Foto : Fundasaun Mahein
Iha fulan Juñu 2023, antes Governu anterior atu remata nia mandatu, Komandu Jerál PNTL haruka membru PNTL na’in 158 atu reforma. Desizaun na’in bazeia ba Estatutu Pesoal PNTL, ne’ebé Prezidente Repúblika promulga iha tinan 2022. Tuir Artigu 128 Estatutu Pesoal, membru PNTL ne’ebé atinje ona idade tinan 60 tenke reforma. Tanba ne’e, desizaun ne’ebé Komandu Jerál PNTL foti tuir duni lei. Maibé, hafoin IX Governu tomada posse, Governu anúnsia desizaun atu reativa fila fali membru PNTL na’in 158 ne’ebé foin reforma. Komandante Segundu PNTL Pedro Belo responde dehan katak Governu tenke revee fila fali Estatutu Pesoal antes “reativa” membru reformadu sira, tanba desizaun ne’e la tuir lei.
Fundasaun Mahein (FM) mos preokupa tebes kona-ba desizaun ne’e, la’os de’it tanba desizaun viola lei, maibé most tanba ami deskonfia desizaun ne’e hanesan ezemplu intervensaun polítiku ba iha instituisaun seguransa estadu. FM hakerek beibeik ona katak intervensaun polítiku ne’e ameasa seguransa nasionál, tanba hafraku ierárkia no prosesu foti desizaun, no mos kontribui ba patrimonializmu no korrupasaun iha forsa seguransa sira. Artigu ne’e diskute kona-ba implikasaun balun husi Governu nia desizaun ne’e, no fó avizu kona-ba oinsá bele evita politizasaun setor seguransa.
Estatutu Pesoal PNTL ne’ebé promulga iha tinan 2022 obriga membru PNTL tenke reforma-an bainhira atinje ona idade tinan 60, hanesan mos instituisaun estadu sira seluk, inklui F-FDTL. FM suporta desizaun governu anterior nian atu haruka membru PNTL na’in 158 atu reforma-an, tanba razaun oi-oin. Primeiru, membru ho idade menus bele avanza iha instituisaun PNTL. Segundu, desizaun ne’e kria oportunidade empregu ba ema seluk. Ikus liu, PNTL nia desizaun ne’e hatudu katak prosesu empregu tuir duni regra ofisiál, no ida ne’e haforsa meritokrasia no hamenus influénsia polítika.
Sesaun dahuluk iha Programa IX Governu foka ba “Reafirmasaun ba Estadu Direitu Demokrátiku”. FM apoia maka’as kualker polítika governu ne’ebé tenta atu haforsa estadu direitu iha Timor-leste, no ami kontente tebes hare’e Governu foun tau prioridade ba kestaun ne’e. Maibé ami konfunde hare’e Governu nia desizaun atu reativa membru PNTL reformadu sira, tanba desizaun ne’e viola lei hanesan deskreve iha Estatutu Pesoal PNTL.
Programa IX Governu deklara katak Governu tenke halo “esforsu barak hodi hadi’a irregularidade ne’ebé komete ona” durante periodu 2017-2023. Tanba ne’e, FM deskonfia Governu foun deside atu reativa membru PNTL na’in 158 atu hatudu katak sira “kontra” polítika governu anterior. Au mezmu tempu, iha ona sinál katak Governu preokupa kona-ba kestaun lealidade polítiku iha PNTL, no ida ne’e bele influénsia ba desizaun atu reativa membru reformadu sira. FM preokupa katak intervensaun polítiku iha funsionamentu instituisaun estadu tanba interese partidu – no ego ema bo’ot nian – sei kontinua durante mandatu IX Governu.
FM hakerek beibeik ona kona-ba risku husi politizasaun setor seguransa no mos administrasaun públiku. FM fiar katak desizaun atu reativa membru na’in 158 ne’e hatudu politizasaun PNTL kontinua nafatin, signifika katak Governu foti desizaun arbitraiamente liga ho prosesu empregu iha PNTL. Bainhira Governu favorese ema ka grupu ruma no ignora lei, ida ne’e garante apoiu polítiku no patrosíniu (patronage). Patrosíniu ne’e hafraku demokrasia no estadu direitu.
