Fontes Foto: Tatoli
Fundasaun Mahein (FM) nu’udar organizasaun naun-governmental nasionál halo observasaun durante eleisaun prezidensiál 2022. Iha dia 19 Abril 2022, povu Timor-Leste partisipa iha eleisaun prezidensial ba segunda ronde, no rezultadu hatudu Dr José Ramos Horta maka manan votus barak liu (62%), kompara ho Prezidente atuál Francisco Guterres ”Lú-Olo” ne’ebé simu besik 38%. FM hala’o duni observasaun sira iha sentru votasaun oi-oin, inklui sentru votasaun sira iha kapital Dili no mos iha area rural. Husi observasaun ne’ebé ami hala’o durante loron votasaun, laiha konflitu vertikal entre lideransa sira no sira simu rezultadu ho haksolok no dignu. Orgaun eleitoral estadu sira mos servisu diak tebes iha sistema administrasaun eleisaun nian. Maibé, FM observa problema balun ne’ebé akontese liga ho prosesu eleitoral iha faze kampaña, preparasaun no votasaun ninian. Artigu ida ne’e sumariza FM nia observasaun durante periodu eleisaun prezidensial ba segunda ronde, no diskute implikasaun balun ba seguransa no demokrasia iha Timor-Leste.
Durante prosesu kampaña ba segunda ronde nian, FM observa katak iha duni irregularidade oi-oin. Pur ezemplu iha dia 8 Abril 2022 wainhira Dr. José Ramos Horta halo kampaña iha Postu Administrativu Atsabe, Munisípiu Ermera, Comição Nacional das Elições (CNE) hare’e katak kanditatu Horta viola Lei Eleitoral tanba halo kampaña liu oras ofisiál kampaña nian. Tuir Lei Eleitoral kampaña hahu tuku 08:00 dader to’o tuku 18:30, maibe momentu ne’ebá iha Atsabe Dr. Horta halo “mini kampaña” até tuku 20:00 kalan. Iha parte seluk maka militante balun hatudu hahalok aat ba ekipa eleitoral nian, hanesan akontese iha RAEOA-ZEEMS (Oecusse), iha ne’ebá loron 7 Abril ekipa susesu partidu FRETILIN duni ekipa CNE. No mós iha kampaña eleitoral iha Munisipiu Covalima kontinua labarik kiik oan sira partisipa iha kampaña entre kandidatu PR Dr. Jose Ramos Horta no Dr. Francisco Guterres “Lú-Olo”, maske lei la autoriza atu labarik sira hola parte durante kampaña eleitorais.
Molok tama ba iha preparasaun ba vota nian maka, iha difikuldade seluk ne’eb’e FM anota maka staff servisu sistema administrasaun eleisaun nian hanesan Brigada, CNE, Sekretariado Tékniku Administrasaun Eleitoral (STAE), no observador nasional sira toba deit iha lona kemping nia laran iha loron 18 Abril iha Munisipiu Manufahi, Sentru Votasaun Lesuhati, Suco Holarua, Posto Administrativu Same. Sira dehan toba fatin diak laiha, tanba ne’e sira toba iha kemping laran deit ona. Aleinde problema toba fatin la iha, iha sentru votasaun refere membru PNTL ida deit maka hein halo vijilansia.
Iha prosesu votasaun nian FM observa iha duni indikasaun ba krime nian hanesan grupu balun tenta kria instabilidade, hanesan akontense iha sentru votasaun Esokla Primaria No. 2 iha Suku Bidau Santana, Dili, iha tuku 9 kalan loron 19 Abril. Bainhira staf husi STAE sura hela boletin votu sira, iha grupu joven balu hemu tua lanu hodi tebe odamatan Eskola Primaria No. 2 nian. Maibé iha kalan ne’e membru PNTL nain rua husi eskuadra Kristu Rei kaer no lori joven balun ba sela durante 72 oras, no PNTL kontinua halo investigasaun. Informasaun seluk maka FM rekolla husi staff CNE iha Gleno maka sira hetan tuda husi movimentu individu ou grupu balun iha parte Humboe tuku 11:45 kalan, loron 19 Abril, no mos grupu deskoñesidu balun halo ataka ba staff CNE ida iha Sentru Votasaun Hera. Kazu seluk iha RAEOA-ZEEMS parte Nitibe sei iha hela prosesu investigasaun tanba membru komunidade ida ninia uma maka ahi han hafoin rona rezultadu eleisaun final.
Seguransa iha eleisaun sai fatór determinante iha prosesu ba konstrusaun paz no demokrasia, liu-liu rezultadu prosesu eleitoral tenke válidu no ema hotu tenke simu. Maibé, FM observa militante balun la satisfas ho rezultadu eleisaun nian hanesan akontese iha munisipiu Viqueque, suku Makadiki. Iha ne’eba hafoin prosesu votasaun remata iha loron 19 Abril, iha grupu balun tenta halo perturbasaun, barullu no baralla iha prosesu kontagen nian iha sentru votasaun Munisipiu Viqueque, no PNTL detein kedas sidadaun nain rua ne’ebé tenta impede kontajen votus.
