Foto husi: Prof Karen Edvayne/Facebook
Iha tempu badak, balea sira sei komesa halo moviementu iha área tasi Timor-Leste nian hanesan akontese tinan-tinan. Turista barak sei mai husi li’ur atu bele hetan oportunidade hodi hare’e no nani besik animal famozu sira ne’e. Agora dadaun, Timor-Leste mak fatin úniku iha mundu ne’ebé ema bele nani hamutuk ho baleia, tanba ne’e ema barak interese atu mai halo atividade ne’e. Aleinde ne’e, Timor-Leste koñesidu iha mundu hanesan fatin iha ne’ebé ho biodiversidade marina ne’ebé a’as, ne’ebé atrai biolojista no konservasionista barak.
Maibé, setór ne’e enfrenta dezafiu bo’ot tanba seidauk iha regulamentu ka fiskalizasaun legál atu monitór no jere atividade refere. Situasaun sai urjente ona, no péritu marina no membru setór privadu sira fó avizu dehan karik Governu la kria regulamentu hodi kontrola setór turizmu baleia, númeru ro’o no turista ne’ebé aumenta ba beibeik bele afeita balea sira. Baleia sira bele muda sira nia hahalok no posibilidade sira sei la liu ona tasi Timor-Leste nian. Turizmu ne’ebé la regula fó impaktu negativu ba baleia sira, maibé mos bele destrui setór turizmu ho potensiál bo’ot atu kontribui ba dezenvolvimentu sosiál no ekonómiku iha Timor-Leste. Nune’e mos, Governu lakon rendimentu barak tanba seidauk regula turizmu balea, osan ne’ebé bele kontribui ba estadu nia sustentabilidade finanseiru no mos bele investe ba jestaun indústria no hadia kapasidade seguransa marítima. Fundasaun Mahein (FM) hakerek artigu ida ne’e atu diskute kona-ba asuntu ida ne’e no fó rekomendasaun ba polítika na’in no lejizladór Timor-Leste nian.
Turizmu baleia hanesan setór ida ho potensiál bo’ot tebes atu kria kampu traballu, fornese rendimentu husi taxa, no kontribui ba kresimentu ekonómiku liu husi turizmu internasionál. Aleinde ne’e, Timor-Leste nia biodiversidade marina a’as tebes, tanba ne’e ita nia tasi importante tebes ba programa peskiza no konservasaun internasionál. Maske nune’e, governu no polítiku sira seidauk hatudu kompriensaun kona-ba importánsia setór ida ne’e, ka vontade atu kria lei no regulamentu atu jere setór importante ne’e.
Peskizadór sira identifika Timor-Leste nu’udar fatin importante ida ba baleia sira iha tinan 2008. Maibé, liu tiha tinan 10 mak atividade turizmu baleia foin komesa aumenta maka’as. Maioria atividade hare’e no nani ho baleia konsentra iha tasi entre Díli ho Ataúro. Kompañia sira ne’ebé envolve iha setór ne’e husu governu atu regula setór ne’e, depois iha tinan 2020 Governu ho apoiu husi doadór kria “matadalan” ba atividade hare’e baleia (whale-watching). Matadalan ne’e “voluntáriu”, signifika governu fó fiar de’it ba kompañia sira atu implementa. Tempu ne’ebá, Governu promete atu estabelese lei no regra kona-ba lisensamentu. Maibé, maske iha ona konsultasaun entre Governu ho grupu interesadu sira kona-ba lejislasaun, estadu seidauk finaliza regulamentu sira ne’e.
Aleinde ne’e, karik governu no parlamentu konsege kria lei (la’os de’it “matadalan”) ne’ebé obrigatóriu, Timor-Leste nia kapasidade atu implementa regulamentu marítima sei limitadu. Instituisaun seguransa estadu sira, liu-liu sira ne’ebé ho responsabilidade ba zona marítima sira, falta koñesimentu, formasaun no esperiénsia ne’ebé nesesáriu atu monitór no jere setór ida ne’e ho efetívu. Ida ne’e signifika katak estadu sei enfrenta difikuldade bo’ot bainhira implementa regulamentu iha futuru.
