Iha dia 18 Junhu, Assembleia Jerál ONU halo votasaun ba rezolusaun ida kondena rejime militár Myanmar, no husu membru atu prevene armas tama iha Myanmar. Rezolusaun manan ho votu 119 pro, votu ida kontra, ho abstensaun 36, inklui Timor-Leste. Kontrovérsiu sa’e makaas iha fin de semana, inklui krítiku makaas husi eis-Prezidente Ramos-Horta, ne’ebé deklara katak Governu nia asaun halo nia “moe”.
Depois, Ministériu Negósiu Estranjeiru ho Koperasaun fo sai komunikadu imprensa iha Segunda dia 21 Junhu, no repete Governu nia apoiu ba direitus umanus ho tranzisaun demokrátiku iha Myanmar, no husu fila fali ba ASEAN rasik atu fasilita rezolusaun pasífiku iha konflítu ida ne’e. Nia hatutan esplika dehan katak Timor-Leste vota abstein tanba seidauk iha konsensus entre membru ASEAN sira, ne’ebé tuir doutrina “ASEAN Way” tenke asegura konsensus hodi rezolve krize ne’e. Falta konsensus ne’e iha duni, tanba membru ASEAN balun – Indonézia, Malázia, Filipina, Singapura ho Vietnam – vota pro, no Brunei, Kambódia, Laos ho Timor-Leste maka abstein. Myanmar mos vota pro, tanba reprezentativa Myanmar iha ONU nafatin membru Governu sivíl ne’ebé foin monu iha golpe Fevereiru nian.
Fundasaun Mahein kondena militár Myanmar oho no kaptura arbiru sidadaun no opozisaun dezde intervensaun iha Fevereiru 2021. Ami mos suporta koperasaun rejionál no internasionál atu restora fila fali governasaun sivíl, investiga violasaun direitus umanus ho asegura paz ne’ebé sustentável. Ami mos haree katak militár Myanmar – Tatmadaw – komete duni krime grave barak, no na’in ba krime sira ne’e tenke hasoru justisa, atu nune’e bele asegura paz ho demokrasia iha Myanmar.
Bazeia ba asaun aat sira ne’e, no Timor-Leste nia esperiénsia rasik ho krime kontra umanidade, ami komprende tanba saida maka ema barak iha Timor-Leste hakfodak no hirus Governu nia desizaun abstein ne’e. Sira haree desizaun ne’e sakrifíka fali prinsípiu direitus umanus, no ignora tiha sofrementu povu Myanmar, bazeia ba objetivu polítika estranjeira. Fundasaun Mahein haree ida ne’e interpretasaun ida ne’ebé validu. Au mezmu tempu ami hanoin atu haree didi’ak asuntu istóriku ho polítiku balun liga ho rezolusaun ONU ne’e, no mos papél ONU en jerál, atu nune’e bele kontribui ba debate iha públiku kona-bá implikasaun husi votu ne’e ba situasaun atuál iha Myanmar, jeopolítiku rejionál no internasionál, ho politíka estranjeira Timor-Leste nian.
Myanmar nia guerra sivíl ho krize polítiku permanente
Maske Tatmadaw sira maka responsável ba golpe, violénsia ho represaun, abut krize iha Myanmar mos naruk no kle’an tebes. Dezde nasaun harii in 1948, estadu la konsege kontrola totál territóriu nasionál, no rezultadu husi ida ne’e maka guerra sivíl, inseguransa ho izolasaun internasionál longu-prazu. Maibé krize atuál mos liga ho investimentu ne’ebé mai husi li’ur dezde Myanmar loke an iha 2010 ba oin – investimentu sira ne’e haforsa militár Myanmar nia podér ekonómiku, no ida ne’e difikulta prosesu demokratizasaun.
Konflítu ho krize polítiku la’os foun iha Myanmar – iha grupu guerrilla ho milísia barak ne’ebé opera iha area fronteira Myanmar nian. Grupu ida-rua luta dezde tinan 1948, ne’ebé ema barak bolu ne’e “guerra sivíl naruk liu iha mundu”. Tanba governu sivíl falha atu rezolve kestaun grupu komunista ka autonomia ba menoridade étnika sira, militár sira halo golpe iha 1962, ne’ebé komesa periodu ditadura militár ne’ebé dura to’o iha 2011. Tatmadaw rasik halo funu kontra-insurjénsia liu dekáda neen ona, funu ne’e sempre tun-sa’e tun-sa’e, no iha violasaun direitus umanus, dezlokasaun no inseguransa barak.
