Foto husi Fundasaun Mahein
Ohin loron, dia 29 Junhu, 2022, Fundasaun Mahein selebra tinan ba dala 13. Ami nia staff sira hasoru malu hodi selebra no han hamutuk.
Fundasaun Mahein estabelese iha tinan 2009. Momentu ne’ebá, Timor-Leste foin sai husi krize 2006-2008 nian, no doadór barak interese atu apoia fundus ba NGO independente ne’ebé halo monitorizasaun, peskiza no advokasia ba setor seguransa.
Liu husi ami nia servisu durante tinan 13 nia laran promove polítika estadu ne’ebé proteje direitus umanus, demokrasia no Rule of Law, FM nia naran sai boot tanba sempre halo análiza ne’ebé kritiku no independente, no fó rekomendasaun polítika ne’ebé konstrutivu no konkretu. Ami mos konsege influensia direta no indireta ba polítika no programa estadu iha setor seguransa, no kontribui ba debate públiku no polítika kona-bá asuntu oi-oin. Aleinde ne’e, eis-staff FM balun foti pozisaun iha estrutura Governu Timor-Leste, atu nune’e sira bele kontinua kontribui sira nia hanoin no matenek hodi apoia Timor-Leste nia dezenvolvimentu institusional no interese seguransa nasionál.
Foin lalais, Fundasaun Mahein hasoru dezafiu atu hetan fundus ne’ebé sustentável, hanesan mos ho NGO lokál barak iha Timor-Leste. Maske nune’e, ami kontinua nafatin buka parseria no mos mantein nafatin ho ami nia publikasaun no atividade sira seluk, hanesan relatóriu peskiza, artigu blog, programa radio no atividade diskusaun komunitária. Ami mos haluan tan ami nia asuntu peskiza sira hodi fokus ba tópiku foun hanesan polítika esterna, jeopolítiku, dezenvolvimentu sustentável no edukasaun.
Timor-Leste husik hela krize Covid-19 no eleisaun Prezidensiál iha kotuk, no la’o ba oin atu prepara ba eleisaun Parlamentar 2023. Iha tempu hanesan, Fundasaun Mahein promete atu kontinua hala’o ami nia misaun prinsipál – monitorizasaun, peskiza no advokasia kona-ba asuntu seguransa oi-oin. Ami espera katak ami bele kontinua partisipa iha diskusaun, diálogu no asaun hamutuk ho parseiru iha Governu, sosiedade sivíl no ajénsia doadór sira. Nune’e, ita hotu bele servisu hamutuk ba futuru ida ne’ebé prosperu, seguru no justu ba ita nia povu Timor tomak.
