Foto : Fundasaun Mahein
Enkontru Diálogu Komunitáriu ne’ebé Fundasaun Mahein organiza iha munisípiu sira hanesan mekanizmu importante atu rekolla informasaun kona-bá dezafiu sira ne’ebé komunidade marjinalizadu sira enfrenta dadaun. FM uza informasaun ne’e hodi informa analiza no rekomendasaun sira kona-bá polítika seguransa no dezenvolvimentu sira. Formatu diálogu komunitáriu ne’e mos fó espasu ida ba komunidade marjinalizadu atu espresa sira nia hanoin kona-bá asuntu xave ne’ebé afeita sira nia moris, no mos atu koalia diretamente ho ofisiál seguransa no membru governu sira. Ikus liu, FM mos uza eventu sira ne’e atu fahe informasaun ho komunidade kona-bá polítika no asuntu relevante sira.
Iha Outubru-Novembru 2022, FM organiza diálogu komunitáriu iha Cova Lima no Viqueque. Objetivu eventu rua ne’e maka atu provoka diskusaun kona-bá asuntu importante hanesan promove paz, atividade arte marsial, Lei Organizasaun Investigasaun Kriminal, no haforsa feto nia lian hodi partisipa iha dezenvolvimentu munisípiu.
Iha Suai, FM organiza diskusaun iha Fokupers nia kantor, organizasaun ne’ebé luta ba feto nia direitu durante tempu naruk. Partisipante iha eventu maka Fokupers nia Diretora, Xefe Unidade Protesaun Vítima (VPU) PNTL, no reprezentante organizasaun feto lokal nain 12. Tópiku diskusaun maka “Feto nia Partisipasaun iha Foti Desizaun iha Nível Suku, Munisípiu no Nasionál.”
Iha eventu sira ne’e, FM uza métodu kolaborativu atu estimula diálogu entre partisipante sira. Ne’e signifika FM la koalia barak liu, no enkoraja partisipante sira atu espresa sira nia hanoin. Feto Suai sira nia partisipasaun ativu no kreativu tebes, no sira diskute nakloke. Maioria partisipante sira la satisfas ho feto nia partisipasaun iha prosesu foti desizaun. Sira mensiona katak lider komunidade no autoridade lokál sira ladun konsidera ka prioritiza sira nia preokupasaun. Maske nune’e, sira dehan katak sira sei kontinua koalia sai atu fo presaun ba autoridade rona sira nia lian no responde ba sira nia nesesidade.
FM halo intervista ho partisipante nain tolu, no sira esplika katak maske sira partisipa beibeik iha formasaun empoderamentu feto, sira nafatin seidauk bele asesu ba pozisaun foti desizaun. Sira haktuir katak maske feto partisipa iha enkontru ho autoridade lokál, autoridade la tau importánsia ba feto nia preokupasaun. Interese pesoal ka “kor” (partidu) mos influénsia desizaun, no mane mak hetan benefísiu barak liu husi projetu estadu hanesan konstrusaun. Ikus liu, sira hatoo esperansa katak komunidade nia mentalidade bele muda atu komunidade bele simu feto hanesan lider.
Iha Viqueque, FM konvida autoridade lokál, Prezidente sub-KRAM (Konsellu Regulador Arte Marsiais), Xefe PNTL, reprezentante joven no membru grupu arte marsiais no rituais. FM koko atu envolve feto iha diskusaun, maibé mane barak liu (nain 20) mak partisipa kompara ho feto (nain 5 deit). Tanba ne’e, partisipasaun feto iha diskusaun menus, tanba mane domina. Maske nune’e, feto joven balun hamriik no koalia sai sira nia hanoin.
