Timor-Leste nia eleisaun presidensiál periodu 2022-2027 konsidera nu’udar sasukat fundamentál hodi rezolve empasse polítika ne’ebé provoka ameasa seguransa nasionál no dezenvolvimentu sosio ekonómiku ba estadu Timor-Leste. Destinu RDTL ba tinan 30 mai oin tenke hatur hosi desizaun polítika saudável no estratéjiku. Liu-liu, polítika externa ba seguransa, defeza no negósiu estranjeiru ne’ebé estratéjiku no dinámiku hodi garante dezenvolvimentu ekitavel no seguransa ba sidadaun hotu-hotu.
Presidente da Repúblika (PR) nu’udar chefe estadu no forsas armadas iha responsabilidade atu kria relasaun externa ne’ebé asegura Timor-Leste nia pozisaun iha mundu no lori Timor-Leste hodi partisipa iha dezenvolvimentu rejional ho dalan ne’ebé sustentável no ekitavel. Signifika katak kandidatura PR obrigadu iha koñesimentu klean kona-bá polítika negósiu estranjeiru, seguransa no defeza nasional, no komitmentu haklean relasaun ho nasaun vizinhu sira, inklui grupu ASEAN. Nunee mos, PR tenke haree ba kestaun geopolítika ne’ebé iha tendensia sai ameasa – ka oportunidade – ba Timor-Leste nia seguransa sosio ekonómiku, dezenvolvimentu, no seguransa nasionál. Tanba ne’e, Fundasaun Mahein haree katak polítika kandidatura prezidensial ba seguransa, defeza no negósiu estranjeiru tenke prioritiza iha planu polítika kandidatura PR ba periodu 2022-2027. Iha artigu ida-ne’e, FM sei diskute preokupasaun fundamental tolu ne’ebé sai prioridade ba PR foun: 1). Garante estabilidade no seguransa nasionál 2). Garante Funsionamentu Estadu ho transparansia no demokrátiku 3). Relasaun externa, diplomasia, no polítika estratéjika.
Fundasaun Mahein hakerek bebeik kona-bá konsekuensia hosi la-tau matan ba seitor seguransa ne’ebé sai ameasa ba estabilidade iha Timor-Leste. Konflitu entre grupu, no partidariu fó implikasaun bo’ot ba lalaok seguransa no defeza iha ita nia rai. PR tenke garante unidade nasionál no soberanu estadu liu hosi kompetensia ne’ebé elabora iha Artigu 86, Konstituisaun RDTL kona-bá prejide atividade Konsellu Superior Defeza no Seguransa. PR nia papel atu garante instituisaun seguransa hanesan PNTL tenke kontribui no promove dame no estabilidade iha rai-laran. Nunee mos, PR tenke asegura katak instituisaun estadu seguransa no defeza treinadu no informadu kona-bá sira-nia papel hodi asegura dame iha sosiedade nia leet. Tanba iha realidade, kapasidade no hahalok instituisaun seguransa estadu sei dook tebes hosi vizaun konstitusionál estadu demokratiku nian. Haree hosi kompetensia ne’ebé atribui hosi Artigu 86 Konstituisaun PR tenke hola pozisaun nu’udar chefe estadu hodi Garante estabilidade no asegura seguransa nasionál. Nu’udar komandu supremu forsa armadas, PR mos tenke kria mekanismu hodi prevene konflitu nasionál tantu terioriál, inklui disputa geopolitika no inseguransa internal.
FM haree katak Grupu Arte Marsiais (GAM) influensia tebes iha sosiedade Timor. Problema politizasaun setor seguransa kontinua akontese iha instituisaun estadu hanesan Ministeriu Interior. Inseguransa iha rai laran, tinan 10 nia laran rona no haree hosi povu nia matan-tilun maka konflitu arte marsiais. Maske FM no ema barak husu kleur ba Governu atu tau matan ba problema ida ne’e, GAM sira kontinua konsege rekruta joven barak no aumenta sira nia atividade. Maske dadus konkretu seidauk iha, observador balun koalia dehan númeru membru GAM kontinua aumenta kada tinan. Papel seluk tan ne’ebé tenke halo maka promove Timor-Leste nia arte no kultura. Ida nee bele fasilita dame no seguransa iha rai laran no mos hasa’e Timor-Leste nia imajen iha rai liur, no bele sai rekursu diak ida atu dezenvolve setor turizmu. GAM bele konsidera nu’udar arte ka desportu hodi partisipa iha kompetisaun arte kampeaun oin-oin iha mundu, en vez de hamosu konflitu hodi pertuba estabilidade.
