Durante tinan balun nia laran, Timor-Leste tama iha negosiasaun ho Governu Estadu Unidus Amérika (EUA) kona-bá rehabilitasaun aeroportu Baucau, aeroportu ida ne’ebé ladun uza dezde misaun ONU para iha tinan 2012. Iha loron 29 Juñu, Timor-Leste asina MoU rua ho EUA kona-bá rehabilitasaun aeroportu no apoiu potensiál ba dezenvolvimentu setór aviasaun sivíl iha Timor-Leste. Iha loron 13 Jullu, Governu hala’o lansamentu ba primeira pedra ida iha Baucau hamutuk ho Primeiru-Ministru, CEMGFA, Embaixadór EUA ho Ministru balun.
Reprezentativa husi Governu Timor-Leste ho EUA promove benefísiu potensiál husi akordu ne’e ba kooperasaun bilateral iha area defeza ho seguransa, Timor-Leste nia kapasidade aviasaun militár ho sivíl, no dezenvolvimentu rejionál iha Baucau. Maibe, grupu sosiedade sivíl balun hato’o preokupasaun katak Timor-Leste ‘entrega’ aeroportu Baucau ba EUA tanba presaun, no nia benefísiu ba Timor-Leste la klaru. Sira mos preokupa kona-bá risku ba Timor-Leste bainhira tama iha kompetisaun jeopolítiku rejionál entre nasaun bo’ot sira.
Fundasaun Mahein haree katak asuntu ne’e provoka pergunta kona-bá Timor-Leste nia polítika esterna ne’ebé difisil no komplexu tebes. Timor-Leste nu’udar nasaun ki’ik no foun, no ita nia vizinhu sira iha rekursu ho esperiénsia ne’ebé bo’ot liu. Nune’e, ami konkorda katak Timor-Leste tenke kuidadu tebes bainhira halo kooperasaun seguransa ho nasaun bo’ot sira. Ita tenke aprende husi istória nasaun ki’ik monu ba interese nasaun bo’ot sira, ne’ebé lori dezastre ba ita nia povu no povu iha nasaun seluk iha pasadu. Maibe, ami mos haree katak Timor-Leste tenke kontinua ho programa kooperasaun bilateral sira ne’ebé haforsa tiha ona kapasidade setór seguransa. Ita tenke mos adopta polítika esterna ne’ebé pragmatiku no evita “hili” nasaun ka ekipa ida, no kontinua ho relasaun amigável ho nasaun hotu-hotu ne’ebé interese atu sai nu’udar ita nia parseiru. Ho prinsípiu sira ne’e, Fundasaun Mahein oferese análiza ida tuir mai, ne’ebé ami espera bele hasa’e komprensaun públiku kona-bá akordu aeroportu Baucau nia implikasaun seguransa, estratéjika ho sosio-ekonómiku.
Hanesan ita hotu hatene, ONU ho forsa militár internasionál asiste Timor-Leste nia tranzisaun ba independénsia. Tanba ne’e, ita iha esperiénsia barak halo kooperasaun ho forsa seguransa husi nasaun seluk. Maske maioria kooperasaun operasional barak liu ho nasaun “bloku osidental”, hanesan Austrália, Japaun, Nova Zelándia, Portugal ho EUA. Maibe, F-FDTL mos halo treinamentu konjuntu hamutuk ho Marina Xineza. Governu Xína mos ajuda Timor-Leste halo konstrusaun ba edífisiu balun liga ho defeza, seguransa ho negósiu estranjeiru, hanesan Ministériu Defeza, Ministériu Negósiu Estranjeiru ho Kooperasaun ho Palásiu Prezidente. Seabees husi Marina Estadus Unidus mos hala’o tiha ona projetu konstrusaun sivíl lubuk ida iha rai laran. Aleinde programa kooperasaun defeza bo’ot sira ne’e, Timor-Leste partisipa iha programa hamutuk ho membru ASEAN ho CPLP sira, no mos kooperasaun multilateral hanesan projetu UNDP Dezenvolvimentu Setór Seguransa.
Timor-Leste nia pozisaun úniku tebes, tanba ita nia kooperasaun seguransa internasionál la domina husi bloku ka nasaun ida, maibé fahe entre parseiru bilateral ho multilateral oi-oin. Nune’e mos, ita nia setór seguransa hetan benefísiu barak husi asisténsia ne’e iha area operasionál, administrasaun ho infraestrutura. Karik programa sira ne’e la iha, dezenvolvimentu forsa seguransa sei la atinji to’o iha nível ohin loron nian. Timor-Leste mos mantein nafatin relasaun amigável ho parseiru defeza ho seguransa sira hotu, no ida ne’e hatudu katak ita nia polítika “kolega ho ema hotu” benefísia duni ita.
