Lisaun Ida Hodi Hakat ba Oin Ho Dezafiu Foun Ba Estabilidade Nasional

Foto Internet

Fundasaun Mahein, 26 Dezembru 2014

Komunikadu Imprensa

Mahein Nia Lian ba dala 93 (Relatoriu Kompletu Versaun Tetun,pdf), (English Version.pdf) halo análiza profunda kona-bá kestaun sira ne’ebé sai nu’udar tentativa ba siguransa nasional. Relatoriu ida ne’e konsidera disturbu sistematiku sira iha pasadu hanesan kazu 4 Dezembru 2002, demonstrasaun organizada durante loron 19 iha tinan 2005, krize politika milítar 2006 no atentadu loron 11 fulan Fevereiru tinan 2008 sai nu’udar ameasa sira ne’ebé provoka estabilidade nasional.

Relatoriu ida ne’e mensiona katak akontesementu justifika situasaun sira pasadu ne’ebé husik hela fitar mean ba unidade nasional Inklui hamosu grupuizmu no organizasaun massa iha Timor-Leste wainhira hetan influiensia husi asosisaun politiku sira. Grupu Arte Marsial – GAM, CPD-RDTL, KRM no grupu ilegal sira seluk iha Timor-Leste. Iha ne’ebé ikus mai ezistensia grupu no organizasaun hirak ne’e konsidera nu’udar tentativa ba siguransa nasional no Governu taka ho rezolusaun no operasaun.

Hanesan konflitu GAM hahu entre tinan 2007 to’o 2012 ne’ebé baku malu no oho malu iha rai-laran no estranjeiru entre Timor-oan sai nu’udar tentativa boot ba situasaun siguransa povu nian no soberania Nasaun. Ikus mai Governu deside taka ho rezolusaun hanesan PSHT, KORK no Kera Sakti. Nune’e mos ezistensia grupu CPD-RDTL ne’ebé Governu taka ho rezolusaun tanba konsidera fo ameasa ba siguransa nasional. Relasiona ho movimentu ne’ebé “para-militar” hodi halo komunidade senti la hakmatek.

Tentativa seluk ba siguransa nasional ne’ebé FM relata iha relatoriu ne’e maka ezistensia grupu Konsellu Revolusaun Maubere – KRM iha 2013, lideradu husi Mauk Moruk. Iha ne’ebé Governu ikus mai taka ho rezolusaun relasiona ho ejijensia oin-oin no estetmentu kro’at hasoru Primeiru Ministru Xanana Gusmão no politika Governu kona-bá moris diak maioria populasaun Timor-Leste nian. Ho ninia tendensia no natureza kait hela ba problema sosial, ekonomia, no konflitu polítika pasadu luta armada nia.

No, husi sikun seluk, relatoriu ne’e relata mos ameasa sira ohin loron no futuru ne’ebé presiza Governu tau atensaun maka movimentu grupu krimi organizadu no ameasa transnasional sira seluk ne’ebé bele estraga estabilidade nasional. Hanesan trafiku ba droga, falsifikasaun dokumentu, fase osan, sirkulasaun osan falsu, mafiouzu no grupu kriminozu sira seluk.

Rekomendasaun:

1. Rekomenda ba Ministériu Defeza no Siguransa presiza halo diskusaun no avaliasaun ba situasaun siguransa nasional Timor-Leste nian hodi deskobre kle’an liu tan movimentu krime organizadu no krime transnasional nia forma no nia operasaun.

2. Rekomenda ba Komandu Jeral PNTL hodi fo orientasaun ba Komandu Distrital hotu-hotu hodi monitoriza atividade arte marsial hirak ne’ebé mensiona iha rezolusaun hodi taka arte marsial ne’ebé kuiñesidu ho violensia.

Atu hatene kle’an liu kona-bá asuntu ne’e bele kontaktu:

Nélson Belo

Direktur Ezekutivu FM

Web: www.fundasaunmahein.org

E-mail: direktor.mahein@gmail.com

Telefone (+670) 7737-4222 ka (+670) 77561184