne’ebé Bandu

Relasiona situasaun polítika no seguransa ho intervensaun militár halo presaun no ba serku rezidensia Angela Freitas, no ameasa atu “futu no sama belár” portavós grupo Rezistensia Nasional Defende Justisa no Konstituisaun (RNDJK) Angela Freitás (AF) no Antonio Ai Tahan Matak (AATM). Hafoin Militár sira serku AF iha loron 02 Setembro 2020. Iha deklarasaun ba media Ministru Defeza hato’o katak Jeneral Lere iha rasaun atu serku rezidensia AF tamba atu asegura kilat ilegal. Lia hanesan hato’o husi Presidente Komisaun B – Parlamentu Nasional ne’ebé trata asuntu defeza, seguransa no negosiu estranjeiru, hatete atuasaun ne’e halo tamba iha risku ba estabilidade nasional. Iha sorin seluk Komandante Jeral Polísia Nacional Timor-Leste (PNTL) hatete vijilansia ne’ebé Falintil – Forsa Defesa Timor Leste ( F-FDTL) ba AF nia rezidensia ne’e tuir Lei Seguransa Nasional, tamba desde situasaun 2017 komandu PNTL husu F-FDTL atu fó apoiu ba PNTL iha seguransa interna.

Tuir Lei Nú.2/2010 loron 21 Abril – Lei Seguransa Nasional hatete, wainhira hare iha situasaun nia todan tebes maka justifika katak iha razaun duni atu halo empeñu operasional. Nune’e bele hari komandu konjunta operasional, funsiona entidade sira iha Sistema integradu Seguransa Nasional, regra empeñamentu ne’ebé justifika ba empenhu operassional. (SISN), (art. 36, nú 3, 4,5). No involvimentu husi F-FDTL ba iha siguransa interna hanesan knaar komplementar ida ne’ebé akontese ho nia situasaun rasik. (Lei Nú.04/2010 loron 21 Abril – Lei Seguransa Interna art.14, letra a). Nune’e F-FDTL nafatin kumpre nia misaun esklusivamente atribui ona tuir konstituisaun no lei aplikavel sira seluk.

Konstituisaun no Lei defeza no Militár kona-ba misaun F-FDTL

Konstituisaun RDTL artigu 146^o define ona misaun F-FDTL, alinea 2 hatete F-FDTL garante indepenensia Nasional, integridade territorial, liberdade no populasaun nia seguransa hasoru agresaun ruma ka ameasa externa, ho repeitu ba ordem konsitusional.

Tuir Estatutu Organika F-FDTL, dekretu Lei Nú 15/2006 loron 8 Novembro, misaun espesifiku husi F-FDTL nia maka;

• garantia vijilansia ba fronteira (Terestre, Maritima no Aero)
• halo salvasaun ba tasi laran nia
• fó apoiu ba autoridade sivil iha ambitu ba satisfasaun nesesidade bazika no mós atu hadia kualidade moris populasaun nian
• fó apoiu ba ordem konstitusional, iha ambitu ba partisipasaun iha situasaun deklarasaun estadu de sitiu ka estadu de emerjensia nia
• fó apoiu ba populasaun sira iha kazu katástrofe natural ka kalamidade públika
• fó apoiu ba politika externa, liu husi asaun kooperasaun tekniku – militár, partisipasaun iha operasaun apoiu ba Paz, operasaun umanitariu no asaun sira seluk sei determinadu iha ambitu akordu internasional sira nia.

Lei Nú. 2 /2010 loron 21 Abril – Lei Seguransa Nasional, artigu 8- husi misaun ba FALINTIL-FDTL nia maka:

• responsável ba defeza militar RDTL, halo tuir Konstituisaun, lei no akordu sira kona-bá direitu internasional maka hala’o iha Timor-Leste
• Hala’o kna’ar iha misaun seluk fó tulun ba autoridade sivil, iha kuadru Sistema Integradu Seguransa Nasional, fó tulun ba polítika esterna Estadu nian, iha operasaun atu fó tulun ba pás no umanitaria.

Tuir Lei Nú. 3 /2010 loron 21 Abril, Lei Defeza Nasional – misaun husi forsa armada sira define iha artigu 23 maka hanesan:

• F-FDTL halo tuir Konstituisaun, kaer metin defeza militár hasoru agresaun ka amesa husi liur, presiza sura nia natureza ka forma oinsa maak bele fó sai.
• Hatan ba iha ambitu militár tuir komprimisiu internasional sira maka simu ona, partisipasaun iha misaun umanitária, fó tulun ba paz.
• Hola parte iha SISN fó kolaborasaun, tulun autoridade sivil sira iha misaun protesaun sivil ho nia knar sira ne’ebé ligasaun hodi hatan ba nesesidade baziku hodi hadia kualidade moris populasaun, liu-liu iha situasaun kalamidade públiku maka la justifika suspensaun ba ezersisiu direitu sira nian. (LDN, Art, 23, nú 1, 2, 3)

Ordem demokrátiku ho kontrolu sivil-militár

Iha rai demokratiku sira no mós iha Timor-Leste adopta sistema kontrolu sivil-militár. Signifika militár sira halo tuir ka kumpre dezisaun polítika, husi sira ne’ebé tu’ur iha ierarkia a’as liu militár nia. Lei Defeza Nasional Kapitulu III hatete estrutura superior liu iha defeza nasional maka orgaun suberanu sira. Iha Konsellu Superior Defeza no Seguransa, Xefe Estadu Maior General F-FDTL, Konselu Superior Defeza Militár. Artigu 11 kona-bá orgaun Suberania nú 1 hatete F-FDTL maka hala’o servisu ba povu no hakru’uk ba determinasaun sira husi poder polítiku demokrátiku, maibe maka la’os husi partidu sira, tuir ho termus sira husi Konstituisaun, husi lei ida-ne’e no husi lejislasaun seluk tan maka iha vigor.