Tanba setór turizmu baleia to agora seidauk regula, governu lakon rendimentu potensiál barak. Agora dadaun, kompañia sira nia bazeia iha li’ur mak domina merkadu turizmu baleia internasionál. Kompañia luku nia sira (scuba diving companies) bazeia iha Timor-Leste mos hala’o atividade turizmu baleia. Maibé kompañia estranjeiru sira la rejistu iha Timor-Leste, la deklara rendimentu ba governu, no la selu taxa. Turista sira bele selu $1,000 ema ida loron ida, maibé rendimentu ne’e la kontribui ba ekonomia rai laran ka kofre estadu. Tanba ne’e, Timor-Leste lakon rendimentu barak husi turizmu baleia ne’ebé bele kontribui ba estadu nia sustentabilidade finanseiru, no mos bele apoia jestaun sustentável ba setór ne’e rasik.
Iha mundu tomak, governu uza lisensa no regulamentu seluk hodi obriga kompañia sira selu taxa, depois uza rendimentu ne’e hodi monitór no jere atividades turizmu baleia atu asegura setór nia sustentabililidade. Timor-Leste seidauk iha regulamentu ba setór ne’e, signifika katak ita lakon rendimentu husi taxa, no ita mos lakon benefísiu ambientál no sósiu-ekonómiku ne’ebé mai husi setór turizmu baleia ne’ebé jere ho di’ak. Fundus ne’ebé Governu bele aloka ba programa konservasaun baleia, haforsa kapasidade seguransa marítima, no apoia guia no kompañia lokál sira, lakon totál tanba seidauk iha regulamentu. Nune’e Governu Timor-Leste lakon oportunidade bo’ot atu kria setór turizmu baleia sustentável ne’ebé bele proteje baleia no mos apoia ekonomia ba tempu naruk.
Fatór seluk ne’ebé fasilita turizmu baleia ne’ebé la regula mak monitorizasaun movimentu ema tama husi li’ur mai Timor-Leste ne’ebé la adekuadu. Agora dadaun, kompañia barak nia bazeia iha li’ur hala’o atividades turizmu baleia, no lori sira nia ema mai Timor-Leste sein hetan vistu traballu. Staff husi kompañia refere tama iha Timor-Leste liu husi aeroportu internasionál Díli no hetan vistu “turizmu” iha aeroportu. Prátika ne’e kontra lei migrasaun nian, maibé mos fasilita kompañia sira atu halo operasaun iha Timor-Leste no la kontribui ba ekonomia nasionál liu husi taxa ka pagamentu seluk ne’ebé kompañia internasionál sira tenke selu.
Kompañia sira rasik kontra lei migrasaun sira, maibé problema nia abut lolos maka polítika vistu ne’ebé la atualizadu no burokrasia ne’ebé la efisiente, tanba rua ne’e fasilita atividades ilegál iha rai laran. Hanesan FM hakerek ona, ema sira ne’ebé hakarak mai Timor-Leste atu halo servisu seidauk bele aplika ba vistu traballu molok tama Timor-Leste. Nune’e mos, prosesu atu trata vistu traballu naruk tebes no seidauk iha vistu espesífiku atu hala’o servisu durante tempu badak (short-term work visa). Kompañia estranjeiru nia staff bele hatama aplikasaun ba vistu traballa bainhira sira iha Timor-Leste tiha ona. Maibé regra la klaru no tempu aprovasaun naruk tebes, tanba ne’e la lójiku atu aplika ba vistu traballu, liu-liu ba staf sira ne’ebé sei servisu durante fulan 2-3 de’it. Tanba ne’e, regra atuál no burokrasia ne’ebé la efisiente hafraku kontrolu migrasaun nian, no mos difikulta regulamentu setór turizmu baleia. Karik Timor-Leste hakarak setór ne’e sai sustentável liu, Governu tenke muda polítika no prosesu vistu nian, liu-liu kria dalan ba kompañia sira iha rai li’ur atu aplika vistu traballu ba servisu tempu badak, molok sira mai Timor-Leste.
