Foto: AP
Tinan 20 dezde restorasaun independénsia, ita konsege atinje buat barak, hanesan haforsa paz no dame, no mantein neutralidade no soberania no hadiak infraestrutura bázika. Maske nune’e, violénsia estrutural, liu-liu pobreza, korupsaun no impunidade, kontinua amesa ita nia povu nia moris no ben-estar, no limita Timor-Leste nia transformasaun ba iha nasaun ida ne’ebé prósperu no seguru. Impase polítiku no krize internasionál hafraku liu tan ita nia situasaun internal. Povu barak sei moris iha uma ho kualidade menus, falta saneamentu, rendimentu no asesu ba edukasaun no saúde ne’ebé adekuadu. Tanba ne’e, Timor oan barak enfrenta obstaklu barak hodi atinje moris ne’ebé komfortável no seguru.
Atu bele rezolve problema kompleksu hirak ne’e, ita presiza kria planu ne’ebé kompreensivu no integradu ba transformasaun estrutural ekonomia, inklui planu atu dezenvolve setór agrikultura no setór indústria no servisus sira seluk. Planu ne’e tenke envolve diskusaun klean ho reprezentativa traballadór no indústria, no mos peritu tékniku sira no asesór internasionál. Planu ne’e tenke sukat Timor-Leste nia rekursu naturál sira, limitasaun fíziku e naun-fíziku, no kontektsu sósio-kulturál. Nunee, planu ne’e bele moderniza ita nia sosiedade no ekonomia maibé prezerva nafatin tradisaun kultural no proteje direitu laboral no meiu ambiente. Planu ne’e presiza mos haree ba reforma sistema edukasaun, liu-liu hadiak nutrisaun ba inan ho labarik, fasilidade eskolár, kualidade mestre no kurikulum ba ensino superior.
Planu hanesan ne’e sei haforsa Timor-Leste nia auto-sufisiénsia, prosperiedade no soberania. Maibé, kooperasaun nafatin esensiál atu asegura objetivu dezenvolvimentu no prosperiedade no seguransa nasionál. Dezenvolvimentu indústrial iha nasaun ida sempre depende ba teknolojia no peritus husi li’ur, la iha nasaun ida la’o mesak. Kooperasaun seguransa ho defeza mos esensiál atu kontinua haforsa kapasidade forsa seguransa sira nian, no mos mantein relasaun diak ho parseiru internasionál sira. Timor-Leste bele kontinua mantein nafatin parseria ne’ebé forte ho grupu internasionál oi-oin, atu nunee hetan benefísiu husi parseria maibe evita hili entre parseiru ida ne’e ka ida ne’ebá. Karik ita tuir matadalan ida ne’e, lidér istóriku sira bele asegura prosperiedade ba povu tomak, no hametin sira nia legadu ba futuru.
Atu aprende liu tan kona-ba asuntu ne’e, favor klik ba link iha kraik:
(MNL157-Tinan20-Independensia-Tetun.pdf)