Tópiku diskusaun maka envolvimentu grupu arte marsiais no rituais iha violénsia no konflitu. Partisipante sira rekonese katak membru balun envolve iha violénsia, grupu sira lamenta katak sosiedade jeneraliza katak grupu arte mariais no rituais aat hotu. Sira esplika katak laos grupu ne’ebé haruka membru halo violénsia, maibé problema pesoal entre membru individu. Reprezentante joven hato’o katak sira envolve iha atividade harii paz no rezolve konflitu iha komunidade, atividade sira ne’ebé fasilita diálogu no hametin seguransa no paz. Sira mos koko atu rezolve problema entre grupu arte marsiais sira. Autoridade lokál no PNTL mensiona katak la iha konflitu boot liga ho grupu arte marsiais entre 2018-2022.
Partisipante sira sublinha katak dezafiu boot liu ne’ebé joven no feto enfrenta maka marjinalizasaun sósio-ekonómiku no falta fasilidade no servisus bázikus, tanba dook husi sidade no programa governu iha area menus. Partisipante feto sira mos hato’o hanesan feto iha Suai – autoridade lokál sira ladun responde ka prioritiza sira nia problema. Tanba ne’e, feto barak lakon konfiansa ba governu, no sente eskluidu husi foti desizaun no dezenvolvimentu munisípiu. Sira mos la iha esperansa sira bele sai lider ka desizaun nain iha futuru tanba mane sempre domina pozisaun foti desizaun.
Iha eventu rua, FM aprezenta informasaun kona-bá Lei Organizasaun Investigasaun Kriminal (LOIK). FM konsidera LOIK kria implikasaun boot ba prosesu investigasaun kriminál tanba fó kompeténsia ba Polísia Sientífiku no Investigasaun Kriminál (PSIK) hodi investiga kazu kriminál, inklui violénsia bazeia ba jéneru (GBV). Maibé, LOIK kria konfuzaun kona-bá responsabilidade ba prosesu hatama keixa no invesitgasaun, liu-liu iha area rural ne’ebé PSIK menus prezensa.
Partisipante sira iha Suai no Viqueque barak seidauk rona buat ida kona-bá LOIK, signifika katak Governu falla atu komunika mudansa legál ne’e ba komunidade iha area rural sira. Iha Suai, Xefe VPU nota katak nia iha esperiénsia tinan 20 (rua-nulu) servisu no formasaun kona-bá kazu GBV. Tanba ne’e, nia kestiona tanba sá mak LOIK fo kompeténsia ba PSIK hodi investiga kazu GBV, tanba sira falta esperiénsia no formasaun iha area ne’e, no mos falta prezensa iha munisípiu sira.
Aleinde ne’e, partisipante barak – inklui feto ne’ebé esperiénsia direta GBV – ladun fiar PSIK bele responde ba kazu GBV lalais no efetivu. Kazu GBV ne’e sensitivu tebes, tanba ne’e polisia tenke iha formasaun espesífiku, no mos presiza membru polisia feto atu ajuda vítima sira. Maibé, PSIK falta formasaun no mos membru feto, entaun ida ne’e hamosu duvida kona-bá kapasidade PSIK atu responde lolos ba kazu sensitivu sira ne’e.
Bazeia ba FM nia esperiénsia no resposta husi komunidade durante eventu sira ne’e, FM fiar katak formatu diálogu komunitáriu ne’e hanesan modelu diak ida atu ajuda komunidade marjinalizadu espresa sira nia hanoin, aprende kona-bá asuntu importante no halo diálogu ho ofisál estadu no desizaun nain sira. Eventu rua iha Suai no Viqueque ne’e hetan rezultadu importante balun, hanesan feto nia preokupasaun tanba eskluidu husi prosesu foti desizaun, falta konesimentu kona-bá LOIK, no joven nia preokupasaun kona-bá problema sósio-ekonómiku no falta programa governu iha area remota sira. Partisipante sira agradese ba FM tanba fasilita fahe informasaun no preokupasaun, no sira espera FM bele organiza tan eventu iha futuru. FM sei kontinua organiza diskusaun sira ne’e, tanba ami fiar katak eventu sira hanesan ne’e bele fasilita diálogu, aprendizajen no kompreensaun mutual entre governu no komunidade marjinalizadu sira.