Komesa iha dekada 1950, area fronteira iha Myanmar mos sai nu’udar fatin ba luta jeopolítika entre nasaun boot sira, tanba forsa Xína Kuomintang (KMT) ne’ebé hetan apoiu husi nasaun osidentál sira tama iha area ne’e hodi ataka Repúblika Populár Xína. Xína rasik mos orsida apoia luta Partidu Komunista Birmania kontra Governu Myanmar. Intervensaun sira ne’e viola Myanmar nia soberania, no kria instabilidade liu husi haforsa grupu guerrilla iha area fronteira. Momentu ne’ebá area ne’e mos sai nu’udar area prinsipál iha mundu ba produsaun opium, ho naran famozu ‘Triángulu Osan Mean’ (Golden Triangle), ne’ebé atinje nia nível másimu durante funu sira iha Ázia Sudeste entre 1960s to’o iha 1975.
Kontinua iha dekáda 1970 ba oin, grupu armada oi-oin uza osan ne’ebé sira hetan husi produsaun droga hodi selu ba kilat no ema, ho rezultadu katak ‘warlords’ (Komandante funu/Panglima Perang) sa’e forte los, no hamosu rede movimentu armas ho droga ne’ebé kontinua to’o ohin loron. Tatmadaw rasik mos envolve iha droga, maibé sira komesa mais tarde bazeia ba estratéjia ida iha ne’ebé sira kria parseria ho grupu guerrilla iha atividade ekonómiku ilegál, atu nune’e fahe podér no para tiru malu. Iha mos evidénsia hatudu katak maioria produsaun droga agora daudaun iha area ne’ebé kontrola husi milísia pro-Tatmadaw sira.
Iha tinan 1988, ditadura Jenerál Ne Win monu depois de manifestaun boot, maibé depois de masakre barak junta militár foti podér, ignora tiha rezultadu eleisaun 1990 no kontinua kontrola estadu até eleisaun iha 2011. Liga Nasionál ba Demokrasia (NLD) maka manán eleisaun ne’e, no sira kria Myanmar nia governu sivíl primeiru dezde besik tinan lima-nulu liu ba. Maske nune’e, entre 2011 to’o golpe iha Fevereiru 2021 Governu NLD enfrenta problema barak, inklui krize Rohingya no konflitu étniku ne’ebé aumenta. Lidér NLD Aung San Suu Kyi, ne’ebé manán Premiu Nobel da Paz no simu admirasaun barak iha média international, hetan krítika makaas tanba nia falha atu responde ho adekuadu ba alegasaun jenosídiu kontra ema Rohingya sira, no nia mos rekuza atu kondena diretamente Tatmadaw liga ho sira nia partisipasaun iha krime ne’e.
Iha periodu antes eleisaun Novembru 2020, organizasaun internasionál balun nota problema balun, inklui governu limita membru opozisaun asesu ba media. Maibé observador internasionál sira deklara katak prosesu eleisaun rasik la’o di’ak. Maibé, Tatmadaw reklama dehan katak eleisaun iha fraude, no iha dia 1 Fevereiru, antes prosesu tomada posse Parlamentu foun, sira deklara estadu de emerjénsia, ka’er podér estadu no kaptura membru governu, inklui Aung San Suu Kyi ho Prezidente NLD Win Myint. Asaun ne’e hamsou manifestasaun iha rai laran tomak, no militár responde ho violénsia ho kapturasaun masál. Iha relatóriu dehan katak ema na’in atus resin mate ho rihun resin hetan kapturasaun. Manifestasaun kontinua la’o to’o ohin loron, maske militár halo represaun makaas.