Situasaun atuál ne’e, iha ne’ebé kompañia bazeia iha li’ur aproveita Timor-Leste nia rekursu naturál hanesan animál sira sein kontrolu, ameasa balada baleia no hafraku sustentabilidade setór turizmu baleia nian. Governu falla atu kria regulamentu hodi kontrola númeru ro’o no monitór turista sira nia hahalok bainhira hala’o atividades turizmu baleia, no mos falla atu garante kompañia turizmu baleia sira treinadu tuir padraun internasionál no halo prátika ne’ebé etika no sustentável. Nune’e, atividade turizmu baleia bele destrui rekursu marina importante ida ne’e.
Tuir FM nia hare’e, polítika na’in sira tenke aprende husi esperiénsia nasaun seluk ne’ebé depende ba ekonomia tasi nian, hanesan Sri Lanka no Tonga. Iha nasaun refere, implementasaun regulamentu fraku no fasilita atividade turizmu baleia ne’ebé la sustentável. Tanba númeru ro’o no turista barak demais, no prátika ne’ebé halo baleia tauk, baleia sira muda ba fatin seluk. Tanba ne’e, setór turizmu baleia iha nasaun rua ne’e kuaze la eziste tiha ona.
Setór turizmu baleia ne’ebé seidauk regula la sustentável, maibé mos ameasa programa konservasaun mundiál no estudu sientífiku sira liga ho baleia no golfiñu. Timor-Leste nia área marítima koñesidu iha mundu tanba ninia biodiversidade a’as tebes, inklui animál ho tipu cetacean hanesan baleia no golfiñu. Tipu ka espésies ne’ebé ho númeru limitadu hanesan baleia azul no kaxalote (sperm whale) mos halo migrasaun liu husi tasi Timor-Leste kada tinan, signifika katak Timor-Leste nia potensiál ba peskiza kona-ba baleia a’as tebes. Estudu sientífiku iha Timor-Leste bele kontribui ba ita nia koñesimentu kona-ba baleia sira nia hahalok no movimentu, no mos kondisaun eko-sistema marina nian. Koñesimentu ne’e esensiál ba programa konservasaun sira no mos ba polítika sira ne’ebé ligadu ho setór ekonómiku marítima sira hanesan turizmu, komérsiu tasi nian, peskas no peskiza ba mina no gáz.
Iha ona peskiza barak ne’ebé hatudu katak interasaun entre ema no baleia bele afeita ba baleia sira nia hahalok no movimentu, no ida ne’e difikulta peskizadór sira atu rekolla dadús kona-ba baleia sira nia moris no seluk tan. Pur ezemplu, baleia sente stres no tauk bainhira sira hasoru beibeik ema, nune’e baleia sira bele muda padraun movimentu nian, halo oan, no han. Nune’e, bainhira la iha regulamentu hodi kontrola no monitór atividade ema no ro’o relasiona ho baleia sira, ne’e sei hafraku programa peskiza nian, no ida ne’e sei estraga Timor-Leste nia reputasaun nu’udar fatin importante ba peskiza kona-ba baleia no tasi.
Programa IX Governu promete atu prioritiza Ekonomia Azul nu’udar pilar xave iha prosesu dezenvolvimentu nasionál. Maibé bainhira governu falla atu implementa regulamentu kona-ba turizmu baleia nian, ne’e kontra direta promesa ida. Ekonomia Azul nia prinsípiu xave mak tenke balansu entre atividade ekonómiku iha tasi ho prezervasaun eko-sistema ka ambiente marina nian. Nune’e, Ekonomia Azul adopta modelu integradu ida ne’ebé rekoñese katak sustentabilidade ambientál no prosperiedade ekonómika la’o hamutuk, labele separa. Infelizmente, situasaun agora nein proteje ambientál ka promove prosperiedade.