Asuntu importante seluk maka relasaun PNTL ho komunidade sira. Ohin loron, membru PNTL barak sai ameasa ba komunidade sira-nia seguransa liu husi indisiplina no aktu brutalidade. Iha diskusaun públiku barak maka esklarese kona-bá povu nia konfiansa ba PNTL mihis ba bebeik. Nuudar Chefe Estadu, PR tenke kontinua halo kordenasaun no fiskalizasaun ba Governu, liu-liu, Ministeriu Interior hodi intensifika papel PNTL ne’ebé atu garante estabilidade nasionál.
Establidade nasionál akontese ho sustentável wainhira PR kontinua halo dialogu ho instituisaun estadu, liu-liu instituisaun seguransa, no hametin relasaun ho Primeiru Ministru no Governu tomak. Konseitu “lori timor ba mundu no lori mundu mai Timor” sei akontese depende ba xefe estadu nia komitmentu, kapasidade, no karakter lideransa transformativu ne’ebé apartidáriu. Nune’e, PR tuir mai tenke halo esforsa atu kolabora ho Governu, Parlamentu Nasionál, no Tribunál hodi hamoris valór Repúblika Demokrátika. Tenke sai símblo unidade nasionál ne’ebé ho karakter moderadu hodi promove igualdade no justisa iha sosiedade no estadu. Iha parte seluk PR tenke garante Funsionamentu Estadu ho transparénsia no demokrátiku. Atu garante funsionamentu instituisaun estadu iha kontextu Timor-Leste maka aproximasaun polítika tenke estratéjika liga ho kada instituisaun no utiliza karakter lideransa ne’ebé nakloke hodi hatur balansu no armonia entre instituisaun sira.
Kona-bá asuntu relasaun externa, diplomasia, no polítika estratéjika entre Timor-Leste ho nasaun seluk ne’ebé iha interese estratéjiku, esperiensia Timor-Leste iha pasadu hatudu PR nia partisipasaun iha politika esterna minimum tebes. PR Timor-Leste dala barak la partisipa iha inkontru externu sira no forum internasionál sira ne’ebé iha relevansia ho Timor-Leste nia experiensia no interese. Tanba ne’e, aleinde kestaun seguransa iha rai laran, nesesáriu tebes PR iha kapasidade no motivasaun natoon hodi lidera interese estadu iha rejiaun no mundu. Estratejia diplomasia hodi promove Timor-Leste iha nível internasionál tenke sai vizaun ida ne’ebé klaru, no integradu ho objetivu no planu dezenvolvimentu nasionál.
Nunee mos, PR tenke hametin relasaun internasionál no dirije atividade diplomasia ho nasaun sira ne’ebé laos deit iha relasaun istóriku ho Timor-Leste maibé mós nasaun sira ne’ebé konsidera estratéjika no importante ba Timor-Leste nia seguransa no dezenvolvimentu ekonomiku. Oportunidade importante ida maka hametin koperasaun ho ASEAN no nasaun Ázia sira seluk hanesan Xína, Japaun ho Korea atu garante setor ekonomia, defeza no seguransa ne’ebé diak ba Timor-Leste. PR tenke mai ho kompreensaun no planu ne’ebé rigorozu no kontestuál hodi ezije governu tau-atensaun ba nesesidades no kapasidades intelektuál, inklui rekursu infrastrutura no akomodasaun ho estandarte internasionál hodi fasilita atividade membru nasaun ASEAN ne’ebé pelu-menus akontese mil inkontrus kada tinan. Allende menus rekursu umanu no infrastrutura, kapasidade iha setor seguransa sai mós obstaklu ba Timor-Leste bainhira adere ba ASEAN.