Iha estrutura sivil-militár ne’ebé a’as assume husi Prezidente Repúbliku maka nu’udar komandate supreme forsa armada F-FDTL – ne’ebé iha direitu atu halo ratifikasaun, iha kazu atu uza forsa husi parte forsa armada sira, regra sira halo empeñamentu nian maka define, ho proposta husi membru Governu nian ho kompetensia iha matéria defeza nasional no hetan aprovasaun iha Konsellu Ministru. (LDN art.14, aline 2. C)

Parlamentu Nasional – iha kompetensia lejislativa sira no halo kontrolu kona-bá Defeza Nasional. Halo kontrolu no Fiskalizasaun ba empeñamentu F-FDTL nian, tuir ho termu sira iha Konstituisaun, iha lei ida ne’e no iha lejislasaun seluk maka iha vigor. Nune’e PN iha dever atu husu responsabilizasaun ba aktu sira ne’ebé akontese relasiona atuasaun militár ne’ebé la tuir ordem konstitusional ne’ebé liga ho protesaun ba direitu, seguransa no liberdade populasaun sira. (LDN, art, 15, c) no e))

Governu – Órgaun soberania responsável atu kaer no hala’o polítika kona-bá Defeza Nasional no órgaun superior Forsa Armada sira nian. Governu maka iha kbiit kona-bá defeza nasional no determina mobilizasaun sivil ka militar. (LDN, art 16, alinea 2) g)

F-FDTL nia intervensaun ba Grupo RNDJK

Iha loron 31 Agostu Xefe Estadu Maior Jeneral, Maijór Jeneral Lere Anan Timur deklara ba media katak la permite grupo ne’ebé lidera husi portavós AF no AATM atu halo manifestasaun hodi hatun Prezidente Repúblika. Laiha fatin ba sé deit atu halo manifestasaun hatun lider rejistensia sira hanesan Lú Olo, Taur Matan Ruak, Mari Alkatiri, Xanana Gusmão no Ramos Horta. Hanesan fundadór sira iha direitu atu ukun rai ida ne’e tuir sira nia vontade. Sé ema ruma maka laliu husi dalan formal obriga hatun sira husi kargu maka miliitár sei tun hodi futu no sama belar tiha sira.

Lei Defeza Nasional, artigu 63 Tau bandu ka restrisaun ba militár sira atu hala’o direitu sira katak, F-FDTL maka halo servisu ba povu no labele halo parte iha partidu polítiku, maibe halo esersisiu ba direitu espresaun, sorumutu, manifestasaun, asosiasaun, no petisaun koletiva no kapsidade eleitoral pasiva husi militár no ajente sira militarizadu kuadru permanente no kontrolu iha servisu efetivu hala’o tuir ho termu sira husi númeru hirak tuir mai ne’e.

• Militár sira labele halo deklarasaun públika ho karakter polítiku ka seluk ruma maka bele hamosu risku iha koezaun no iha disiplina F-FDTL nian ka la respeita ba dever izensaun polítika no la halo parte iha partidu polítiku ida husi ninia elementu sira.
• la ho autorizasaun husi superior, halo deklarasaun públika maka koalia kona-bá asuntu sira FFDTL nian, ho esepsaun koalia kona-bá kestaun natureza téknika deit maka tama iha publikasaun sira halo husi F-FDTL no husi autoria militár sira nian maka hala’o knar sira permanente iha diresaun ka redasaun rasik nian.
• labele konvoka ka partisipa iha manifestasaun ruma ho karakter polítiku, partidu polítiku ka sindikatu sira nian.
• labele sai membru ba asosiasaun ho natureza polítika, partidu polítiku ka sindikatu sira nian, labele mos partisipa iha atividade ruma maka hala’o ho asosiasaun hirak ne’e, ho esepsaun uainhira halo parte iha asosiasaun profisional ho kompetensia deontolojika no iha ambitu kompetensia ne’e rasik.
• labele promove ka hato’o petisaun koletiva hodi haruka ba órgaun sira soberania nian ka ba superior ierarkiku sira rasik kona-bá asuntu ho karakter polítiku ka kona-bá ForsaArmada sira nian. (LDN, Art. 63, alinea 1, 2, 3, 4, 5, 7)

Nune’e F-FDTL nia misaun define iha Konstituisaun RDTL, Estatutu Organika F-FDTL, Lei Defeza Nasional, Lei Seguransa Nasional no regulamentu aplikavel sira seluk. Misaun Prinsipal F-FDTL nia maka Defeza Externa, Soberania Nasional, no liberdade populasaun. Iha implementasaun ba misaun hirak ne’e militár labele afavor ka iha partidu polítiku, halo intervensaun ba interese polítiku partidaria maibe halo tuir deit dezisaun polítika husi orgaun soberanu sira ne’ebé iha estrutura sivil-militár F-FDTL nia. Iha atuasaun sira ne’ebé halo tenke repeitu ba ordem konstitusional, fó garante ba sidadaun sira nia liberdade, seguransa no apoiu populasaun sira. Atu hatan ida ne’e F-FDTL tenke hasa’e kapasidade iha kooperasaun sivil no militar, iha area tékniku no operasional, ne’ebé formula iha polítika defeza nasional.  

Ikus liu – iha kazu atual Timor-Leste infrenta hela situasaun kalamidade públiku hasoru pademia Covid-19. Presiza F-FDTL nia apoiu maximu hodi apoiu populasaun sira iha luta ida ne’e, ajuda hasa’e kooperasaun ho autoridade sivil sira halo servisu ba misaun apoiu umanitaria hodi ajuda kualidade moris populasaun.