Iha momentu ne’ebá, governu barak – inklui Timor-Leste – ho organizasaun multilateral hato’o preokpusaun kona-bá golpe, no husu ba militár ho Governu NLD atu rezolve problema liu husi dialogu pasífiku. Grupu seluk – maioria estadu osidentál ho estadu aliadu – kondena asaun militár no ezije sira entrega fali podér ba governu sivíl, liberta prizoneiru no hapara violénsia kontra manifestante sira. Governu Estadus Unidus tau tiha ona sansaun ekonómiku ba ofisiál Tatmadaw balun, no Reinu Unidu hakerek rezolusaun ida ba Konselhu Seguransa ONU (UNSC) nian kondena golpe no ezije restorasaun demokrasia ho liberta prizoneiru sira. Maibé, membru UNSC balun la simu rezolusaun ne’e, no UNSC prepara “deklarasaun prezidensiál” ne’ebé kondena violénsia no husu libertasaun ofisiál governu no akordu negosiadu entre governu ho militár.
Polítika no kontradiksaun direitus umanus
Hanesan temi ona iha leten, Fundasaun Mahein preokupa tebes kona-bá impaktu umanitária ho implikasaun seguransa rezulta husi represaun no violénsia ne’ebé akontese hela iha Myanmar. Ami mos suporta totál inisiatíva kooperasaun rejionál atu restora governasaun sivíl, hapara violénsia no atinje paz ba tempu naruk. Tuir ami nia haree, diskusaun públiku iha Timor-Leste dala ruma simplifíka uituan situasaun ida ne’e, ne’ebé komplexu tebes, no mos ignora tiha kontradiksaun entre votu ne’e ho pozisaun ne’ebé estadu sira foti liga ho asuntu sira seluk.
Dahuluk, dezenvolvimentu prinsípiu direitus umanus ho lei internasionál la’os prosesu ne’ebé kaman, apolitíku ka neútru, maibé prosesu ne’e nakonu ho luta no polítiku. Hafoin Segunda Guerra Mundiál, devizaun boot mosu entre grupu nasaun sira kona-bá oinsá atu define direitus umanus fundamental: nasaun kapitalista boot fó prioridade ba direitu sivíl ho polítiku, no Uniaun Soviétika ho Terseiru Mundu afirma katak direitu sosiál ho ekonómiku iha ligasaun fundamental ho direitu sivíl ho polítiku. Sira mos akuza nasaun osidentál dehan katak sira promove konseitu direitus umanus ne’e atu lejitimíza sira nia sistema polítika rasik, no atu evita asuntu dezigualdade ka redistribuisaun rikeza nian.
Konseitu hirak ne’e iha natureza ne’ebé fundamentalmente polítiku. Ezemplu konkrétu ida maka bainhira estadu boot justifika sira nia intervensaun kontra nasaun seluk, dala barak sira uza linguajen direitus umanus, demokrasia ho liberdade, atu nune’e promove interese polítiku ka ekonómiku seluk. UNSC mos uza linguajen hanesan atu lejitimíza intervensaun militár boot hanesan invazaun Korea iha 1950, invazaun Afghanistan iha 2001, no intervensaun NATO iha Libya iha 2011, intervensaun sira ne’ebé falha atu lori rezolusaun pasífiku no kria destabilidade boot no mate barak.
Aleinde ne’e, nasaun barak ne’ebé vota pro iha rezolusaun Myanmar mos envolve ka suporta violénsia estadu, abuzu direitus umanus ka asaun kontra demokrasia. Pur ezemplu, nasaun barak fa’an kilat barak ba governu Colómbia, Maroko, Israel, Indonézia ho Saudi Arábia, nasaun hirak ne’ebé komete abuzu kontra direitus umanus ho eskala boot. Hanesan ema Timor bele lembra di’ak, membru ONU barak ne’ebé vota pro semana kotuk mos suporta Indonézia nia okupsaun iha Timor-Leste iha ONU rasik no mos ho materiál. NLD nia istória rasik liga ho rezolusaun ONU kona-bá abuzu direitus umanus iha Myanmar mos hatudu ipókrasia uituan. Tuir rezolusaun ida iha 2019 kona-bá krize Rohingya, embaixadór ba ONU husi Governu NLD kondena rezolusaun nu’udar “ezemplu ida tan padraun duplo (double-standard) no uza normas direitus umanus ho diskriminasaun hodi tau presaun polítiku ba iha Myanmar”.