ASEAN Rejional Forum (ARF) nu’udar pilár importante iha seguransa no defeza iha membru estadu ASEAN. Timor-Leste invove kedas iha tinan 2005 no maioria diskusaun mak kona-bá seguransa rejionál. Maibé to’o ohin loron negosiu no diplomasia sei sai nafatin lakunas ba estadu Timor-Leste. Aleinde ne’e, iha rejiaun Ázia-Pasifiku tuir diskusaun global hatudu katak too tinan 2030 kresimentu industria no negósiu sei hasae nia kualidade no produsaun ne’ebé signifikante. Maibé, FM preokupa katak Timor-Leste nia rekursu umanu seidauk dezenvolve natoon atu bele aproveita benefísiu husi kresimentu ekonomiku ne’e.Nune’e, FM preokupa tebes ho kondisaun seguransa no sosio-ekonómiku iha futuru Timor-Leste wainhira Presidente da repúblika la investe enerjia no rekursu sufisiente hodi responde ba asuntu ne’e.
Tanba ne’e, PR tenke iha kapasidade atu aproveita no promove relasaun entre Timor-Leste ho nasaun sira seluk bazeia ba relasaun istóriku, jeografiku no estratejiku iha area ekonomia no seguransa. PR tenke identifika nasaun ka grupu nasaun ne’ebé mak bele fornese benefísiu ba Timor-Leste nia estabilidade, seguransa no dezenvolvimentu nasionál. Au mezmu tempu, PR tenke komprende risku seguransa no geopolítiku iha rejiaun no mundu, liga ho kompetisaun poder entre nasaun boot. Timor-Leste nuudar nasaun kiik ida la bele monu tan ba interese no jogu internasional hanesan akontese iha pasadu.
Nune’e mos, Indonézia no Australia konsidera nu’udar nasaun vizinu ne’ebé fahe istória ho povu Timor-Leste iha tempu naruk, maske envolve iha krime no hahalok aat barak kontra povu Timor-Leste iha pasadu. Iha diskusaun públiku barak durante ne’e sujere atu Estadu Timor-Leste estabelese mekanismu “free pass” ba povu Timor no povu Indonesia iha fronteira. Razaun fundamental maka relasaun sosiál, istóriku, no kulturál entre nasaun rua ne’e forte no ativu tebes. Timor-oan barak mos sai buka moris no edukasaun iha Australia, Portugal, Inglaterra ho Irlanda. Tamba ne’e FM husu oinsá PR foun bele konsidera Timor-oan sira iha iha Australia, Portugal, Indonesia hodi sai rekursu ba Timor, atu nunee sira bele kontribui ba prosesu dezenvolvimentu nasionál.
Konkluzaun
Timor-Leste iha hela espasu kritiku no hasoru inseguransa ekonomia no politika seguransa no defeza. PR foun tenke asegura seguransa ekonomia rai-laran liu hosi planu estratejiuku externa hodi aproveita kresimentu iha merkadu internasionál no kooperasaun seguransa. Kandidatura PR tenke iha ambisaun promove rekursu umanus iha seitór importante sira hanesan infrastrutura, industria, edukasaun no seguransa. Iha parte seluk, PR foun tenke promove dialogu ativu ho instituisaun seguransa no defeza hodi asegura estabilidade no seguransa rai-laran liu hosi hasae kualidade PNTL no F-FDTL. Nune’e mós PR tenke buka mekanismu hodi rezolve kestaun Grupu Arte Marsias. Ikus liu, ejerse papel nu’udar xefe estadu hodi “lori Timor ba mundu no lori mundu mai Timor”, liuhosi dalan lidera atividade diplomasia iha seitór hanesan, dezenvolvimentu ekonomia, kooperasaun seguransa, no relasaun esterna, inklui politika adezaun ba ASEAN no relasaun ho nasaun vizinhu ho Ázia-Pasífiku sira.