Aleinde problema seguransa durante prosesu eleitoral, FM mós preokupa tanba fator balun sai bareria ba ema atu partisipa ho másimu iha eleisaun. Ida mak fasilidade ba ema defisiente nafatin limitadu liu-liu ba ema ho defisénsia matan tanba fasilidade Braille iha kartaun votus seidauk iha, signifika ema ho defisénsia matan presiza ema seluk atu vota. Fundasaun Mahein hakarak dada atensaun ba Artigu 47 Konstituisaun RDTL: 1. Sidadaun ne’ebé iha tinan 17 iha direitu atu vota no hetan eleitu 2. Implementa direitu atu hili ne’e direitu privadu no ne’e obrigasaun ba sidadaun hotu-hotu.
Iha segunda ronde ba eleisaun prezidensial, votantes barak mak konsege halao ninian direitu siviku, maibe sidadaun barak mos la konsege vota tamba sira ne’ebé vota iha munisipiu liu-liu zona remotas labele ba vota ho razaun problema transporte, kondisaun ekonomia, no problema finanseiru. Maske Governu no partidu balun kria ona kondisaun no fasilidade hanesan transporte trek no bus, maibé to’o deit iha Munisipiu nia Kapital la to’o ba postu-administrativu, suku no aldeia sira. Prosesu rejistrasaun mos komplikadu demais ne’ebé desmotiva ema barak, no mós orgaun eleitorais la fo prioridade ba ema hamutuk nain 90 resin ne’ebé agora hela iha prizaun, ema balun ne’ebé moras todan hela iha hospital, no ema balun ne’ebé konsidera “moras mental”, no mos estudantes sira ne’ebé hela iha Dili labele ba vota tanba distansia no tempu. Kestaun ne’e mos implika ba seguransa no demokrasia iha Timor-Leste tanba hafraku povu nia respeitu ba instituisaun estadu no estadu direitu demokratiku.
Iha aspeitu seguransa nian FM observa PNTL mós hasoru dezafiu oi-oin hanesan rekursus ne’ebé menus, laiha liña komunikasaun, difikuldade ba asesu iha transporte, no ekipamentus, ne’ebé sai esensial ba PNTL durante iha komisiu politiku to’o votasaun nian. FM hare’e katak maske deslokasaun PNTL preparadu ba iha sentru votasaun 1,191 no estasaun votu, lao ho kalma no hakmatek to’o ohin loron, maibé iha lakunas ne’ebé fó implikasaun ba seguransa eleisaun nian. Pur ezemplu seguransa iha sentru votasaun balun hanesan iha kosta sul nian (Munisipiu Manufahi) destaka membru OPS ida deit ba iha kada sentru votasaun sira. Irregularidade ne’ebé parte seguransa hala’o maka PNTL balun la mantein distansia 25 metrus husi sentru votasaun hanesan iha sentru Votasaun Fohorem, Tilomar no Wetaba Salele inklui mós iha fatin sira seluk.
Bazeia ba observasaun hirak ne’e, FM fó rekomendasaun tuir mai ba Timor-Leste nia autoridade eleitoral no desizaun na’in sira hodi prevene problema sira ne’e akontese tan iha futuru:
- Autoridade eleitoral sira tenke kria kondisaun ida ne’ebé diak liu no realistiku hodi hasa’e taxa partisipasaun iha teritoriu laran tomak hodi nune’e haforsa sistema demokrasia iha Timor-Leste. Infelizmente, husi total votante nain 859,692, so ema nain 664,106 mak vota iha primeira ronde, no taxa partisipasaun tuun iha segunda ronde to’o iha ema nain 649,389. Kauza sira ne’e FM haree maka problema transporte, problema finanseiru no ekonomia, distansia ne’ebé dook, tempu la iha, no prosesu rejistu komplikadu demais. Tanba ne’e, presiza simplifika no fasilita prosesu rejistrasaun, hanesan uza kira sistema online (internet) ne’ebé simples no ema bele uza hodi muda sira nia sentru votasaun ba fatin ne’ebé besik. Ida ne’e bele evita problema transporte, tempu, distansia no finanseiru, no garante taxa partisipasaun másimu.
- Fundasaun Mahein mós rekomenda atu instituisaun seguransa estadu halo kontrolu másimu hodi evita konflitu ne’ebé akontese hanesan durante kampaña, hanesan asaltu balun ne’ebé komete husi militante sira inklui gravasaun ameasa ne’ebé viral iha públiku nia le’et. Ema ne’ebé mak komete ameasa ne’e tenke submete ba sansaun tuir Kódigu Penál Timor-Leste nian, nune’e FM husu PNTL atu halo investigasaun másimu ba kazu refere.
- Governu tenke hakbiit fasilidade ba PNTL sira hanesan transporte, rede komunikasaun, no atrebutu esensiál sira seluk. Nunee bainhira iha indikasaun krime ou movimentu individu ou grupu balun ne’ebe mak tenta kria instabilidade iha periodu Eleisaun Presidensial tuir mai, PTNL bele response lalais ho efetivu. Nune’e PNTL nia atuasaun bele promove paz, unidade, amizade, haburas demokrasia, hodi asegura estabilidade, seguransa no dezenvolvimentu nasional.
- Fundasaun Mahein mós rekomenda atu kria kondisaun ida ne’ebé viabel no realistiku ba prizioneiru sira, ema ho difisiente matan, ema ho moras mental, no mós ema sira ne’ebé moras todan iha Ospitál Nasionál to’o sentru saude iha munisipiu to’o area remotas.
- FM husu atu instituisaun seguransa tenke aplika lei ho igual ba sidadaun hotu iha tempu kampaña eleitoral, no asegura katak PNTL investiga violasaun hotu-hotu ne’ebé akontese.
