PT PINDAD (Persero)-Indonezia
Fundasaun Mahein, 24 Juñu 2013
Komunikadu Imprenza
Fundasaun Mahein (FM) bem vindu ba desizaun sorumutu estraordinariu Konsellu Ministru ne’ebé hala’o tiha ona iha loron 14 Juñu 2013. Desizaun husi sorumutu estraordinariu ida ne’e hasai ona rezolusaun ida kona-bá Kriasaun Komisaun Eventual ida atu analiza prosesu sosa kilat ba PNTL husi Kompañia Indonezia PT PINDAD (Persero). Objetivu husi Kriasaun Komisaun Eventual tuir sujestaun husi Parlamentu Nasional nian ba Premeiru Ministru atu harii komisaun ida hodi investiga prosesu sosa kilat ba PNTL.
Investigasaun ba prosesu sosa kilat husi Kompañia Indonezia PT PINDAD, FM kestiona iha relatoriu dahuluk ne’ebé tenke halo investigasaun ba prosesu sira ne’e tanba la ho sistema aprovizionamentu ne’ebé diak. Hetok aat liu tan, kilat ne’ebé sosa la iha kualidade, nune’e ekipa teste kilat seidauk hato’o relatoriu ba Paralmentu Nasional Komisaun B no Konsellu Ministru seidauk halo aprovasaun, kilat refere Komandu Jeral PNTL hatama uluk tiha ona.
Ikus Parlamentu Nasional Komisaun B kestiona katak kilat ne’ebé hatama konsidera ilegal tanba Konsellu Ministru seidauk aprova rezultadu teste kilat no hatama kilat. Iha altura ne’eba Parlamentu Nasional Komisaun B no FM husu atu halo investigasaun ba prosesu sosa kilat ba PNTL husi PT PINDAD (Persero) – Indonezia.
Ho desizaun Konsellu Ministru hasai rezolusaun ida iha loron 14 Juñu 2013, FM fo bem vindu ba Komisaun Eventual ida ne’e hodi lidera investigasaun ba prosesu sosa kilat nian. Nune’e bele garante garante manutensaun ba objetivu Planu Estratéjiku Dezenvolvimentu (PED) 2011-2030, ne’ebé maka hakarak atu harii polisia profisional, ho orientasaun tuir prinsipiu hirak kona-bá boa governasaun no transparensia institusionál, importante tebe-tebes ba dezenvolvimentu seitor siguransa nian.
Komisaun Eventual ne’ebé sei harii presiza involve orgaun Estadu nian tomak no sosiedade sivil sira, nune’e bele garante independensia komisaun nian, lidera husi Ministériu Defeza no Siguransa, no kontrola husi Parlamentu Nasional Komisaun B nu’uadr orgaun fiskalizador. Iha Komisaun Eventual ida ne’e mos FM rekomenda presiza involve mos Komisaun Anti Korupsaun (KAK) iha prosesu investigasau hodi hare sistema aprovizionnamentu nian, prosesu tenderizasaun no prosesu seluk hakait ba sosa kilat nian. Ne’ebé prosesu inisiu responsavel ba aprovizionamentu Sekretaria Estadu Siguransa (SES) no Komandu Jeral PNTL dudu ba mai. Lolos SES nu’udar orgaun responsavel masimu ba politika, orsamentu, aprovizionamentu no administrasaun siguransa nian maka lidera maibe responsabilidade ida ne’e dudu tiha ba Komandu Jeral PNTL.
Tanbasa maka desidi sosa kilat husi Indonezia? Maske iha razaun balu husi SES no Komandu Jeral PNTL, desidi sosa husi PT PINDAD (Persero) – Indonezia maka besik liu no deklarasaun balu husi Komadante Jeral PNTL Komisariu Longuinhos Monteiro katak kilat PM2 – V1 nian rasik maka dezeña maibe FM hare katak razaun ida ne’e la naton atu justifika kona-bá sosa kilat husi PT PINDAD – Indonezia. Maibe tenke tau importansia ba nia impaktu siguransa nian ne’ebé bele implika ba instabilidade nasional. Tanba Indonezia rasik seidauk bele garante kona-bá kontrola kilat nian no PT PINDAD (Persero) rasik deskonfia involve iha fa’an kilat ba grupu premanismu sira iha Indonezia, imprezariu no nasaun balu iha Azia ne’ebé FM kestiona iha relatoriu dahuluk.
Nune’e mos Timor-Leste no Indonezia iha fronteira ne’ebé besik tantu terestre no maritima nia ne’ebé frajil tebes ba atividade kontra bandu. FM nian tauk kilat PT. PINDAD (Persero) bele monu mos ba grupu krime organizadu sira nia liman no infiltra tama iha Timor-Leste. Karik tama no halo asaun ruma, responsabilidade ba asaun ne’e sei dun ba mai ka grupu organizadu sira halo asaun ruma iha liña fronteira bele dun ba PNTL. Tanba kilat bele hanesan ho PNTL nian no susar atu identifika.
Rekomendasaun:
1. Rekomamenda ba Ministériu Defeza no Siguransa presiza hadi’a prosesu hotu iha sistema aprovizionamentu ne’ebé durante ne’e la’o iha Ministériu ne’e rasik, ne’ebé ikus sosa kilat ba PNTL lolos Ministériu Defeza no Siguransa ezekuta husi SES nia kompetensia maibe monu tiha fali ba Komandu Jeral PNTL nia liman.
2. Rekomanda ba Parlamentu Nasional Komisaun B uza nia poder nu’udar orgaun fiskalizador husu SES no Komandu Jeral PNTL nakloke ba Komisaun Eventual ne’ebé sei halo investigasaun ba prosesu sosa kilat ba PNTL.
3. Komisaun Eventual ne’ebé sei harii presiza involve Komisaun Anti Korupsaun (KAK) iha prosesu investigasaun hodi hare ba asuntu aprovizionamentu nian no prosesu tomak kona-bá sosa kilat ba PNTL.
4. Governu presiza harii Empreza Públika ida ne’ebé nia kna’ar kona-bá akizisaun mateiral siguransa nian ne’ebé regulariza iha lejislasaun ida no kontrola husi autoridade Estadu nian hanesan Parlamentu Nasional. Empreza públika ida ne’e funsiona mos halo estudu kle’an kona-bá prosesu hotu-hotu relasiona sosa material siguransa nian tantu hare ba prosesu akizisaun nian maibe aspetu impaktu siguransa nian mos.
Atu hatene kle’an liu kona-bá asuntu ne’e bele kontaktu:
Diretor Ezekutivu Fundasaun Mahein Nélson Belo, email: nelson@fundasaunmahein.org no Telp +670 7737 4222 ka Adjuntu Diretor João Almeida, email: joao@fundasaunmahein.org no Telp +670 77561184. Website : www.fundasaunmahein.org
Hau hanoin Bele sosa kilat! Maibe pergunta maka ne’e’ Sosa beibeik kilat ba halo saida ? atu tiru tan se no atu oho tan se iha RAI IDA NE”E! pekupasaun maka ne’e ” Nusa maka la hare koalidade profesional instituisaun! Tamba wainira hari’i ona koalidades profesional ida iha instituisaun maka fiar katak prosesu hola kilat ne’e sei la sai duvida. Rasaun tamba kilat nebe maka sei hola husi PT PINDAD persero indonesia ne’e” karik la profesional maka sei hamosu instablidade iha tempo oin mai.