Polítika Nasional Oseánu (PNO) aprova iha tinan 2023 hafoin diskusaun naruk, maibé FM nota katak polítika ne’e la mensiona baleia ka atividade turizmu baleia. Nune’e mos, maske IX Governu promove Ekonomia Azul no selebra Loron Internasionál Oseánu iha fulan Juñu liu bá, Governu seidauk ‘follow-up’ kona-ba PNO dezde polítika governu nian aprova iha tinan kotuk, no seidauk estabelese Komité Diresaun Nasionál Oseánu ne’ebé iha responsabilidade atu implementa PNO. Faktu hirak ne’e sujere katak polítika na’in sira seidauk kompriende ho urjénsia atu implementa regulamentu ne’ebé forte relasiona ho atividades marítima ne’ebé envolve baleia.
Estadu seidauk kria regulamentu ba setór turizmu baleia ne’ebé aumenta ba beibeik no iha potensiál ekonómiku ne’ebé bo’ot tebes. Situasaun atuál ne’e la sustentável no halo péritu no setór privadu sira preokupa tebes. Karik governu la kria lei no haforsa kapasidade atu implementa regulamentu refere, atividades turizmu baleia ne’ebé la kontroladu sei ameasa balada baleia nian iha Timor-Leste nia área tasi. Atividade refere bele kria impaktu negativu oi-oin, hanesan halo baleia sira lakohi ona liu husi tasi Timor-Leste nian. Ne’e kria risku bo’ot ba baleia rasik no mos ba Timor-Leste nia reputasaun hanesan fatin importante ida ba atividade turizmu no peskiza kona-ba baleia nian.
Iha sorin seluk, karik Governu Timor-Leste kria regulamentu kompriensivu ba setór turizmu ida ne’e, bele asegura katak rendimentu husi turizmu baleia sei investe fali iha área xave sira hanesan: monitorizasaun iha área tasi; prezervasaun no peskiza kona-ba baleia; akreditasaun, edukasaun no treinamentu liga ho atividade baleia; no dezenvolvimentu komunitáriu. Tuir péritu balun ne’ebé fahe hanoin ho FM, presiza kria lei espesífiku ida ne’ebé foka ba turizmu baleia no peskiza, no tenke mos kria polítika ida ne’ebé apoia programa konservasaun baleia no promove setór turizmu baleia ne’ebé sustentável no étika. Presiza mos meius atu fasilita kompañia bazeia iha rai li’ur atu hala’o atividade iha Timor-Leste, atu nune’e kompañia sira bele selu taxa, trata vistu relevante ba staf internasionál sira, no kontribui ba ekonomia lokál no haforsa kapasidade lokál. Depois, atu estadu bele implementa lei ho efetívu, presiza mos aloka rekursu ne’ebé adekuadu atu haforsa kapasidade iha instituisaun seguransa marítima sira. Iha tempu hanesan, lei no polítika tenke apoia programa monitorizasaun no peskiza sira kona-ba baleia. Atividade rua refere bele mos finansia liu husi rendimentu ne’ebé estadu simu husi kompañia sira ne’ebé hala’o atividade turizmu baleia.
Atu bele realiza benefísiu husi biodiversidade marina no mos realiza promesa IX Governu nian atu promove Ekonomia Azul, polítika na’in sira tenke servisu hamutuk hodi kria regulamentu kona-ba setór turizmu baleia. Lidér Timor-Leste bele asegura setór turizmu baleia nia sustentabilidade ba oin, maibé atu atinje ida ne’e, presiza vontade polítika ne’ebé forte. Setór ne’ebé bem reguladu bele kontribui ba kresimentu ekonómiku, sustentabilidade finanseiru, no seguransa ambientál. Karik lidér sira falla atu regula setór ida ne’e, atividade turizmu baleia bele estraga fali baleia sira, no mos bele deztrui setór importante ida ne’e iha tempu badak, nune’e Timor-Leste sei lakon nia reputasaun nu’udar fatin importante ida ba animál marina sira. Tanba ne’e, FM husu ba Governu no polítika na’in sira hotu atu prioritiza regulamentu setór turizmu baleia, atu nune’e Timor-Leste la bele lakon rekursu importante ida ne’e.