Patrosíniu mos kria kondisaun ba korrupsaun atu mosu. Patrosíniu polítiku akontese bainhira lidér polítiku sira uza sira nia pozisaun atu fahe benefísiu ba ema ka grupu ruma, atu nune’e garante lealidade. Patrosíniu bele buras bainhira ema bo’ot “politiza” administrasaun públiku hodi fahe oportunidade servisu no kontratu. Patrosíniu haforsa korrupsaun tanba kria rede interese, lealidade no kultura polítiku ne’ebé tolera korrupsaun.
Aleinde ne’e, bainhira governu interven ba prosesu internal PNTL nian, ida ne’e bele ameasa integridade institusionál no mos afeita ba setor seguransa nia funsionamentu. Pur ezemplu, membru PNTL ho idade avansadu reforma fasilita membru sira seluk atu avansa iha insitiuisaun. Ida ne’e importante tebes ba dezenvolvimentu institusionál PNTL nian, tanba ne’e FM apoia maka’as desizaun hanesan ne’e. Maibé agora, membru sira ho idade menus okupa ona pozisaun ne’ebé membru reformadu uluk opkupa. Ida ne’e hamosu pergunta bo’ot kona-ba oinsá bele reintegra fila fali membru reformadu sira. Membru reformadu sira sei tama fali pozisaun hanesan uluk ka pozisaun ne’ebé ki’ik liu ka inferior? Karik pozisaun ki’ik, membru idozu sira sei tuir orden husi membru ne’ebé ho idade menus ka lae? Kestaun seluk maka reativa membru PNTL reformadu sai nu’udar presedente a’at ba instiuisaun seluk. Komandu F-FDTL implementa ona reformasaun obrigatóriu ba membru sira ne’ebe atinje ona tinan 60. Maibé agora, Governu reativa membru PNTL sira, entaun membru F-FDTL reformadu bele ezije atu ba fali servisu ka oinsá?
Fundamentalmente FM hare’e desizaun Komandu Jerál PNTL atu haruka membru na’in 158 reforma ne’e bazeia ba Estatutu Pesoal, no Estatutu ne’e rasik kria bazeia ba avaliasaun no konsultasaun ho grupu relevanate sira (stakeholder) hotu. Bainhira ita kompara ho Governu nia desizaun atu reativa membru sira, klaru katak desizaun ne’e falta lójiku no konsultasaun la iha. Desizaun ne’e kontra lei en vigor, no mos kria risku oi-oin ba funsionamentu no integridade PNTL, no kria presedente a’at ba instituisaun estadu seluk. Iha tempu hanesan, sinál balun hatudu katak desizaun ne’e halo bazeia ba interese partidu, no ida ne’e indika katak politizasaun setor seguransa kontinua nafatin.
Programa IX Governu diskute klean kona-ba Boa Governasaun no Kombate Korrupsaun. Parte esensiál prosesu ne’e maka tenke asegura katak instituisaun estadu hotu tuir lei, no la hetan influénsia husi desizaun arbitrária ne’ebé tenta atu avanza ajenda polítika no pesoal ruma. Programa Governu mos diskute kona-ba nesesidade PNTL no ajénsia seguransa domestika sira seluk atu promove estadu direitu demokrátiku no funsiona livre husi interese partidu. FM hakarak fó hatene ba polítika na’in sira no públiku Timor-Leste katak patrosíniu hanesan mekanizmu ida ne’ebé funsiona ho silénsiu, maibé loke dalan ba korrupsaun atu buras iha instituisaun públika sira. Bainhira patrosíniu akontese iha ajénsia seguransa sira, ami preokupa tebes, tanba polítiku sira bele viola lei ho impunidade. Tanba ne’e, FM husu Governu atu reve’e fila fali desizaun atu reativa membru PNTL reformadu sira, no jeralmente atu garante katak funsionamentu instituisaun estadu hotu tuir regra ne’ebé hanesan ligadu ho empregu no reformasaun.