Pista aeroportu Baucau maka naruk liu iha Timor-Leste, no aeroportu Baucau sai nu’udar aeroportu prinsipál iha tempu Portugés. Aeroportu ne’e mos uza ba operasaun militár durante okupasaun Indonézia no tempu ONU nian. Pista ne’e mos bele simu aviaun pasajeiru longu-alkansa, no ema barak haree katak Baucau iha potensiál bo’ot ba dezenvolvimentu iha area agrikultura, turizmu ho indústria. Tanba ne’e, ema barak konsidera aeroportu Baucau estratéjiku tebes ba funsaun sivíl ho militár, no mos ba dezenvolvimentu sósio-ekonómiku rejiaun Baucau.
Kleur ona, Governu Timor-Leste planeia atu rehabilita no dezenvolve aeroportu Baucau, no diskusaun ho EUA mos la’o dezde tinan balun. Hanesan embaixadór EUA mensiona iha nia aprezentasaun iha seremónia primeira pedra, akordu foun ne’e bazeia iha akordu SOFA ne’ebé asína entre Timor-Leste ho EUA iha 2002. Akordu SOFA ne’e estabelese kondisaun báziku ba kooperasaun seguransa entre Timor-Leste-EUA. Tuir akordu foun, EUA sei fornese fundus $10.6 milloens ba projetu aeroportu, inklui projetu infraestrutura balun hanesan hadi’ak serka perímetru, harii armajen ba veíkulu ho ekípamentu, no halo instalasaun lampu iha pista ne’ebé sei fasilita uza aeroportu 24 oras. EUA mos sei fornese aviaun ki’ik Cessna 206 ne’ebé F-FDTL bele uza ba vijilânsia aeronáutika.
Governu Timor-Leste ho EUA dehan katak akordu ne’e sei haforsa Timor-Leste nia dezenvolvimentu ho seguransa liu husi hasa’e kapasidade vijilánsia F-FDTL ho hadi’ak ligasaun transporte nasionál ho internasionál. Grupu sosiedade sivíl balun espekula dehan katak EUA hakarak kontrola aeroportu Baucau atu estabelese baze militár iha Timor-Leste, maibe membru Governu sira nega dala barak. Maske akordu Timor-Leste-EUA la públika, ita la bele hatene nia kondisaun loloos. Maibe, informasaun públiku lori tiha ona implikasaun oi-oin ba asuntu seguransa, estratéjika ho sósio-ekonómiku iha nível doméstiku ho internasionál.
En termus de asuntu doméstiku, Fundasaun Mahein haree katak akordu ne’e lori implikasaun balun. Primeiru, rehabilitasaun aerportu ho kooperasaun defeza sei haforsa duni kapasidade F-FDTL atu hala’o vijilânsia aeronáutika. Ida ne’e bele ajuda F-FDTL atu hala’o nia kna’ar prinsipál ida, atu proteje integridade territóriu nasionál liu husi asegura territóriu rai maran ho marítima. Polítika na’in sira balun mos nota katak kapasidade vijilânsia bele ajuda F-FDTL atu prevene esplorasaun ilegál rekursu natural, liu-liu ró husi rai liur halo peska sein autorizasaun.
Hasa’e kapasidade forsa defeza liu husi kooperasaun internasionál kontinua nu’udar prioridade xave Governu nian, no Fundasaun Mahein suporta programa sira ne’e. Maibe, importante katak Governu tuir prosesu legál relasiona ho fiskalizasaun Parlamentar ho Prezidensiál kona-bá akordu kooperasaun seguransa sira nian. Tuir Lei Nú. 3/2007 kona-bá Servisu Militár, akordu kooperasaun seguransa hotu-hotu tenke hetan fiskalizasaun husi Konsellu Superior ba Defeza ho Seguransa (CSDS), ne’ebé kompostu husi Prezidente Repúblika, Prezidente Parlamentu Nasioanal, Primeiru-Ministru, Ministru sira ne’ebé ka’er asuntu justisa, defeza, seguransa ho negósiu estranjeiru, reprezentativa na’in tolu husi Parlamentu Nasionál, CEMGFA, Komandante-Jerál PNTL, servisu intelijênsia ho sidadaun na’in rua nomeia husi Prezidente Repúblika.
