Foto: Fundasun Mahein, Abril 2024
Foin dadauk media barak iha Timor-Leste fo sai kona-ba akuzasaun ligadu ho kazu extorsão ka korrupsaun envolve pesoal husi PCIC. Fundasaun Mahein (FM) haree kazu ne’e importante tebes no presiza asaun konkretu hodi garante rezolusaun tuir lei no regra ne’ebe iha. Aleinde ida ne’e, FM hakarak fahe kona-ba polemika ka insidente seluk ligadu ho PCIC ninia lala’ok durante ne’e. Kazu ne’ebe hamosu pergunta bo’ot kona-ba lideransa PCIC no mos futuru instituisaun PCIC ne’ebe sei inserteza hela mak tuir mai ne’e:
- Komete krime ne’ebé registo iha Ministério Público no Comissão Anti-Corrupção ne’ebé parte sira constitui ona hanesan arguido ba crime burla agravado tamba desconfia simu vítima sira-nia osan (montante hale’u $700.00) inclui abuso poder tamba utiliza edifício PCIC hodi resolve problema particular balun. Procesu kiriminal la’o hela hasoru pesoal refere maibe prosesu disciplinar deskonfia superior PCIC nian arquiva tiha ona tambá ninia ema confiansa.
- Envolve mos kazu utiliza armas hodi ameaça ema seluk iha PCIC, tamba problema feto no vítima hato’o queixa bá PCIC nian, maibé la hola medida tamba individo refere pertence superior PCIC nia ema konfiansa;
- Uza poder hodi facilita fó treinu ba superior PCIC nia oan-mane utiliza armas PCIC nian no pratika tiru iha carrega de tiro PCIC nian iha área Kaitehu, Município Liquiçá. Kazu ne’e konsege sai polêmika iha tinan 2023 nia rohan maibe to’o agora iha nonok nia laran;
- Pesoal PCIC iha fulan Março 2024 sai mos hanesan testemunha ba caso corrupção ne’ebe envolve membro PCIC iha prosesu concurso limpesa iha PCIC ne’ebe acontece iha tinan 2021;
Ho akontesimentu sira ne’e FM konklui katak:
- Polêmika sira ne’ebe akontese iha tinan 2023 nia rohan no to’o ohin loron envolve pesoal balun kontinua hakiak kultura impunidade iha PCIC nia laran. Tambá pesoal PCIC sira ne’ebe envolve iha kazu disciplinar no kriminal la iha prosesu no arkiva husi superior PCIC nian;
- Tamba kultura impunidade no membru PCIC sira sente hetan protesaun husi superior sira, aktu disiplinar no kriminal kontinua komete husi pesoal PCIC;
- Nune’e mos Programa IX Governu Konstitusional nian kona-ba Reforma PCIC, troka deit membru sira ne’ebe superior sira la gosta no la afavor ba sira nia interese partikular sira. Ida ne’e haburas no hametin liu-tan impunidade no hafraku lei no regulamentu sira.
- Instituisaun ida presiza lideransa ne’ebe di’ak atu funsiona lolos; wainhira lideransa lakohi ka la bele implementa regras no falla atu kontrola nia membru sira, ida ne’e hafraku instituisaun no mos hafoer imajen estadu nian.
- PCIC agora iha inserteza nia laran tanba IX Governu hasai ona lei hodi halo reformasaun ba PCIC, maibé seidauk implementa to’o agora. Inserteza ne’e sai kestaun bo’ot tanba estadu investe rekursu barak ba iha PCIC hodi dezenvolve PCIC nia kapasidade nu’udar instituisaun ne’ebe responsável ba investigasaun krime kompleksu no organizadu sira.
Tambá ne’e FM rekomenda ba:
- Parlamentu Nasional Komisaun A no B halo fiskalizasaun urjente ba PCIC no kria Komisaun Eventual ida hodi halo investigasaun ba responsável sira superior PCIC nian;
- Husu IX Governu atu halo audit ba atividades PCIC;
- Procurador-Geral da República nu’udar fiscalizador ba lalaok órgão sira polícia criminal nian, halo fiscalização, inspeção, inquérito e sindicância ba pesoal PCIC ne’ebé desconfia envolve iha caso abuso de poder, extorsão no corrupção passiva;
- Procurador-Geral da República aselera prosesu investigasaun ligadu ho akuzasaun estorsaun ne’ebe envolve pesoal PCIC hodi hetan rezultadu lalais tuir lei no regra ne’ebe iha.
- Governu liu hosi Ministériu Justisa aselera prosesu reforma ne’ebe IX Governu Konstitsional programadu ona iha Programa Governu nian;
Atu hetan informasaun kle’an, halo favor kontaktu:
Fundasaun Mahein (FM
E-mail: direktor.mahein@gmail.com
Telemóvel: (+670) 7831 6075
Website: www.fundasaunmahein.org