Timor-Leste nia polítika estranjeira: presiza diskusaun públiku
Maske ema balun bele dehan ezemplu temi iha leten hatun valór konseitu direitus umanus ka demokrasia, ba ami Fundasaun Mahein ezemplu sira ne’e hatudu deit realidade dilemma polítika estranjeira ne’ebé nasaun kiik sira enfrenta beibeik, no mos hatudu oinsá nasaun barak uza prinsípiu sira ne’e atu promove interese politíku, no ignora bainhira la presiza. Tanba ne’e, maske idealmente desizaun polítika estranjeira tenke bazeia ba prinsípiu, ami haree katak ita la bele komprende importánsia Rezolusaun Assembleia Jerál ONU ne’e ho termu simplés “los ka la los”: nasaun sira hotu adopta pozisaun ne’ebé refleita sira nia interese polítiku, dinámiku jeopolítiku no mos prinsípiu.
Husi perspetiva ida, Governu Timor-Leste nia esplikasaun katak nia deside abstein tanba laiha konsensus entre membru ASEAN sira ne’e razaoável. Maibé ita bele mos asume katak iha fatór seluk ne’ebé influénsia desizaun ne’e, tanba desizaun polítika sempre influénsia husi fatór oi-oin. Ema balun interpreta vota ne’e hatudu Governu nia “tauk” atu vota kondena membru ASEAN ida, tanba membru ne’e bele prevene Timor-Leste tama iha ASEAN iha futuru. Ne’e bele los, no bainhira ita konsidera nune’e bele dehan Governu Timor-Leste hili duni pragmatizmu duke prinsípiu. Maibé, asuntu ne’e mos la foun ba Timor-Leste: pur ezemplu, maske ita nia lidér sira halo deklarasaun solidaridade beibeik ba Sahara Osidentál ho Palestína ne’ebé dook tebes, maioria sira nonook kona-bá situasaun iha Papua. Tanba mos razaun pragamtizmu, lidér sira mos promove rekonsiliasaun ho militár Indonézia duké buka justisa ba kazu ba krime kontra umanidade ne’ebé komete durante okupasaun. Husi perspetiva seluk fali, Timor-Leste nia votu foin lalais konsistente duni ho deklarasaun uluk no Governu nia komitmentu ba prinsípiu ASEAN hanesan soberania, naun-intervensaun ho konsensus. Aleinde ne’e, husi perspetiva diplomasia, iha posibilidade estadu ASEAN sira ne’ebé vota pro estraga relasaun iha ASEAN laran.
Fundasaun Mahein mensiona kontradiksaun sira ne’e la’os atu suporta ka kondena asaun ruma. Ami hakarak hatudu deit realidade katak polítika estranjeiru sempre tenke buka balánsu entre prinsípiu ho pragmatízmu. Liu-liu ba nasaun kiik ho vizinhu boot, hanesan relasaun entre Timor-Leste ho Indonézia hatudu ona. Ami mos kosidera asuntu ne’e importante tebes ba ita nia futuru, maibé até agora seidauk iha debate públiku ne’ebé naton kona-bá Timor-Leste nia polítika estranjeira ka pozisaun estratéjiku iha rejiaun ho mundu, maske iha diskusaun uituan kona-bá ASEAN no CPLP. Tanba ne’e, maioria diskusaun jeopolítika iha Timor-Leste la’o informálmente ho spekulatívu tebes, bazeia ba ita nia esperiénsia ho konflitu, organizasaun klandestina no identidade nu’udar nasaun kiik ne’ebé sempre envolve iha kompetisaun entre nasaun boot sira seluk.
Tanba ne’e, atu asegura Timor-Leste nia envolvimentu iha nível rejionál ho internasionál bele sai maduru no nakloke liu tan, Fundasaun Mahein fiar katak ita tenke dezenvolve polítika estranjeira ne’ebé klaru, koerente ho prinsípiu, liu husi debate públiku no konsultasaun entre governu, sosiedade sivíl, akadémista, setór privadu ho parte seluk. Maske bele krítika Timor-Leste nia votu kona-bá Myanmar, ami mos haree katak halo simplifikasaun la ajuda kompreensaun, no prefere atu analiza votu Timor-Leste ne’e iha kontextu polítika estranjeiru ne’ebé sei dezenvolve hela, no dilemma no kontradiksaun polítika internasionál ho diskursu direitus umanus.