Maibe, Fundasaun Mahein observa katak maioria akordu kooperasaun seguransa hetan aprovasaun unilateral husi ezekutivu de’it, falta partisipasaun másimu husi CSDS ka aprovasaun husi Parlamentu Nasional. Iha 2013, Fundasaun Mahein husu governu atu entrega MoU entre EUA ho Timor-Leste ba Parlamentu Nasionál atu hetan aprovasaun, maibe ida ne’e la akontese. Tuir ami nia observasaun, nein CSDS ka Parlamentu halo aprovasaun ba akordu foun aeroportu Baucau. Tanba ne’e ami preokupa kona-bá implikasaun husi falta fiskalizasaun ne’e ba Timor-Leste nia polítika seguransa. Ami fiar katak polítika ne’e tenke bazeia ba planu longu-prazu, ho partisipasaun demokrátiku no konsultasaun másimu entre orgaun Estadu nian.
En termus de asuntu sósio-ekonómiku, maske dezenvolvimentu aeroportu Baucau bele lori benefísiu ba area Baucau no ba nasaun tomak, iha mos risku ba komunidade lokál sira husi kooperasaun defeza ho projetu infraestrutura. Fundasaun Mahein hakerek iha pasadu kona-bá oinsá armas de fogu modernu traumatiza komunidade aldeia durante ezersísiu trenamentu militár. Projetu konstrusaun bo’ot no atividade militár mos lori risku kanek fíziku ka estragu ambientál, inklui poluisaun sonora (polusi suara/barullu demais) ne’ebé bele impaktu ba animál no kualidade moris. Tenke rekuiñese mos katak bainhira soldadu estranjeiru barak okupa fatin ida, ne’e lori risku ba esplorasaun no violênsia seksual, hanesan akontese ona iha Timor-Leste durante misaun ONU nian. Tanba ne’e ami espera akordu aeroportu Baucau inklui protesaun ne’ebé adekuadu hodi proteje komunidade lokál husi impaktu negatívu projetu ne’e no atividade kooperasaun iha futuru.
Aleinde kestaun doméstika sira ne’e, akordu Baucau loke pergunta balun liga ho polítika esterna Timor-Leste nian. Primeiru, tanba Timor-Leste prioritiza sai membru ASEAN, importante atu diskute implikasaun akordu ne’e ba adezaun ASEAN nian. Hodi komprende di’ak liután implikasaun sira ne’e, ita tenke mos haree kontextu istóriku ho jeopolítiku rejiaun ne’e.
Maske ASEAN nu’udar bloku anti-komunista ida ne’ebé aliadu ho EUA, hahalok grupu ne’e mos muda ho dinámiku jeopolítiku, no tanba ekonomia membru balun sai forte liu, ASEAN nia forsa polítiku independente mos aumenta. Tanba Xína komesa dezafia hegemónia EUA iha rejiaun Ázia-Pasífika, ASEAN mos komesa adapta nia kooperasaun ho Xína. Membru ASEAN balun ne’ebé ki’ik liu depende maka’as ba investimentu ho asisténsia husi Xína, no ASEAN tomak maintein relasaun dia’k ho Xína iha area oi-oin, inklui seguransa ho defeza. Au mezmu tempu, EUA ho nasaun aliadu koko atu kontra influénsia Xína ho dalan oi-oin, inklui kondena Xína nia hahalok iha Tasi Xína Sul, Hong Kong ho Xinjiang, no haforsa programa kooperasaun seguransa rejionál ho preparasaun militár.
Foin daudauk durante Enkontru Ministeriál Defeza ASEAN nian, Indonézia nia Ministru Defeza atuál no eis-Komandu Kopassus, General Prabowo Subianto, deklara katak membru ASEAN tenke “unidu” iha setor defeza, hodi prevene nasaun bo’ot fahe bloku ASEAN tanba sira nia kompetisaun iha rejiaun. Deklarasaun Prabowo ne’e hatudu preokupasaun iha ASEAN laran kona-bá esforsu Xína ho EUA – ho nasaun seluk – ne’ebé koko obriga nasaun ki’ik ASEAN sira atu adopta akordu kooperasaun defeza hodi atinje sira nia objetivu estratéjiku rasik. Grupu sosiedade sivíl Timor-oan mos hato’o preokupasaun ne’ebé atu hanesan – sira dehan katak akordu Baucau viola neutralidade Timor-Leste no envolve ita iha kompetisaun entre Xína ho EUA. Sira mos dehan katak interese EUA iha Baucau tanba Timor-Leste nia pozisaun estratéjiku nu’udar baze potensiál hodi monitoriza no kontra influênsia Xína iha Indo-Pasífika, no avizu Governu katak kompetisaun entre poder bo’ot sira fo risku bo’ot ba Timor-Leste nia soberania ho neutralidade.
Analizador barak nota katak Timor-Leste nia pozisaun jeografika estratéjiku tebes, liu-liu tanba tasi kle’an entre Díli ho Ataúro hanesan dalan importante ba submarinu no ró ne’ebé ba-mai entre Pasífika Sul ho Oseánu Indianu. EUA iha prezensa militár bo’ot iha Pasífika Sul ho Oseánu Indianu, no Ázia Sudeste mos sai nu’udar rejiaun xave ba komérsiu ho investimentu globál. Tanba ne’e, dalan tasi ne’e importante tebes ba interese estratéjiku EUA nian. Ita bele haree importánsia jeostratéjiku “sea lines of communication” (SLOC) iha tensaun polítiku ne’ebé akontese iha Tasi Xína Sul durante tinan balun nia laran, no ita sei haree importánsia ne’e sai klaru liután iha tinan balun oin mai.
Ita hotu mos hatene katak nasaun bo’ot sempre uza sira nia vantajen militár ho ekonómiku hodi tau presaun ba nasaun ki’ik atu asina akordu ne’ebé fó benefísiu ba nasaun bo’ot. Akordu sira ne’e baibain mos lori benefísiu balun ba elite sira iha nasaun ki’ik, pur ezemplu aumenta kapasidade militár ne’ebé ajuda elite atu kontrola populasaun, ka benefísiu ekonómiku ruma liu husi komérsiu, investimentu ka subornu. Akordu aeroportu Baucau la loke ba públiku, tanba ne’e maka ami la hatene nia kondisaun espesífiku. Maibe, ita bele asume katak EUA hetan benefísiu husi akordu ne’e, tanba se lae EUA sei la buka akordu ne’e durante tinan balun.
Atu konklui, Fundasaun Mahein konkorda katak akordu aeroportu Baucau bele lori benefísiu mai Timor-Leste. Maibe, ami espera katak desizaun na’in sira tetu didi’ak nia kustu, benefísiu ho risku. Kestaun xave maka oinsa lider Timor-Leste konsulta ho parseiru ASEAN sira antes halo desizaun ne’e. Ami mos la hatene se desizaun ne’e bazeia de’it ba Timor-Leste nia polítika atu sai hanesan “kolega ho ema hotu”. Nune’e mos, ami preokupa tebes kona-bá risku ba Timor-Leste se ita tama iha luta entre poder bo’ot sira, liu-liu tanba tensaun rejionál bele sa’e iha tinan oin mai. Au mezmu tempu, ita nia setór seguransa ladun preparadu ba adezaun ASEAN ka dezafiu seluk hanesan responde ba dezastre naturais. Tanba ne’e, kooperasaun internasionál importante tebes atu hasa’e ita nia kapasidade iha area hirak ne’e, nomos atu mantein nafatin ita nia relasaun di’ak ho ita nia parseiru bilateral ho multilateral. Ami mos la bele haluha katak ita nu’udar nasaun ki’ik, ho esperiénsia no rekursu ne’ebé limitadu, no viziñu bo’ot. Istória Timor-Leste mos nakonu ho kooperasaun internasionál ho movimentu solidaridade internasionál.
Ami oferese rekomendasaun tuir mai hodi ajuda públiku ho ukun na’in sira asegura katak aeroportu Baucau lori benefísiu mai Timor-Leste no minimíza impaktu negatívu ba komunidade lokál ho seguransa nasional.
- Maske ita nia polítika esterna “kolega ho ema hotu” benefísia ita to’o agora, no polítika ne’e realistiku bazeia ba rekursu no istória, tensaun rejional ho internasionál sa’e ba beibeik, no ida ne’e sei kria dezafiu ba polítika ida ne’e iha futuru. Atu asegura Timor-Leste nia soberania ho neutralidade, ita nia desizaun polítika esterna tenke bazeia ba análize dinámiku internasionál sira ne’e, no ita mos tenke aprende husi istória atu nune’e la bele sai vitíma iha kompetisaun entre nasaun bo’ot sira.
- Akordu aeroportu Baucau iha implikasaun jeopolítiku importante barak, maibe ita labele haluha komunidade lokál sira. Atividade kooperasaun defeza ho projetu infraestrutura tenke inklui meius ne’ebé adekuadu hodi proteje komunidade lokál husi impaktu negativu, nomos tenke envolve membru komunidade iha konstrusaun obras ho atividade ekonómiku, atu nune’e kria kampu traballu ho rendimentu.
- Sai membru ASEAN kontinua nu’udar prioridade bo’ot ba Timor-Leste, no lori dezafiu no benefísiu potensiál barak. Vantajen bo’ot maka ita bele partisipa iha kooperasaun seguransa rejionál hanesan ADMM-Plus, ne’ebé envolve membru ASEAN ho parseiru 8: Austrália, Xína, India, Japaun, Nova Zelándia, Rusia, Korea Súl ho EUA. Karik Governu seidauk halo aproximasaun hodi tama iha enkontru ne’e, di’ak liu halo atu bele asesu ba nia benefísiu.
